ಸುಳ್ಯ: ‘ಅರೆಭಾಷೆ ಗ್ರಾಮೋತ್ಸವದ ಮುಕೇನ ಅರೆಭಾಷಿಗೆರೆ ಸಂಸ್ಕೃತಿ ಒರಿಪುನ ಪುನೆಪು’ – ಸದಾನಂದ ಮಾವಜಿ

Last updated on October 27th, 2025 at 01:30 pm

ಸುಳ್ಯ, ಅ. 27: ಅರೆಭಾಷೆ ಗ್ರಾಮೋತ್ಸವದ ಮುಕೇನ ಅರೆಭಾಷಿಗೆರೆನ ಸಂಸ್ಕೃತಿ, ಸಂಪ್ರದಾಯ, ಕರಿಪುಲೆನ ಒರಿಪುಗು ಪುನೆಪ ಪನ್ದ್ ಕರ್ನಾಟಕ ಅರೆಭಾಷೆ ಸಂಸ್ಕೃತಿ ಬೊಕ್ಕ ಸಾಹಿತ್ಯ ಅಕಾಡೆಮಿ ಅಧ್ಯಕ್ಷೆ ಸದಾನಂದ ಮಾವಜಿ ಪನ್ಡೆರ್.

ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆ, ಕರ್ನಾಟಕ ಅರೆಭಾಷೆ ಸಂಸ್ಕೃತಿ ಬೊಕ್ಕ ಸಾಹಿತ್ಯ ಅಕಾಡೆಮಿದ ನಿರೆಲ್‌ಡ್ ಆಲೆಟ್ಟಿದ ಬಡ್ಡಡ್ಕ ರಾಮಕೃಷ್ಣ ಅನುದಾನಿತ ಪೆರಿಯ ಪ್ರಾಥಮಿಕ ಶಾಲೆಡ್ ಅ. 26 ತಾನಿ ನಡತಿನ ಅರೆಭಾಷೆ ಗ್ರಾಮೋತ್ಸವ 2025ತ ಉದಿಪನೊದ ಗುರ್ಕಾರ್ಮೆ ವಯಿತೊಂದು ಆರ್ ಪಾತೆರ್ಯೆರ್. ಸುಳ್ಯ ಗೌಡೆರೆ ಯುವ ಸೇವಾ ಸಂಘೊದ ಅಧ್ಯಕ್ಷೆ ಪುರುಷೋತ್ತಮ ಕೋಲ್ಟಾರ್ ಮೇರ್ ತುಡರ್ ಅರ್ಲಾದ್, ಕಳಸೆಗ್ ಬಾರ್ ದಿಂಜಾವುನ ಮುಕೇನ ಸಾಂಪ್ರದಾಯಿಕವಾದ್ ಗ್ರಾಮೋತ್ಸವದ ಉದಿಪನ ಮಲ್ತೆರ್.

ಆಲೆಟ್ಟಿ ಗೌಡ ಮಹಿಳಾ ಘಟಕೊದ ಅಧ್ಯಕ್ಷೆದಿ ಗೀತಾ ಕೋಲ್ಟಾರ್, ಗ್ರಾಮ ಪಂಚಾಯತ್ ಸದಸ್ಯೆದಿ ಭಾಗೀರಥಿ ಪತ್ತುಕುಂಜ, ಕಲ್ಲಪಳ್ಳಿ ಗ್ರಾಮ ಪಂಚಾಯತ್ ಸದಸ್ಯೆ ರಾಧಾಕೃಷ್ಣ ಆಲುಗುಂಜ, ಆಲೆಟ್ಟಿ ಗೌಡ ಘಟಕೊದ ಅಧ್ಯಕ್ಷೆ ಸತೀಶ್ ಕೊಯಿಂಗಾಜೆ ಸೇರ್ದ್ ಗಣ್ಯೆರ್ ಮಿತ್ತರ್ಮೆಡ್ ಇತ್ತೆರ್. ಆಲೆಟ್ಟಿ ಪಂಚಾಯತ್ ಮಾಜಿ ಸದಸ್ಯೆ ಹೇಮನಾಥ ಬಡ್ಡಡ್ಕ ಪ್ರಾಚೀನ ಸೊತ್ತುಲೆನ ಮಳಿಗೆದ ಉದಿಪನ ಮಲ್ತೆರ್.