Last updated on November 8th, 2025 at 05:32 pm
ಹಮೀರ್ಪುರ, ಉತ್ತರ ಪ್ರದೇಶ, ನ. 08: ಪದಿನಾಲ್ ವರ್ಸೊದ ಆಣ್ ಒರಿ 40 ವರ್ಸ ಪ್ರಾಯೊದ ಪೊಂಜೊವುನ ಮಿತ್ತ್ ಲೈಂಗಿಕ ದೌರ್ಜನ್ಯ ಮಲ್ದಿನ ನಡಕೆ ಉತ್ತರ ಪ್ರದೇಶೊದ, ಹಮೀರ್ಪುರಡ್ ನಡತ್ದ್ಂಡ್. ಪೊಂಜೊವು ಸಹಕರಿಪಂದಿನೆಕ್ ತಾರಾಮರ ಆಕ್ದ್ ಕೆರ್ದ್ ಪಾಡ್ದೆ ಪನ್ದ್ ವರದಿ ಆತ್ಂಡ್. ಪೊಲೀಸೆರ್ ಕೊರ್ತಿನ ಒಲವುದ ಪ್ರಕಾರ, ನವೆಂಬರ್ 3 ತಾನಿ ಈ ನಡಕೆ ನಡತ್ದ್ಂಡ್. ಕಂಡೊಡು ಪನ್ತಿ ಪೆರೆಯೊಂದುಪ್ಪುನಗ 9 ನೇ ಕ್ಲಾಸ್ದ ಆಣ್ ಪೊಂಜೊವುನ ಮಿತ್ತ್ ಹಲ್ಲೆ ಮಲ್ತ್ದೆ.
ಆ ಆಣ್ ಆರೆನ ಮಿತ್ತ್ ಲೈಂಗಿಕ ದೌರ್ಜನ್ಯ ಮಲ್ಪೆರ ತೂನಗ ಆರ್ ವಿರೋಧಿತ್ದೆರ್. ಬೊಕ್ಕ ಕತ್ತಿ ಬೊಕ್ಕ ಸೋಂಟೆಡ್ ಆರೆನ ಮಿತ್ತ್ ಹಲ್ಲೆ ಮಲ್ತ್ದ್ ಗಾತಿದ ಗಡಿ ಮಲ್ತ್ದೆ ಪನ್ದ್ ಆರೋಪ ಉಂಡು.
ಕಂಡೊಡು ಪಾಕ ನೆತ್ತೆರ್ ಪೋದು ಬೂರ್ದಿತ್ತಿನಾರೆನ್ ಊರುದಕುಲು ತೂದು ಮುಟ್ಟದ ಆಸ್ಪತ್ರೆಗ್ ಲೆತೊಂದು ಪೋತೆರ್. ಬೊಕ್ಕ ಆರೆನ್ ಚಂಡೀಗಢದ ಆಸ್ಪತ್ರೆಗ್ ಲೆತೊಂದು ಪೋತೆರ್, ಆಂಡ ಬುಧವಾರ ರಾತ್ರೆ ಮರ್ದ್ ಪಲಿಪಂದೆ ಆರ್ ತೀರ್ದೆರ್.
ನಡಕೆ ನಡತಿನ ಜಾಗೆರ್ದ್ ಪೊಲೀಸೆರ್ ಒಂಜಿ ಕತ್ತಿ, ಸೋಂಟೆ ಬೊಕ್ಕ ಪೆನ್ನ್ದ ತುಂಡುನು ವಶೊಕು ಗೆತೊಂದೆರ್. ವಿಚಾರಣೆದ ಪೊರ್ತುಡು, ಅಪ್ರಾಪ್ತೆ ಆಣ್ ತಾನೇ ದಾಳಿ ಮಲ್ದೆ ಪನ್ದ್ ಒತ್ತೊಂದೆ ಪನ್ದ್ ವರದಿ ಆತ್ಂಡ್. ತನ್ನ 17 ವರ್ಸ ಪ್ರಾಯೊದ ಅಂಗವಿಕಲ ಮಗನ್ ತಾಂಕೊಂದಿತ್ತಿನ ಆ ಪೊಂಜೊವು, ಅಕ್ಲೆನ ಇಲ್ಲದ ಒರ್ತೇ ಆಧಾರ ಆದಿತ್ತೆರ್.
ಅಪ್ರಾಪ್ತೆ ಆರೋಪಿ ಕೈದ್ಡ್ ಉಲ್ಲೆ ಅಂಚೆನೇ ಎಚ್ಚಿನ ಜಡ್ತೆ ನಡತೊಂದುಂಡು ಪನ್ದ್ ಹಮೀರ್ಪುರ ಪೊಲೀಸ್ ವರಿಷ್ಠಾಧಿಕಾರಿ ರಾಜೇಶ್ ಉಪಾಧ್ಯಾಯೆ ತೆರಿಪಾದೆರ್.