Last updated on August 22nd, 2025 at 11:32 am
ಭೋಪಾಲ್: ಸ್ವಾತಂತ್ರ್ಯ ದಿನಾಚರಣೆದಾನಿ ಪಟ್ಟಿನ ಲಾಡ್ದ ವಿಚಾರೊಡು ಆಂಜೊವು ಒರಿ ಮುಖ್ಯಮಂತ್ರಿಲೆನ ಸಹಾಯವಾಣಿಗ್ ಫೋನ್ ಮಲ್ತ್ದ್ ಒಯಿಲ್ ಕೊರ್ತಿನ ವಿಚಿತ್ರ ನಡಕೆ ಮಧ್ಯಪ್ರದೇಶೊದ ಭಿಂಡ್ ಜಿಲ್ಲೆಡ್ ನಡತ್ದ್ಂಡ್.
ಕಮಲೇಶ್ ಖುಷ್ವಾಹ ಪುದರ್ದ ಆಂಜೊವು ಮುಖ್ಯಮಂತ್ರಿಲೆನ ಸಹಾಯವಾಣಿಗ್ ಕಾಲ್ ಮಲ್ತ್ದ್ ಒಯಿಲ್ ಕೊರ್ತಿನಾರ್.
ಕಮಲೇಶ್ ರೆನ ಒಯಿಲ್ದ ಪ್ರಕಾರ ಭಿಂಡ್ ಜಿಲ್ಲೆದ ಗ್ರಾಮ ಪಂಚಾಯತ್ ಭವನೊಡು ಆಗಸ್ಟ್ 15 ತಾನಿ ನಡತಿನ ಧ್ವಜಾರೋಹಣ ಲೇಸ್ದ ಅಕೇರಿಡ್ ಅಲ್ಪ ಬತ್ತ್ದ್ ಸೇರ್ದಿತ್ತಿನ ಮಾತೆರೆಗ್ಲಾ ರಡ್ಡ್ರಡ್ಡ್ ಲಾಡ್ ಪಟ್ಟ್ದೆರ್, ಆಂಡ ಅಲ್ಪನೇ ಇತ್ತಿನ ಎಂಕ್ ಮಾತ್ರ ಒಂಜೇ ಲಾಡ್ ಕೊರ್ತೆರ್. ಕುಡೊಂಜಿ ಲಾಡ್ ಕೇನ್ನಗ ಕೊರ್ಪುಜಿ ಪನ್ದ್ ಪನ್ತೆರ್. ಆತೇ ಅತ್ತಂದೆ ಪಂಚಾಯತ್ ಸಿಬ್ಬಂದಿ ಚೀಪೆ ಪಟ್ಟುನೆಟ್ ತಾರತಮ್ಯ ಮಲ್ತ್ದೆರ್, ಈ ವಿಚಾರೊಡು ಎಂಕ್ ನ್ಯಾಯ ಬೋಡು ಪನ್ದ್ ಕೇನೊಂದೆರ್ ಪನ್ದ್ ತೆರಿದ್ ಬೈದ್ಂಡ್.
ಈ ನಡಕೆದ ಬಗೆಟ್ ಪಂಚಾಯತ್ ಕಾರ್ಯಂತೆರ್ ಪಾತೆರ್ದಿತ್ತ್ದ್, ಧ್ವಜಾರೋಹಣ ಆಪುನ ಪೊರ್ತುಡು ಕಮಲೇಶ್ ಪಂಚಾಯತ್ ಪಾಗಾರದ ಪಿದಯಿ ಇತ್ತೆರ್, ಈ ಪೊರ್ತುಡು ಸಿಬ್ಬಂದಿ ಚೀಪೆ ಪಟ್ಟ್ದಿತ್ತ್ದ್, ಪಿದಯಿ ಇತ್ತಿನಕ್ಲೆಗ್ ಕಮಲೇಶ್ ಗ್ಲಾ ಸೇರ್ದ್ ಒಂಜೊಂಜಿ ಲಾಡ್ ಕೊರ್ತೆರ್. ಆಂಡ ಆರ್ ರಡ್ಡ್ ಲಾಡ್ ಕೇನ್ದಿನ ವಿಚಾರ ಎಂಕ್ ತೆರಿದಿಜಿ. ಉಂದಾದ್ ಒಂತೆ ಪೊರ್ತುಡು ಏರೆಡನಾ ಫೋನ್ಡ್ ಪಾತೆರೊಂದಿತ್ತೆರ್, ಆಂಡ ಆರ್ ಮುಖ್ಯಮಂತ್ರಿ ಸಹಾಯವಾಣಿಗ್ ಫೋನ್ ಮಲ್ದಿನ ಪನ್ದ್ ಬೊಕ್ಕ ಗೊತ್ತಾಂಡ್ ಪನ್ದ್ ಪನ್ಡೆರ್
ಸಮದಾರಿಕೆ ಮಲ್ಪೆರ ಪುನೆಯೆರ್ ಪಂಚಾಯತ್ ಸಿಬ್ಬಂದಿ:
ರಡ್ಡ್ ಲಾಡ್ ಕೊರ್ಪುನ ಬುಡ್ದು ಒಂಜಿ ಲಾಡ್ ಕೊರ್ದು ತಿಕ್ಕ್ದ್ ಬೂರ್ನ ಗ್ರಾಮಪಂಚಾಯತ್ ಸಿಬ್ಬಂದಿ ಒಯಿಲ್ ಕೊರ್ತಿನ ವಿಚಾರ ತೆರಿನೇ ಕಮಲೇಶ್ ಗ್ ಸಮದಾರಿಕೆ ಮಲ್ಪೆರ ಅಂಗಡಿರ್ದ್ ಒಂಜಿ ಕೆಜಿ ಲಾಡ್ ದೆತ್ತ್ ಕೊರ್ದು ಸಮದಾರಿಕೆ ಮಲ್ಪೆರ ತೂತೆರ್.