Last updated on November 3rd, 2025 at 11:38 am
ಬೊಲ್ತೇರ್, ನ. 03: ಬೊಲ್ತೇರ್ ತಾಲೂಕ್ದ ಕುದ್ರಡ್ಕ ಗ್ರಾಮೊಡು ಇಡೀ ಊರ್ಗ್ ಊರೇ ಬೊಲ್ಚುನ ನಡಕೆ ನಡತ್ದ್ಂಡ್. ಬಾರೀ ವಿಷ ನಂಜಿ ಇಪ್ಪುನ ಕಂದೊಡಿ, ಒಂಜೇ ಇಲ್ಲದ ಮೂವೆರ್ ಜೋಕುಲೆಗ್ ತುಚ್ಚಿದಿತ್ತ್ದ್, ನಾಟಿಬೈದ್ಯೆರೆ ಸಮಯಪ್ರಜ್ಞೆರ್ದಾವರ ಜೋಕುಲು ಬದ್ಕ್ದೆರ್.
ಸನಿಯಾರ ರಾತ್ರೆ ಸುಮಾರ್ 11:30 ದ ಅಂದಾಜಿಗ್ ಕುದ್ರಡ್ಕ ನಿವಾಸಿ ವಿಜಯ್ ಮಡೆಕ್ಕಿಲ ಪನ್ಪಿನಾರೆನ ಇಲ್ಲಡ್ ಈ ನಡಕೆ ನಡತ್ದ್ಂಡ್. ವಿಜಯೆರೆನ ಮಗೆ ದಕ್ಷಿತ್ ಬೊಕ್ಕ ಆರೆನ ಪಲಿನ ಜೋಕುಲು ವಿಶ್ಮಿತಾ ಬೊಕ್ಕ ಅನ್ವಿತಾ ಒಂಜೇ ಅದೆಟ್ ಜೆತ್ತುಪ್ಪುನಗ ಕಂದೊಡಿ ಒಂಜಿ ಉಲಯಿ ಪೊಗ್ಗುದುಂಡು. ದಕ್ಷಿತ್ನ ರಡ್ಡ್ ಕೈಕ್ಲಾ ಅಂಚೆನೇ ವಿಶ್ಮಿತಾ ಬೊಕ್ಕ ಅನ್ವಿತಾನ ಕೈಕ್ ತುಚ್ಚಿದಿತ್ತ್ದ್ ಜೋಕುಲು ಪೋಡಿಗೆಡ್ ಕಲ್ಕರೆ ಪತ್ತ್ದೆರ್.
ಕಂದೊಡಿ ತುಚ್ಚಿನ ತೂದು ಇಲ್ಲದಕುಲು ಅಪಗನೇ ಆಸ್ಪತ್ರೆಗ್ ಲೆತೊಂದು ಪೋಯೆರ ಪಿದಡ್ಯೆರ್, ಆಂಡ ಉಬಾರ್ ಗುರುವಾಯನಕೆರೆ ರೋಡ್ದ ಪರಿಸ್ಥಿತಿ ಈ ಪೋಡಿಗೆದ ನಡುಟು ಅಕ್ಲೆಗ್ ಬೊಕಲಾತ್ ಮಂಡೆಬೆಚ್ಚ ಉಂಡು ಮಲ್ದ್ಂಡ್. ಆ ರೋಡ್ಡೆ ಪೋಂಡ ಆಸ್ಪತ್ರೆಗ್ ಎತ್ತ್ನಗ ಕಡೆಸ್ಸ್ದ್ ದಾಲ ಎಚ್ಚಿಕಮ್ಮಿ ಆಯೆರಲಾ ಆವು ಪನ್ದ್ ಪೋಡಿದ್ ಅಕುಲು ತಣ್ಣೀರ್ಪಂತ ಗ್ರಾಮೊದ 77 ವರ್ಸ ಪ್ರಾಯೊದ ಪುಲಮರ್ದ್ ಬೈದ್ಯೆ ಸೂರಪ್ಪ ಪೂಜಾರ್ಲೆನ ಇಲ್ಲಗ್ ಪೋತೆರ್.
ನಡೀರ್ ಕಂದೊಡಿ ಮುಟ್ಟುದಿನ ಜೋಕುಲೆನ್ ತೂಯಿನ ಬೈದ್ಯೆರ್, ಪೊರ್ತು ಕಡೆಸ್ಸಾವಂದೆ ತನ್ನ ಪೆರಿಯಾಕ್ಲೆರ್ದ್ ಕಲ್ತೊಂದು ಬೈದಿನ ಮರ್ದ್ ಮಲ್ತ್ದ್ ಜೋಕುಲೆನ್ ಸಾವುದ ಬಾಯಿರ್ದ್ ತಪ್ಪಾದೆರ್. ಬೈದ್ಯೆ ಸೂರಪ್ಪ ಪೂಜಾರ್ಲೆನ ಬೇಲೆನ್ ಒರ್ಮೆಲಾ ಪುಗರೊಂದುಲ್ಲೆರ್.