Last updated on November 25th, 2025 at 09:31 am
ಒಡಿಪು : ಒಡಿಪು ಜಿಲ್ಲೆದ ಶ್ರೀ ಮಹಾಲಕ್ಷ್ಮೀ ಬ್ಯಾಂಕ್ದ ಮಲ್ಪೆ ಶಾಖೆಡ್ ಫೋರ್ಜರಿ ಸೈನ್ಗ್ ಕೊರ್ತಿನ ಕಡ ಕ್ ಸಂಬಂಧಿತ್ದ್ ಜಡ್ತೆ ಮಲ್ತ್ದ್ ಕ್ರಮ ಗೆತೊನರೆ ಸಂತ್ರಸ್ತೆರ್ ಆಗ್ರಹ ಮಲ್ದೆರ್.
ಶ್ರೀ ಮಹಾಲಕ್ಷ್ಮೀ ಕೋ ಆಪರೇಟಿವ್ ಬ್ಯಾಂಕ್ದ ಒಡಿಪು ತಾಲೂಕು ಸಂತ್ರಸ್ತೆರೆ ಸಮಿತಿದ ಮುತಾಲಿಕೆಡ್ ಸೋಮಾರ ಒಡಿಪು ಸಹಕಾರ ಇಲಾಖೆದ ಉಪನಿಬಂಧಕೆದಿಗ್ ಬಿನ್ನಪು ಸಂದಾಯೆರ್.
ಶ್ರೀಮಹಾಲಕ್ಷ್ಮೀ ಬ್ಯಾಂಕ್ ಮಲ್ಪೆ ಶಾಖೆಡ್ ಕೋವಿಡ್ ಪೊರ್ತುಡು ಕೋವಿಡ್ ಸಾಲಮೇಳ ಪನ್ಪಿ ಯೋಜನೆದ ಅಡಿಟ್ ಸಾರ್ವಜನಿಕೆರೆಗ್ ಕ್ಯಾಶ್ ರೂಪೊಡು ಕಡ ಕೊರ್ದಿತ್ತ್ದ್, ಆ ಕಡನ್ ಒಂಜಿ ವರ್ಸ ಕರಿದ್ ಕಟ್ಟೊಡಿತ್ತ್ಂಡ್. ಆಂಡ ಈ ಯೋಜನೆಡ್ ಕಮ್ಮಿ ಪ್ರಮಾಣೊದ ಕಡ ಗೆತೊಂದಿನಕ್ಲೆನ ಕಡನ್ 2ಲಕ್ಷ ರೂಪಾಯಿ ಪನ್ದ್ ತಿದ್ದ್ದ್ ಇತ್ತೆ ಅಸಲ್ ಬೊಕ್ಕ ಬಡ್ಡಿ ಸೇರ್ದ್ 3 ಲಕ್ಷರ್ದ್ ಎಚ್ಚ ಕಾಸ್ ಕಟ್ಟೆರೆ ನೋಟಿಸ್ ಕೊರ್ತೆರ್.
ಈ ಬಗೆಟ್ ಬ್ಯಾಂಕ್ಡ್ ವಿಚಾರಿತ್ದ್ ಕಡ ಓಲೆಲೆನ್ ಪರಿಶೀಲಿಪುನಗ ಅವೆಟ್ ಫೋರ್ಜರಿ ಸೈನ್ ಗಲಸ್ದ್ ಎಚ್ಚಿಗೆ ಕಾಸ್ ಕೊರ್ತುಂಡು ಪನ್ದ್ ಬರೆದ್ ಕಲುಗಲಕೆ ಮಲ್ತೊಂದಿನ ತೆರಿದ್ ಬೈದ್ಂಡ್. ಬೊಕ್ಕ ಬ್ಯಾಂಕ್ ಕಡ ಓಲೆಡಿತ್ತಿನ ಫೋರ್ಜರಿ ಸೈನ್ರ್ದಾವರ ಅನ್ಯಾಯ ಆತಿನ ಸಂತ್ರಸ್ತೆರ್ ಒಟ್ಟಾದ್ ಪೊರ್ಮ್ಬಾಟ ಮಲ್ತ್ದ್ ನ್ಯಾಯ ದೆಪ್ಪಾದ್ ಕೊರ್ಯೆರ ಸರಕಾರೊದ ಗುಮನೊಗು ಕನತ್ದ್ ಒತ್ತಾಯ ಮಲ್ಪುನಗ ಸರಕಾರ ಈ ವಿಷಯೊದ ಬಗೆಟ್ ನಿಯಮ 64ತ ಅಡಿಟ್ ಸಹಕಾರ ಇಲಾಖೆ ಉಪನಿಬಂಧಕೆರ್ ಜಡ್ತೆ ಮಲ್ಪೆರೆ ಆದೇಶ ಕೊರ್ದಿತ್ತ್ಂಡ್.
ಈ ಜಡ್ತೆದ ಆದೇಶ ಆದ್ ವರ್ಸ ಒಂಜಿ ಕರೀಂಡಲಾ ಈತ್ನೇಟ ನ್ಯಾಯ ತಿಕ್ಕ್ದಿಜಿ. ಈ ಜಡ್ತೆದ ವರದಿ ಬಾಕಿ ಇತ್ತ್ಂಡಲಾ ಬ್ಯಾಂಕ್ದಕುಲು ವಸೂಲಾತಿಗ್ ಇಲ್ಲ್ ಜಪ್ತಿ, ಆಸ್ತಿ ಜಪ್ತಿ ಬೊಕ್ಕ ಚೆಕ್ ಪಾಡುನು ಪನೊಂದು ಸಂತ್ರಸ್ತೆರೆನ್ ಕಾನೂನುದ ನೆವವ ಕೊರ್ದು ಪೋಡಿಕಟ್ಟಾವೊಂದುಲ್ಲೆರ್. ಈ ಜಡ್ತೆ ಪತ್ತ ಆದ್ ವರದಿ ಬರ್ಪಿನೇಟ ಎಂಕ್ಲೆಗ್ ಕಡ ಕಟ್ಟೆರ ಕಿರುಕುಳ ಕೊರಂದಿಲೆಕ ಬೋಡಾಪಿನ ಕ್ರಮ ಗೆತೊನೊಡು ಪನ್ದ್ ಸಂತ್ರಸ್ತೆರ್ ಆಗ್ರಹ ಮಲ್ತ್ದೆರ್.