Last updated on October 24th, 2025 at 08:37 am
ತೊರ್ತಲ್, ಅ. 24: ನಾಲ್ ಜನ ಕೆಂಗುಡೆರೆ ಕೂಟ ಇರ್ವೆರೆಗ್ ಬೀಸತ್ತಿ ಪಾಡಿನೆರ್ದಾವರ ಒರಿಯಗ್ ಗಾತಿದ ಗಡಿಕುಲಾದ್, ಕುಡೊರಿಯಗ್ ಕಿಞ್ಞ ಕಿಞ್ಞ ಗಡಿಕುಲಾತಿನ ನಡಕೆ ಕೋಡೆ ಗುರುವಾರ ರಾತ್ರೆ ತೊರ್ತಲ್ ಪೊಲೀಸ್ ಸ್ಟೇಶನ್ ಸೀಮೆದ ಕಾನ ಪೆಟ್ರೋಲ್ ಪಂಪ್ದ ಕೈತಲ್ ನಡತ್ದ್ಂಡ್.
ಬೀಸತ್ತಿ ಬೂರ್ದಿನಕ್ಲೆನ್ ತೊರ್ತಲ್ ಚೊಕ್ಕಬೊಟ್ಟು ನಿವಾಸಿ ನಿಝಾಮ್ (23) ಬೊಕ್ಕ ಕೃಷ್ಣಾಪುರ ಹಿಲ್ ಸೈಡ್ ನಿವಾಸಿ ಹಸನ್ ಮುರ್ಷಿದ್ (18) ಪನ್ದ್ ಗುರ್ತ ಪತ್ತ್ದೆರ್.
ನಿಝಾಮ್ ನ ಬಂಜಿಗ್ ಗಾತಿದ ಗಡಿ ಆದಿತ್ತ್ದ್, ಆಯಗ್ ಮುಕ್ಕದ ಪ್ರೈವೇಟ್ ಆಸ್ಪತ್ರೆಡ್ ಕಡೀರ ಮರ್ದ್ ಮಲ್ತ್ದ್, ಎಚ್ಚಿನ ಮರ್ದ್ಗ್ ಕುಡ್ಲದ ಪ್ರೈವೇಟ್ ಆಸ್ಪತ್ರೆಗ್ ಲೆತೊಂದು ಪೋತೆರ್. ಕಿಞ್ಞ ಗಡಿಕುಲಾತಿನ ಮುರ್ಷಿದ್ ಮುಕ್ಕಡ್ ಮರ್ದ್ ಮಲ್ತೊಂದುಲ್ಲೆರ್ ಪನ್ದ್ ತೆರಿದ್ ಬೈದ್ಂಡ್.
ಐನ್ ಜನ ದೋಸ್ತಿಲು ರಡ್ಡ್ ಟೂವೀಲರ್ಡ್ ಕೃಷ್ಣಾಪುರಕ್ ಪೋವೊಂದುಪ್ಪುನಗ ನಿಝಾಮ್ ಬೊಕ್ಕ ಮುರ್ಷಿದ್ ಇತ್ತಿನ ಗಾಡಿ ಪೆಟ್ರೋಲ್ ಕಾಲಿ ಆದ್ ಸಾದಿ ಬರಿಟ್ ಉಂತುದಿತ್ತೆರ್. ಕುಡೊಂಜಿ ಗಾಡಿಡಿತ್ತಿನ ದೋಸ್ತಿಲು ಪೆಟ್ರೋಲ್ ಕನಯೆರ ಪೆಟ್ರೋಲ್ ಪಂಪ್ಗ್ ಪೋದಿತ್ತೆರ್.
ಈ ಪೊರ್ತುಡು ಮುಟ್ಟದ ಬಾರ್ದಂಚಿರ್ದ್ ಮೊಕುಲಿತ್ತಿನಡೆ ಬತ್ತಿನ ನಾಲ್ವೆರ್ ಹನೀಫ್ ಗೊತ್ತುಂಡಾ ಪನ್ದ್ ಕೇನ್ದ್ ಪಾತೆರ ಸುರು ಮಲ್ದೆರ್ಗೆ. ಇಂಚೆನೇ ಪಾತೆರ್ದ್ ರಡ್ಡ್ ಕೂಟೊಲೆ ನಡುಟು ಪಾತೆರೊಗು ಪಾತೆರ ಬುಲೆದ್ ಅಕುಲು ಬೀಸತ್ತಿ ಪಾಡ್ದ್ ಪದ್ರಾಡಾತೆರ್ ಪನ್ದ್ ಗಡಿಕುಲಾತಿನಕುಲು ತೆರಿಪಾದೆರ್.
ಜಾಗೆಗ್ ತೊರ್ತಲ್ ಪೊಲೀಸ್ ನಿರೀಕ್ಷಕೆ ಪ್ರಮೋದ್ ಕುಮಾರ್ ಬೊಕ್ಕ ಸಿಬ್ಬಂದಿಲು ಬತ್ತ್ದ್ ಪರಿಶೀಲನೆ ಮಲ್ತಿತ್ತ್ದ್, ಆಸ್ಪತ್ರೆಗ್ ಪೋದು ಸಂತ್ರಸ್ತೆರೆ ಪಾತೆರ ರೆಕಾರ್ಡ್ ಮಲ್ತೊಂದೆರ್.
ನಡಕೆಗ್ ಸಂಬಂಧಿತ್ದ್ ತೊರ್ತಲ್ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್ ಪನ್ದ್ ವರದಿ ಆತ್ಂಡ್.