Last updated on October 24th, 2025 at 02:44 pm
ಸುಳ್ಯ, ಅ. 24: ತೆಂಕು ತಿಟ್ಟ್ದ ಟೆರಿಯ ಯಕ್ಷಗಾನ ಕಲಾವಿದೆ ಸುಳ್ಯದ ‘ರಂಗಮನೆ’ ತ ಎಜಮಾನೆ ಸುಜನಾ ಸುಳ್ಯ ಇನೌ ಶುಕ್ರವಾರ (ಅ.24) ಉಸಾರ್ದಾಂತೆ ಇತ್ತ್ದ್ ತೀರ್ದೆರ್. ಮೆರೆಗ್ 89 ವರ್ಸ ಪ್ರಾಯ ಆದಿತ್ತ್ಂಡ್.
ಸುಳ್ಯದ ಪುಗರ್ತೆದ ನಾವೂರು ಕುಟುಮೊಡು ಪುಟ್ಟಿನ ಸುಜನಾ ಮೇರ್ ನಾಟಕ ನಟೆ ಆದ್ ಕಸುಬು ಸುರು ಮಲ್ದಿನಾರ್. ಸಮ್ಮಲೆ ಕಾವು ಶ್ರೀನಿವಾಸ ರಾಯೆರೆ ಪ್ರೇರಣೆಡ್ ಯಕ್ಷಗಾನ ಕಲಾವಿದೆರಾದ್ ಬಳ್ಳಂಬೊಟ್ಟು, ಧರ್ಮಸ್ಥಳ, ಇರಾ ಸೋಮನಾಥೇಶ್ವರ, ಕುದ್ರೋಳಿ, ಕೊಡ್ಲು, ಆದಿ ಸುಬ್ರಹ್ಮಣ್ಯ, ಸುಂಕದಕಟ್ಟೆ, ಕಟೀಲ್ ಮೇಳೊಲೆಡ್ 36 ವರ್ಸ ಕಲಾ ಚಾಕಿರಿ ಮಲ್ತಿತ್ತೆರ್.
ಕುಸಾಲ್ದ ಪಾತ್ರೊಲೆಡ್ ವಿಶೇಷ ಪುದರ್ ಮಲ್ತಿತ್ತಿನ ಮೇರ್ ಮಾತಾ ರೀತಿದ ಸ್ತ್ರೀ, ಪುರುಷ ಪಾತ್ರೊಲೆನ್ ಎಡ್ಡೇನ ರೀತಿಡ್ ಮಲ್ತ್ದ್ ಕಲಾಭಿಮಾನಿಲೆ ಮೋಕೆ ಗೆಂದ್ದಿತ್ತೆರ್. ಹಿಮ್ಮೇಳೊಡ್ಲಾ ಮಾತಾ ವಿಭಾಗೊಲೆಡ್ ಚಾತುರ್ಪು ಇತ್ತಿನಾರಾದ್, ತಾಳಮದ್ದಲೆ ಅರ್ಥಧಾರಿಯಾದ್, ಪ್ರಸಾಧನ ತಜ್ಞೆರಾದ್ ಯಕ್ಷಗಾನೊದ ಪ್ರತಿ ವಿಭಾಗೊನ್ಲಾ ತೆರಿನ ಕಲಾವಿದೆ ಆದಿತ್ತೆರ್.
ಯಕ್ಷಗಾನ ಗುರುಕುಲಾದ್ ಸುಳ್ಯಡ್ ‘ವಿದೇಯದೇವಿ ನಾಟ್ಯಕಲಾ ಸಂಘ’ ಉಂಡು ಮಲ್ತ್ದ್, ರಂಗ ಮನೆತ ‘ಸುಜನಾ ಯಕ್ಷಗಾನ ಅಧ್ಯಯನ ಕೇಂದ್ರ’ದ ಮುಕೇನ ಪಾಕ ಜನೊತ ಯಕ್ಷಗಾನ ಕಲ್ಪಟಿಗೆಗ್ ನೆವನ ಆತಿನಾರ್. ಪಾಕ ಸನ್ಮಾನೊಲೆನ್ ಗೆಂದ್ದಿನ ಸುಜನಾ ಮೆರೆಗ್ 2008 ಡ್ ‘ಯಕ್ಷಗಾನ ಕಲಾರಂಗ ಪ್ರಶಸ್ತಿ’ ಮಾನಾದಿಗೆ ತಿಕ್ಕ್ಂಡ್. ಮೇರ್, ಮಗೆ ರಂಗಕರ್ಮಿ ಜೀವನರಾಂ ಸುಳ್ಯ ಬೊಕ್ಕ ಮಗಲರ್ಲೆನ್ ಅಗತ್ದೆರ್.