Last updated on September 2nd, 2025 at 01:55 pm
ಕುಡ್ಲ, ಸೆ. 02 : ಇಂಚಿಪ ರಿಕ್ಷಾ ಡ್ರೈವರ್ ಒರಯಗ್ ಏರೋ ಆಕ್ದೆರ್ ಪನ್ಪಿ ಬಗೆಟ್ ಪ್ರಕರಣ ದಾಕಲಾದಿತ್ತ್ಂಡ್, ಆಂಡ ಪೊಲೀಸೆರ್ ಜಡ್ತೆ ಮಲ್ಪುನಗ ಇತ್ತೆ ರಿಕ್ಷಾ ಡ್ರೈವರೇ ತನ್ನ ಮಿತ್ತ್ ತಾನೇ ಗಡಿ ಮಲ್ತೊಂದು ಬೊಕ್ಕ ಏರೋ ಆಕ್ದೆರ್ ಪನ್ದ್ ಕಲು ಸುದ್ದಿ ಪಸೆರಾದಿನ ತೆರಿದ್ ಬೈದ್ಂಡ್.
ಆಗಸ್ಟ್ 31ತ ಐತಾರ ರಾತ್ರೆ ಬಶೀರ್ ಪನ್ಪಿನ ರಿಕ್ಷಾ ಡ್ರೈವರ್ ಮೆಯಿನೀರ್ ಮೈಪೆರ ಫಳ್ನೀರ್ಡ್ ರಿಕ್ಷಾ ಉಂತಾನಗ ತನ್ನ ಮಿತ್ತ್ ಒಂಜಿ ಕೂಟದಕ್ಲು ಹಲ್ಲೆ ಮಲ್ದೆರ್ ಪನ್ದ್ ಸುದ್ದಿ ಲಕ್ಕಾದಿತ್ತೆ. ಆತೇ ಅತ್ತಂದೆ, ಆಸ್ಪತ್ರೆಗ್ ದಾಕಲಾದ್ ಮರ್ದ್ಲಾ ಗೆತೊಂದಿತ್ತೆ. ಉಂದೆತ ಬೆರಿಟೇ ಪೊಲೀಸೆರ್ ಜಾಗೆಗ್ ಪೋದು ಬಶೀರ್ನ ಪಾತೆರದ ಪ್ರಕಾರ ಕೇಸ್ಲಾ ದಾಕಲ್ತ್ದಿತ್ತೆರ್. ಬ್ಯಾರಿ ಭಾಷೆ ಪಾತೆರೊಂದಿತ್ತಿನಕುಲು ಈ ಪೊಲೀಸೆರೆಡ ಪತ್ತದ್ ಪಾಡುವ ಅತಾ ಪನ್ದ್ ಪನ್ಡ್ದ್ ಹಲ್ಲೆ ಮಲ್ದೆರ್ ಪನ್ದ್ ಬಶೀರ್ ಪನ್ದಿತ್ತೆ. ಆ ಪ್ರಕಾರ, ಆಕಿನಕ್ಲೆನ ಬಗೆಟ್ ಪೊಲೀಸೆರ್ ಜಡ್ತೆ ಮಲ್ಪೆರ ಜತ್ತಿತ್ತೆರ್.
ಆಂಡ ಬಶೀರ್ ಆಕಿನ ಜಾಗೆ ತೋಜಾಯಿನಲ್ಪದ ಸಿಸಿಟಿವಿ ತೂನಗ ಆಕ್ದಿನ ದೃಶ್ಯ ತೋಜಿದ್ ಬೈದಿಜಿ. ಅಂಚಾದ್ ಆಯನ್ ನನಲಾತ್ ವಿಚಾರಣೆ ಮಲ್ಪುನಗ ಸುಳ್ಳು ದೂರು ಕೊರ್ತೆ ಪನ್ದ್ ಒತ್ತೊಂದೆ. ದುಂಬೊರ ಪೊಲೀಸೆರೆಗ್ ಒಲವು ಕೊರ್ತಿನ ವಿಚಾರೊಡು ಒಂತೆ ಜನ ಪೋಡಿಕಟ್ಟಾದಿತ್ತೆರ್. ಅಂಚಾದ್ ಅಕುಲು ದಾಳಿ ಮಲ್ಪೆರ್ ಪನ್ಪಿನ ಪೋಡಿಗೆ ಇತ್ತಿನೆರ್ದಾವರ ಅವೆರ್ದ್ ದುಂಬೇ ದಾಳಿದ ನಾಟಕ ಮಲ್ತ್ದೆ ಪನ್ದ್ ಪನ್ತೆ.
ತಾನೇ ಬಂಜಿಗ್ ಕುತ್ತೊಂದು ಗಡಿ ಮಲ್ತೊಂದು ಏರೋ ಆಕ್ದೆರ್ ಪನ್ದ್ ಪನ್ದಿತ್ತೆ. ಪೊಲೀಸ್ ಜಡ್ತೆಡ್ ನಿಜ ವಿಷಯ ತೆರಿಯೊಂದಿತ್ತಿಲೆಕನೆ ಪೊಲೀಸ್ ಕಮಿಷನರ್ ಸುಧೀರ್ ರೆಡ್ಡಿ ಸ್ಪಷ್ಟನೆ ಕೊರ್ತೆರ್. ಸುಳ್ಳು ಭಾರೀ ಬೀಸ ಪಾರುಂಡು, ಸತ್ಯ ಕುಂಟೊಂದು ಬತ್ತ್ದ್ ಎದುರು ಉಂತುಂಡು. ಈ ವಿಚಾರೊಡ್ಲಾ ಅಂಚೆನೇ ಆತ್ಂಡ್. ರಿಕ್ಷಾ ಡ್ರೈವರ್ಗ್ ಆಕಿಯೆರ್ ಪನ್ದ್ ಭಾರೀ ಬೀಸಡ್ ಸುದ್ದಿ ಬಲ್ತಿತ್ತ್ಂಡ್. ಓಲಾಂಡಲಾ, ಹಿಂದುಲು ಆಕ್ದೆರ್ ಪನ್ದ್ ಆಯೆ ಪನ್ತುವೆನ್ಡ ಪರಿಸ್ಥಿತಿ ಬೇತೆನೇ ಆತು. ಪೊಲೀಸೆರೆ ಜಡ್ತೆಡ್ ಹಲ್ಲೆನೇ ಆತಿಜಿ ಪನ್ಪಿನ ನೈಜ ವಿಷಯ ತೆರಿದ್ ಬೈದ್ಂಡ್. ಸುದ್ದಿ ಪಟ್ಟೊನುನಗ ಸಾರ್ವಜನಿಕೆರ್ ಜಾಗ್ರ್ತೆ ಮಲ್ಪೊಡು ಪನ್ದ್ ಸುಧೀರ್ ರೆಡ್ಡಿ ಎಚ್ಚರ್ಗೆ ಕೊರ್ತೆರ್.