Last updated on October 29th, 2025 at 11:09 am
ಬೊಲ್ತೇರ್, ಅ. 29: ಮಹೇಶ್ ಶೆಟ್ಟಿ ತಿಮರೋಡಿ ಗಡಿಪಾರು ಆದೇಶೊದ ವಿರುದ್ದ ಅಂಚೆನೇ ಪೊಲೀಸೆರ್ ಸೌಜನ್ಯಪರ ಪೊರ್ಮ್ಬಾಟಗಾರೆರೆ ಮಿತ್ತ್ ಕಲು ಪ್ರಕರಣ ದಾಕಲ್ತೊಂದುಲ್ಲೆರ್ ಪನ್ದ್ ಆರೋಪ ಮಲ್ತ್ದ್ ಬೊಲ್ತೇರ್ ತಹಶಿಲ್ದಾರ್ಗ್ ಬಿನ್ನಪು ಕೊರ್ಯೆರ ಬನ್ನಗ ಜನ ಸೇರ್ದಿನ ಆರೋಪಡ್ ಸೌಜನ್ಯನ ಅಪ್ಪೆ ಸೇರ್ದ್ 20 ರ್ದ್ಲಾ ಎಚ್ಚ ಜನತ ಮಿತ್ತ್ ಬೊಲ್ತೇರ್ ಪೊಲೀಸೆರ್ ಎಫ್ಐಆರ್ ಪಾಡ್ದೆರ್.
ಅಕ್ಟೋಬರ್ 27 ತಾನಿ ಮಹೇಶ್ ಶೆಟ್ಟಿ ತಿಮರೋಡಿ ಸೇರ್ದ್ ಸೌಜನ್ಯಾ ಪರ ಪೊರ್ಮ್ಬಾಟಗಾರೆರೆ ಮಿತ್ತ್ ಪೊಲೀಸೆರ್ ಕಲು ಪ್ರಕರಣ ದಾಕಲ್ತೊಂದುಲ್ಲೆರ್ ಪನ್ದ್ ಆರೋಪ ಮಲ್ತ್ದ್ ಸೌಜನ್ಯಾ ಪರ ಪೊರ್ಮ್ಬಾಟಗಾರೆರ್ ಬೊಲ್ತೇರ್ ತಹಶಿಲ್ದಾರ್ ಗ್ ಬಿನ್ನಪು ಕೊರ್ಯೆರ ಬತ್ತಿತ್ತೆರ್. ಈ ಪೊರ್ತುಡು ಪೊಲೀಸೆರ್ ಬೊಕ್ಕ ಪೊರ್ಮ್ಬಾಟಗಾರೆರೆ ನಡುಟು ಪಾತೆರೊಗು ಪಾತೆರಲಾ ಬುಲೆದಿತ್ತ್ಂಡ್. ಅಂಚೆನೇ ಪೊರ್ಮ್ಬಾಟೊಗು ಬೊಕ್ಕ ಜನ ಸೇರ್ಯೆರ ಪೊಲೀಸೆರ್ ಅವಕಾಶ ಇಜ್ಜಿ ಪನ್ದ್ ಪನ್ದಿತ್ತೆರ್. ಬೊಕ್ಕ ಬೊಲ್ತೇರ್ ತಾಲೂಕು ಕಚೇರಿದ ಸುತ್ತು ಮದೆಲ್ಡ್ ಅಕ್ರಮ ಕೂಟ ಸೇರ್ದ್ ಸಾರ್ವಜನಿಕೆರೆಗ್ ಅಂಚೆನೇ ಗಾಡಿಲೆನ ಸಂಚಾರೊಗು ಅಡ್ಡ ಬತ್ತ್ದೆರ್ ಪನ್ದ್ ಆರೋಪ ಪಾಡ್ದ್ ಪೊಲೀಸೆರ್ 20ರ್ದ್ಲಾ ಎಚ್ಚ ಜನತ ಮಿತ್ತ್ ಸುಮೊಟೊ ಪ್ರಕರಣ ದಾಕಲ್ತೊಂದೆರ್.
ಪೊರ್ಮ್ಬಾಟೊಗು ಅನು ಕೇನ್ದಿನ ಅನಿಲ್ಕುಮಾರ್ ಅಂತರ, ಪ್ರಜ್ವಲ್ ಗೌಡ, ಪ್ರದೀಪ್ ಕುಲಾಲ್, ಶ್ರೀನಿವಾಸ ಗೌಡ, ರವೀಂದ್ರ ಶೆಟ್ಟಿ, ಪ್ರಸನ್ನ ರವಿ, ಉದಯಪ್ರಸಾದ್, ಕುಸುಮಾವತಿ, ವೆಂಕಪ್ಪ ಕೋಟ್ಯಾನ್, ತನುಷ್ ಶೆಟ್ಟಿ, ಮೋಹನ್ ಶೆಟ್ಟಿ, ಜಯರಾಮ ಗೌಡ, ಸಂತೋಷ್ ಶೆಟ್ಟಿ, ಪ್ರಮೋದ್ ಶೆಟ್ಟಿ, ಯೋಗೇಶ್ ಕುಲಾಲ್, ನಾರಾವಿ ವಿಜಯ, ರವೀಂದ್ರ ಶೆಟ್ಟಿ, ಶಶಿಕಲಾ ಶೆಟ್ಟಿ, ಪೂಜಶ್ರೀ, ಟಿಕ್ಕಿ ರವಿ ಬೊಕ್ಕ ಬೇತೆಕ್ಲೆನ ಮಿತ್ತ್ ಪ್ರಕರಣ ದಾಕಲಾತ್ಂಡ್.
ಈ ನಡಕೆದ ಬಗೆಟ್ ಬೊಲ್ತೇರ್ ಎಎಸ್ಸೈ ದುರ್ಗಾದಾಸ್ ಬರೆಪಾದಿನ ಒಯಿಲ್ದ ಪ್ರಕಾರ ಅನುದಾಂತೆ, ಪೊಲೀಸೆರೆ ಸೂಚನೆಲೆನ್ ಗೆನ್ಪಂದೆ ಬೊಲ್ತೇರ್ ಮಿನಿವಿಧಾನ ಸೌಧದ ಸಾದಿ ಬೊಕ್ಕ ಮಿನಿ ವಿಧಾನ ಸೌಧದ ಎದುರು ಅಕ್ರಮವಾದ್ ಸೇರ್ದ್ ಸಾರ್ವಜನಿಕೆರೆಗ್ ತೊಂದರೆ ಉಂಡು ಮಲ್ತಿನ ಆರೋಪಡ್ ಪೊಲೀಸೆರ್ ಪ್ರಕರಣ ದಾಕಲ್ತೊಂದು, ಜಡ್ತೆ ಮಲ್ತೊಂದುಲ್ಲೆರ್.