Last updated on November 3rd, 2025 at 04:17 pm
ಕಾರ್ಲ, ನ. 03: ಕಾರ್ಲದ ಕುದುರೆಮುಖ ರಾಷ್ಟ್ರೀಯ ಉದ್ಯಾನವನೊದ ಕೆರೆಕಟ್ಟೆ ಪ್ರದೇಶೊಡು ಇರ್ವೆರ್ ಕೃಷಿಕೆರೆನ್ ಬಲಿ ಗೆತೊಂದಿನ ಕಾಡಾನೆನ್ ಅರಣ್ಯ ಇಲಾಖೆ ಎಂಚಾಂಡಲ ಮಲ್ತ್ ಯಶಸ್ವಿಯಾದ್ ಪತ್ತ್ದ್ಂಡ್. ಕರಿನ ರಡ್ಡ್ ದಿನೊರ್ದಿಂಚಿ ನಡತೊಂದಿತ್ತಿನ ಬರಸ್ದ ಕಾರ್ಯಾಚರಣೆದ ಬೆರಿಟೇ ಒಂಟಿ ಆನೆನ್ ಭಗವತಿ ನೇಚರ್ಕ್ಯಾಂಪ್ದ ಕೈತಲ್ ಕಾಡ್ಡ್ ಪತ್ಯೆರ್.
ಕುಡ್ಲದ ಫಾರೆಸ್ಟ್ ಸರ್ಕಲ್ ಬೊಕ್ಕ ಕುದುರೆಮುಖ ವನ್ಯಜೀವಿ ವಿಭಾಗೊದ ಅಧಿಕಾರಿಲೆನ ಮುತಾಲಿಕೆಡ್ ಈ ಕಾರ್ಯಾಚರಣೆ ನಡತ್ಂಡ್. ಶಿವಮೊಗ್ಗದ ಸಕ್ರೆಬೈಲ್, ಕೊಡಗುದ ದುಬಾರೆ ಬೊಕ್ಕ ನಾಗರಹೊಳೆದ ಆನೆ ಶಿಬಿರೊಲೆರ್ದ್ ಬತ್ತಿತ್ತಿನ ಟ್ರೈನ್ಡ್ ಕೂಟೊಲು ಅಂಚೆನೇ ಐನ್ ತರಬೇತಿ ಆತಿನ ಆನೆಲು ಈ ಕಾರ್ಯಾಚರಣೆಡ್ ತಾಂಗ್ ಕೊರ್ಯ.
ಡ್ರೋನ್ ಕ್ಯಾಮರಾಡ್ ಕುದುರೆಮುಖ ಗುಡ್ಡೆ ಜಾಗೆಡ್ ಒರ್ಮೆಲಾ ನಾಡ್ದೆರ್. ಕಾಂಡೆ ಭಗವತಿ ಕ್ಯಾಂಪ್ದ ಕೈತಲ್ ಆನೆ ತಿಕ್ಕ್ದಿತ್ತ್ದ್, ಪತ್ತ ಯೋಜನೆ ಪಾಡ್ದ್ ಐತಾರ ಬಯ್ಯಡ್ ಅವೆನ್ ಪತ್ತಿಯೆರ್. 50 ರ್ದ್ಲಾ ಎಚ್ಚ ಅರಣ್ಯಾಧಿಕಾರಿಲು ಬೊಕ್ಕ ಸಿಬ್ಬಂದಿ ಈ ಕಾರ್ಯಾಚರಣೆಡ್ ಪಾಲ್ಪಡೆದಿತ್ತೆರ್.
ಈ ಕಾಡಾನೆ ಇಂಚಿಪ ಕೆರೆಕಟ್ಟೆ ಮುಟ್ಟದ ಕೆರೆಗದ್ದೆಡ್ ಹರೀಶ್ ಶೆಟ್ಟಿ (44) ಬೊಕ್ಕ ಉಮೇಶ್ (48) ಪನ್ಪಿನ ಇರ್ವೆರ್ ಕೃಷಿಕೆರೆ ಮಿತ್ತ್ ದಾಳಿ ಮಲ್ತಿತ್ತ್ಂಡ್, ದಾಳಿಡ್ ಇರ್ವೆರ್ಲಾ ತೀರ್ದಿತ್ತೆರ್.
ಈ ನಡಕೆರ್ದ್ ಬೊಕ್ಕ ಅಲ್ಪದಕುಲು ಎಸ್ಕೆ ಬಾರ್ಡರ್ ಮುಚ್ಚಿದ್ ಮಲ್ಲ ಪೊರ್ಮ್ಬಾಟ ಮಲ್ತಿತ್ತೆರ್. ತೀರ್ದಿನಕ್ಲೆಗ್ ಗರಿಷ್ಠ ಪರಿಹಾರ ಕೊರೊಡು ಅಂಚೆನೇ ಆನೆನ್ ಪತ್ತೊಡು ಪನ್ದ್ ಆಗ್ರಹ ಮಲ್ತಿತ್ತೆರ್.
ಪತ್ತ್ದಿನ ಆನೆಗ್ ಮಲ್ಪೊಡಾಯಿನ ಮರ್ದ್ ಮಲ್ತ್ದ್ ಬೊಕ್ಕ ಅವೆನ್ ಬೇತೆ ಕಡೆಕ್ ಕೊನೊಪುನ ಬಗೆಟ್ ನಿರ್ಧಾರ ಗೆತೊನುವ ಪನ್ದ್ ಅರಣ್ಯ ಇಲಾಖೆದ ಮೂಲೊಲು ತೆರಿಪಾದ.