ಕೋರ್ಟ್‌ಗ್ ಬರಂದೆ, ದುಬೈಡ್ ದೆಂಗ್‌ತಪ್ಪಾದಿತ್ತಿನಾಯೆ ಕುಡ್ಲಗ್ ಬತ್ತ್‌ದ್ ಜತ್ತೊಂದಿತ್ತಿಲೆಕನೆ ಅರೆಸ್ಟ್

Last updated on September 6th, 2025 at 11:06 am

ಕುಡ್ಲ, ಸೆ. 06: ಒಂಜಿ ಪ್ರಕರಣೊಡು ಆರೋಪಿ ಆದಿತ್ತ್‌ದ್, ಮೂಜಿ ವರ್ಸೊರ್ದಿಂಚಿ ನ್ಯಾಯಂತಡೆಕ್ ಬರಂದೆ ದುಬೈಡ್ ದೆಂಗ್‌ತಪ್ಪಾದಿತ್ತಿನ ಆರೋಪಿನ್ ಕುಡ್ಲಗ್ ಬರೊಂದಿತ್ತಿಲೆಕನೆ ಪೊಲೀಸೆರ್ ಅರೆಸ್ಟ್ ಮಲ್ತ್‌ದೆರ್.

ಕೈದಾತಿನಾಯನ್ ವಿಶಾಲ್ ಕುಮಾರ್ ಪನ್ದ್ ಗುರ್ತ ಪತ್ತ್‌ದೆರ್. ಆರೋಪಿ‌ನ ಮಿತ್ತ್ 2016ಟ್ ಕಾವೂರು ಪೊಲೀಸ್ ಸ್ಟೇಶನ್‌ಡ್ ಪ್ರಕರಣ ದಾಕಲಾದಿತ್ತ್ಂಡ್. ಆರೋಪಿ ನ್ಯಾಯಂತಡೆಕ್ 2022 ರ್ದ್ ಬೊಕ್ಕ ಬರಂದೆ ದೆಂಗ್‌ತಪ್ಪಾದಿತ್ತೆ. ಆಯನ ಮಿತ್ತ್ ಕೋರ್ಟ್ ದಸ್ತಗಿರಿ ವಾರೆಂಟ್ ಪಿದಡ್ಪಾದಿತ್ತ್ಂಡ್, ಆಯೆ ದುಬೈಗ್ ಪೋತಿನ ಪತ್ತ ಒಲವುದ ಮಿತ್ತ್ ಆಯನ ಮಿತ್ತ್ ಎಲ್.ಓ.ಸಿ ಪಿದಡ್ಪಾದಿತ್ತೆರ್.

ಆಯೆ ಮುರಾನಿ ಸೆಪ್ಟೆಂಬರ್ 4 ಕ್ ಕುಡ್ಲ ಅಂತರಾಷ್ಟ್ರೀಯ ವಿಮಾನ ಉಂತಡೆಗ್ ಬತ್ತ್‌ದ್ ಜತ್ತೊಂದಿತ್ತಿಲೆಕನೆ ಆಯನ್ ಬ್ಯೂರೋ ಆಫ್ ಇಮಿಗ್ರೇಷನ್ ದಕುಲು ವಶೊಕು ಗೆತೊಂದು ನನದ ಕ್ರಮೊಕು ಕಾವೂರು ಪೊಲೀಸ್ ಸ್ಟೇಶನ್‌ಗ್ ಒಪ್ಯಾದೆರ್. ಆರೋಪಿನ್ ಕೋಡೆ 3 ನೇ ಎಚ್ಚಿಗೆದ ಜಿಲ್ಲಾ ನ್ಯಾಯಂತಡೆದ ಎದುರು ಲೆತೊಂದು ಪೋದಿತ್ತ್‌ದ್ ಆರೋಪಿಗ್ ನ್ಯಾಯಂತಡೆ 18-09-2025 ಮುಟ್ಟ ನ್ಯಾಯಾಂಗ ಕೈದ್ ಕೊರ್ತುಂಡು.

ಉಂಬ್ಯೆ ಸುಮಾರ್ 3 ವರ್ಸೊರ್ದಿಂಚಿ ಕೋರ್ಟ್‌ಗ್ ಬರಂದೆ ದೆಂಗ್‌ತಪ್ಪಾದಿತ್ತಿನೆರ್ದಾವರ ಉಂಬ್ಯನ ಮಿತ್ತ್ ಕಾವೂರು ಪೊಲೀಸ್ ಸ್ಟೇಶನ್ ಅ.ಕ್ರ: 133/2025 ಕಲಂ: 269 ಬಿ.ಎನ್.ಎಸ್ ದ ಪ್ರಕಾರ ಪ್ರಕರಣ ದಾಕಲಾತ್ಂಡ್. ಉಂಬ್ಯನ ಮಿತ್ತ್ ಬರ್ಕೆ ಪೊಲೀಸ್ ಸ್ಟೇಶನ್‌ಡ್ಲಾ ಕೇಸ್ ಉಂಡು.