Last updated on October 11th, 2025 at 11:21 am
ಬೆಂಗಳೂರು, ಅ. 11: ಮುಸ್ಲಿಂ ದಂಪತಿಲೆಗ್ ಮದಿಮೆದ ಸರ್ಟಿಫಿಕೆಟ್ ಕೊರ್ಪುನ ಅಧಿಕಾರ ವಕ್ಫ್ ಮಂಡಳಿಗ್ ಇಜ್ಜಿ ಪನ್ದ್ ಕರ್ನಾಟಕ ಹೈಕೋರ್ಟ್ ಮಹತ್ವೊದ ಆದೇಶ ಕೊರ್ತುಂಡು.
ಮದಿಮೆದ ಸರ್ಟಿಫಿಕೆಟ್ ಕೊರ್ಪುನ ಅಧಿಕಾರೊನು ರಾಜ್ಯ ವಕ್ಫ್ ಮಂಡಳಿಗ್ ಕೊರ್ದು ಅಲ್ಪಸಂಖ್ಯಾತೆರೆ ಕಲ್ಯಾಣ ಇಲಾಖೆ ಅಧೀನ ಕಾರ್ಯದರ್ಶಿನ ಮುಕೇನ ರಾಜ್ಯ ಸರ್ಕಾರ 2023ತ ಆ.30ದಾನಿ ಆದೇಶ ಕೊರ್ದಿತ್ತ್ಂಡ್. ಈ ಆದೇಶ ರದ್ದ್ ಮಲ್ಪೆರ ಕೇನ್ಡ್ದ್ ಬೆಂಗಳೂರುದ ಎ. ಆಲಂ ಪಾಷಾ ಪನ್ಪಿನಾರ್ 2024ಟ್ ಹೈಕೋರ್ಟ್ಗ್ ಪಿಐಎಲ್ ಪಾಡ್ದಿತ್ತೆರ್.
ಅರ್ಜಿದ ವಿಚಾರಣೆ ಮಲ್ತಿನ ಮುಖ್ಯ ನ್ಯಾಯಮೂರ್ತಿ ವಿಭು ಬಖ್ರು ಮೆರೆನ ಮುತಾಲಿಕೆದ ವಿಭಾಗೀಯ ಪೀಠೊದ ಎದುರು, ಸರ್ಕಾರೊದ ಪರ ವಕೀಲೆರ್, 2023ತ ಆ.30ದಾನಿ ಪಿದಡ್ಪಾದಿನ ಆದೇಶೊನು ಪಿರಗೆತೊಂದುಂಡು ಪನ್ದ್ ತೆರಿಪಾದ್ ಪ್ರಮಾಣ ಪತ್ರ ಸಂದಾಯೆರ್. ಸರ್ಕಾರೊದ ಪರ ಪಾತೆರ ದಾಕಲ್ತೊಂಡಿನ ನ್ಯಾಯಪೀಠ ಮುಸ್ಲಿಂ ದಂಪತಿಲೆಗ್ ಮದಿಮೆ ಸರ್ಟಿಫಿಕೆಟ್ ಕೊರ್ಪುನ ಅಧಿಕಾರ ವಕ್ಫ್ ಮಂಡಳಿಗ್ ಇಜ್ಜಿ ಪನ್ದ್ ಆದೇಶ ಕೊರ್ತುಂಡು.