Last updated on October 29th, 2025 at 02:06 pm
ಬೊಲ್ತೇರ್, ಅ. 29: ಇಂದಬೊಟ್ಟು ಗ್ರಾಮೊದ ಬೆದ್ರಬೊಟ್ಟು ಕೈತಲ್ ರಬ್ಬರ್ ತೋಟೊದ ಶೆಡ್ದುಲಯಿ ನಡತೊಂದಿತ್ತಿನ ಅಕ್ರಮ ಪೆತ್ತದ ಮಾಸ ಮಲ್ಪುನ ಅಡ್ಡೆಗ್ ದಾಳಿ ಮಲ್ದಿನ ಬೊಲ್ತೇರ್ ಪೊಲೀಸೆರ್ ಇರ್ವೆರ್ ಆರೋಪಿಲೆನ್ ಕೈದ್ ಮಲ್ತಿತ್ತ್ದ್, 91 ಕೆಜಿ ಪೆತ್ತದ ಮಾಸ ಬೊಕ್ಕ ಮಾಸ ಮಲ್ಪೆರ ಗಲಸೊಂದಿತ್ತಿನ ಸೊತ್ತುಲೆನ್ ವಶೊಕು ಗೆತೊಂದೆರ್.
ಕೈದಾತಿನಕ್ಲೆನ್ ಇಂದಬೊಟ್ಟು ಗ್ರಾಮೊದ ಬೆದ್ರೊಟ್ಟುದ ಅಬ್ದುಲ್ ನಝೀರ್ (36) ಬೊಕ್ಕ ಮಿತ್ತಬಾಕಿಲ್ ಗ್ರಾಮೊದ ಝಕಾರಿಯಾ (36) ಪನ್ದ್ ಗುರ್ತ ಪತ್ತ್ದೆರ್.
ನಿರೀಕ್ಷಕೆ ಸುಬ್ಬಪುರ್ ಮಠ ಮೆರೆನ ಮಾರ್ಗದರ್ಶನೊಡು, ಬೊಲ್ತೇರ್ ಪೊಲೀಸ್ ಸ್ಟೇಶನ್ದ ಪಿಎಸ್ಐ ಆನಂದ್ ಎಂ ಬೊಕ್ಕ ವೇಣೂರು ಪೊಲೀಸ್ ಸ್ಟೇಶನ್ದ ಪಿಎಸ್ಐ ವಾಮನ್ ತನ್ಕುಲೆ ಕೂಟೊದೊಟ್ಟುಗು ಈ ದಾಳಿ ಮಲ್ದೆರ್.
ಪೊಲೀಸ್ ಮೂಲೊಲೆ ಪ್ರಕಾರ, ಆರೋಪಿಲು ಪೆತ್ತೊಲೆನ್ ಕನ್ಡ್ದ್, ಅಕ್ರಮವಾದ್ ಕೆರ್ದ್ ಮಾಸ ಮಲ್ತ್ದ್ ಮಾರೊಂದಿತ್ತೆರ್. ಪತ್ತ ಒಲವು ಇತ್ತ್ದ್, ಪೊಲೀಸೆರ್ ಅಕ್ಟೋಬರ್ 27 ತಾನಿ ಮಧ್ಯಾಹ್ನ 2:30 ತ ಅಂದಾಜಿಗ್ ಜಾಗೆಗ್ ದಾಳಿ ಮಲ್ತ್ದ್, 91 ಕೆಜಿ ಪೆತ್ತದ ಮಾಸ, ಬೀಸತ್ತಿ ಬೊಕ್ಕ ಬೇತೆ ಸಂಬಂಧಿತಿನ ಸೊತ್ತುಲೆನ್ ವಶೊಕು ಗೆತೊಂದೆರ್.
ಬೊಲ್ತೇರ್ ಪೊಲೀಸ್ ಸ್ಟೇಶನ್ಡ್ ಕರ್ನಾಟಕ ಗೋವಧೆ ಪ್ರತಿಬಂಧಕ ಬೊಕ್ಕ ಜಾನುವಾರು ಸಂರಕ್ಷಣಾ ಅಧಿನಿಯಮ 2020 ತ ಅಡಿಟ್ ಪ್ರಕರಣ ದಾಕಲಾತ್ಂಡ್.