Last updated on November 17th, 2025 at 04:54 pm
ಕುಡ್ಲ, ನ. 17: ಹುರುನ್ ರೀಸರ್ಚ್ ಪ್ರಕಟ ಮಲ್ದಿನ ಇಂಡಿಯಾ ರಿಚ್ ಲಿಸ್ಟ್ 2025 ದ ಪ್ರಕಾರ ಭಾರತೊದ ಮಾಮಲ್ಲ ಶ್ರೀಮಂತ ಮಹಿಳಾ ಉದ್ಯಮಿಲೆನ ಪಟ್ಟಿಡ್ ಕುಡ್ಲಡ್ ಪುಟ್ಟಿನ ಟೆಕ್ ಲೀಡರ್ ಜಯಶ್ರೀ ಉಳ್ಳಾಲ್ ಮೇರ್ 50,170 ಕೋಟಿ ರೂ. ಆಸ್ತಿ ಇತ್ತ್ದ್ ಕಡೀರ ತಾನೊಡು ಉಲ್ಲೆರ್.
ಜಯಶ್ರೀ ಉಳ್ಳಾಲ್ 2008 ರ್ದ್ ಕಂಪ್ಯೂಟರ್ ನೆಟ್ವರ್ಕಿಂಗ್ ಸಂಸ್ಥೆ ಆಯಿನ ಅರಿಸ್ಟಾ ನೆಟ್ವರ್ಕ್ಸ್ದ ಅಧ್ಯಕ್ಷೆದಿ ಅಂಚೆನೇ ಸಿಇಒ ಆದುಲ್ಲೆರ್. ಸಾರ್ವಜನಿಕವಾದ್ ವೈವಾಟ್ ಮಲ್ಪುನ ಕಂಪೆನಿಯಾಯಿನ ಅರಿಸ್ಟಾ ನೆಟ್ವರ್ಕ್ಸ್ ಕರಿನ ವರ್ಸ 7 ಬಿಲಿಯನ್ ಡಾಲರ್ದಾತ್ ಆದಾಯ ಮಲ್ತಿತ್ತ್ದ್, ವೆರ್ದ್ ದುಂಬುದ ವರ್ಸೊರ್ದು ಶೇ 20 ದಾತ್ ಎಚ್ಚ ಆತ್ಂಡ್.
ಜಯಶ್ರೀ ಉಳ್ಳಾಲ್ ಮೇರ್ 5 ವರ್ಸೊಗು ದುಂಬು ಸಾರ್ವಜನಿಕವಾದ್ ಬುಡುಗಡೆ ಆತಿನ ಕ್ಲೌಡ್ ಕಂಪ್ಯೂಟಿಂಗ್ ಕಂಪನಿಯಾಯಿನ ಸ್ನಪ್ಲೇಕ್ದ ನಿರ್ದೇಶಕೆರೆ ಮಂಡಳಿಡ್ ಉಲ್ಲೆರ್ ಅಂಚೆನೇ ಆರೆಡ ಅರಿಸ್ಟಾದ ಸುಮಾರ್ 3% ಷೇರ್ಲಾ ಉಂಡು. ಫೋರ್ಬ್ಸ್ ಪ್ರಕಾರ, ಆರ್ ದುಂಬು ಸಿಸ್ಕೋ ಸಿಸ್ಟಮ್ಸ್, ಸೆಮಿಕಂಡಕ್ಟರ್ ಸಂಸ್ಥೆ ಅಡ್ವಾನ್ಸ್ ಮೈಕ್ರೋ ಡಿವೈಸಸ್ ಬೊಕ್ಕ ಫೇರ್ಚೈಲ್ಡ್ ಸೆಮಿಕಂಡಕ್ಟರ್ಡ್ ಬೇಲೆ ಮಲ್ದೆರ್.
ಜಯಶ್ರೀ ಉಳ್ಳಾಲ್ ಮೇರ್ ಗೌಡ ಸಾರಸ್ವತ ಬ್ರಾಹ್ಮಣೆರೆಡ್ ಸ್ಮಾರ್ತ ಸಂಪ್ರದಾಯೊನು ಪಾಲಿಪುನ ಕುಡ್ಲ ಮೂಲೊದ ಚಿತ್ರಾಪುರ ಸಾರಸ್ವತ ಬ್ರಾಹ್ಮಣ ಸಮುದಾಯೊದ ಪುಗರ್ತೆದ ಇಲ್ಲಗ್ ಸೇರ್ದಿನಾರ್.
ಟಾಪ್ 10 ಡ್ ಉಲ್ಲೆರ್ ತುಳುನಾಡ ಮರ್ಮಲ್
5,130 ಕೋಟಿ ರೂಪಾಯಿ ಆಸ್ತಿದೊಟ್ಟುಗು ತುಳುನಾಡ ಮರ್ಮಲ್ ಇಂದ್ರಾ ನೂಯಿ ಮೇರ್ 8ನೇ ತಾನೊಡು ಉಲ್ಲೆರ್. ಪೆಪ್ಸಿಕೋದ ಮಾಜಿ ಅಧ್ಯಕ್ಷೆದಿ ಬೊಕ್ಕ ಸಿಇಒ ಆದಿಪ್ಪುನ ಮೇರ್, 24 ವರ್ಸ ಬೇಲೆ ಮಲ್ದೆರ್. ಪೆಪ್ಸಿಕೋ ಡ್ ಬೇಲೆ ಮಲ್ಪುನಗ ಆರೆಗ್ ತಿಕ್ಕಿನ ಸ್ಟಾಕ್ರ್ದ್ ಆರ್ ಈ ಸಂಪೊತ್ತ್ ಮಲ್ದೆರ್.
