Last updated on September 7th, 2025 at 08:18 am
ಬಂಟ್ವಾಳ, ಸೆ. 07: ಲಂಚ ಗೆತೊನೊಂದುಪ್ಪುನಗ ಬಂಟ್ವಾಳ ತಾಲೂಕ್ದ ಪೆರುವಾಯಿ ಗ್ರಾಮ ಪಂಚಾಯತ್ ಅಧ್ಯಕ್ಷೆದಿ ಬೊಕ್ಕ ಬಿಲ್ ಕಲೆಕ್ಟರ್ ಕುಡ್ಲ ಲೋಕಾಯುಕ್ತೆರೆನ ಬೇಪುಗು ಬೂರ್ದಿನ ನಡಕೆ ಕೋಡೆ ಶನಿವಾರ ಬಯ್ಯಡ್ ನಡತ್ದ್ಂಡ್.
ಪೆರುವಾಯಿ ಗ್ರಾಮ ಪಂಚಾಯತ್ಗ್ ಸರ್ಕಾರೊದ ವಿಶೇಷ ಘಟಕ ಯೋಜನೆ ಬೊಕ್ಕ ಗಿರಿಜನ ಉಪಯೋಜನೆದ ಅಡಿಟ್ ಎಂಕ್ಲೆನ ಜಾಗೆಗ್ ಒಂಜಿ ಬೋರ್ವೆಲ್ ಮಲ್ತ್ ಕೊರ್ಲೆ ಪನ್ದ್ 2024ಟ್ ಪೆರುವಾಯಿ ಗ್ರಾಮ ಪಂಚಾಯತ್ಡ್ ಫಲಾನುಭವಿ ಒಂಜಿ ಜನ ಅರ್ಜಿ ಪಾಡ್ದಿತ್ತೆರ್.
ಪೆರುವಾಯಿ ಗ್ರಾಮ ಪಂಚಾಯತ್ ಕಚೇರಿಗ್ ರಡ್ಡ್ ಮೂಜಿ ಸರ್ತಿ ಪೋದು ವಿಚಾರಿತ್ಂಡಲಾ ಸಮ ಪ್ರತಿಕ್ರಿಯೆ ಕೊರ್ತುಜೆರ್ಗೆ. ಬೊಕ್ಕ ‘ಈರೆಗ್ ಬೋರ್ವೆಲ್ ಫ್ರೀ ಆಪುಂಡು, ಬೆಂಗಳೂರು ಆಫೀಸ್ಗ್ ಪತ್ತ್ ಸಾರ ಕೊರ್ಯೆರ ಉಂಡು, ಕಾಸ್ ಕೊರ್ನ್ಡ ಅಕುಲು ಪಾಸ್ ಮಲ್ಪುವೆರ್. ಯಾನ್ ಬೆಂಗಳೂರುಗು ಪೋದು ಈರೆನ ಬೇಲೆ ಮಲ್ಪಾವೆ, ಕಾಸ್ ಕೊನೊದು ಬಲೆ, ಈರ್ ಕಾಸ್ ಕೊರ್ಯರ್ನ್ಡ ಬೋರ್ವೆಲ್ ಪಾಸ್ ಮಲ್ತ್ ಕೊರ್ಪೆ’ ಪನ್ದ್ ಅಧ್ಯಕ್ಷೆದಿ ನೆಫಿಸಾ ಪನ್ದಿತ್ತೆರ್ಗೆ.
ನೆಫಿಸಾ ಮೇರ್ ವಿಶೇಷ ಘಟಕ ಯೋಜನೆ ಬೊಕ್ಕ ಗಿರಿಜನ ಉಪಯೋಜನೆದ ಅಡಿಟ್ ಬೋರ್ವೆಲ್ ದೆಪ್ಪಾದ್ ಕೊರ್ಯೆರ ರೂ 10,000 ಲಂಚದ ಕಾಸ್ ಕೇನ್ದೆರ್. ಈ ಬಗೆಟ್ ಕುಡ್ಲ ಲೋಕಾಯುಕ್ತ ಪೊಲೀಸ್ ಸ್ಟೇಶನ್ಡ್ ಆರೋಪಿಲೆನ ಮಿತ್ತ್ ಪ್ರಕರಣ ದಾಕಲಾತ್ಂಡ್.
ಶನಿವಾರ ಪೆರುವಾಯಿ ಗ್ರಾಮ ಪಂಚಾಯತ್ ಅಧ್ಯಕ್ಷೆದಿ ನಫೀಸಾ ಬೊಕ್ಕ ಬಿಲ್ ಕಲೆಕ್ಟರ್ ವಿಲಿಯಂ ಮೊಕುಲು ರೂ.10,000 ಲಂಚ ಗೆತೊನೊಂದುಪ್ಪುನಗ ಲೋಕಾಯುಕ್ತ ಪೊಲೀಸೆರೆ ಬೇಪುಗು ಬೂರ್ದೆರ್. ಮೊಕುಲಿರ್ವೆರೆನ್ ವಶೊಕು ಗೆತೊಂದು ಜಡ್ತೆ ಮಲ್ತೊಂದುಲ್ಲೆರ್.
ಕುಡ್ಲ ಲೋಕಾಯುಕ್ತ ಎಸ್ಪಿ (ಪ್ರಭಾರ) ಕುಮಾರ್ ಚಂದ್ರ ಮುತಾಲಿಕೆಡ್ ಡಿವೈಎಸ್ಪಿ ಡಾ. ಗಾನ ಪಿ. ಕುಮಾರ್, ಸುರೇಶ್ ಕುಮಾರ್ ಪಿ, ಇನ್ಸ್ಪೆಕ್ಟರ್ ಭಾರತಿ, ಚಂದ್ರಶೇಖರ್ ಕೆ.ಎನ್, ರವಿ ಪವಾರ್ ಸೇರ್ದ್ ಬೇತೆ ಅಧಿಕಾರಿಲು ಕಾರ್ಯಾಚರಣೆಡ್ ಪಾಲ್ಪಡೆದಿತ್ತೆರ್.