Last updated on September 7th, 2025 at 11:16 am
ಒಡಿಪು, ಸೆ. 06: ಫೇಸ್ಬುಕ್ಡ್ ಗುರ್ತ ಆಯಿನ ಪೊಂಜೊವು ಒರ್ತಿನ ಪಾತೆರೊನು ನಂಬುದು ಕಾಪು ಮೂಲೊದ ಆಂಜೊವು ಒರಿ ಸುಮಾರ್ 75 ಲಕ್ಷ ಕಾಸ್ ಕಲೆವೊಂದಿನ ನಡಕೆ ನಡತ್ದ್ಂಡ್. ಈ ಪ್ರಕರಣೊಗು ಸಂಬಂಧಿತ್ದ್ ಪೊಲೀಸೆರ್ ನಾಲ್ವೆರೆನ್ ಅರೆಸ್ಟ್ ಮಲ್ತ್ದ್ 4 ಲಕ್ಷ ಕಾಸ್ ವಶೊಕು ಗೆತೊಂದೆರ್.
ಕಾಪು ಮೂಲೊದ ಜೊಸ್ಸಿ ರವೀಂದ್ರ ಡಿಕ್ರೂಸ್(54) ಪನ್ಪಿನಾರೆಗ್ ಫೇಸ್ಬುಕ್ಡ್ ಆರೋಹಿ ಅಗರ್ವಾಲ್ ಪನ್ಪಿನ ಪೊಂಜೊವು ಗುರ್ತ ಆತಲ್. ಬೊಕ್ಕ 2025ತ ಫೆಬ್ರವರಿ ತಿಂಗೊಲುಡು ಪೊಂಜೊವು ವಾಟ್ಸಾಪ್ ನಂಬರ್ ಗೆತೊಂದು FXCM Gold Tradingಗ್ ಕಾಸ್ ಪಾಡ್ಂಡ ಎಚ್ಚಿನ ಲಾಭಾಂಶ ಬರ್ಪುಂಡು ಪನ್ದ್ ಮೆಸೇಜ್ ಮಲ್ತ್ದಲ್. ಅವೆನ್ ನಂಬಿನ ರವೀಂದ್ರೆ ತನ್ನ ಬ್ಯಾಂಕ್ ಅಕೌಂಟ್ರ್ದ್ ಒಂತೆ ಒಂತೆನೇ ಒಟ್ಟು 75,00,000/- ರೂಪಾಯಿ ಕಾಸ್ ಕಡಪುಡ್ದೆರ್. ಕಾಸ್ ಕಡಪುಡ್ದ್ ಆಯಿ ಬೊಕ್ಕ ಪೊಂಜೊವು ಸಂಪರ್ಕೊಗು ತಿಕ್ಕಂದೆ ಎಸ್ಕೇಪ್ ಆತಲ್.
ಮಂಗೆ ಆತಿನ ತೆರಿಯೊಂದಿತ್ತಿಲೆಕನೆ ಜೊಸ್ಸಿ ರವೀಂದ್ರ ಡಿಕ್ರೂಸ್ ಮೇರ್ ಉಡುಪಿ ಸೆನ್ ಪೊಲೀಸ್ ಸ್ಟೇಶನ್ಡ್ ಒಯಿಲ್ ಬರೆಪಾದೆರ್. ಜಡ್ತೆ ಮಲ್ತಿನ ಒಡಿಪು ಪೊಲೀಸೆರ್ ನಾಲ್ವೆರೆನ್ ಅರೆಸ್ಟ್ ಮಲ್ತ್ದೆರ್. ಕೈದಾತಿನಕ್ಲೆನ್ ತೊರ್ತಲ್ದ ಮೊಹಮದ್ ಕೈಸ್(20), ಒಡಿಪು ಜಿಲ್ಲೆದ ಅಹಮದ್ ಅನ್ವೀಜ್(20), ಬಂಟ್ವಾಳದ ಸಪ್ವಾನ್(30), ತಾಸೀರ್(31) ಪನ್ದ್ ಗುರ್ತ ಪತ್ತ್ದೆರ್. ಅಕ್ಲೆನ ಕೈರ್ದೊ ಮೊಬೈಲ್ ಪೋನ್ ಲೆನ್ ಅಂಚೆನೇ ರೂ 4,00,000/- ಕ್ಯಾಶ್ನ್ ಸ್ವಾಧೀನ ಮಲ್ತೊಂದೆರ್. ಈ ಪ್ರಕರಣೊದ ಬೇತೆ ಆರೋಪಿಲು ದೆಂಗ್ತಪ್ಪಾದಿತ್ತ್ದ್, ಅಕಲೆನ್ ಪತ್ತೆರೆ ಜಡ್ತೆ ಮಲ್ತೊಂದುಲ್ಲೆರ್.