Last updated on November 26th, 2025 at 12:37 pm
ಒಡಿಪು ನ. 26: ಪರ್ಯಾಯ ಶ್ರೀ ಪುತ್ತಿಗೆಮಠ ಶ್ರೀ ಕೃಷ್ಣಮಠೊಟು ಮಾಮಲ್ಲ ಗೀತೋತ್ಸವೊದ ಲೆಕ್ಕೊಡು ನವೆಂಬರ್ 28ದಾನಿ ನಡಪುನ ಲಕ್ಷಕಂಠ ಗೀತಾ ಪಾರಾಯಣೊಗು ಪ್ರಧಾನಿ ನರೇಂದ್ರ ಮೋದಿಯೆರ್ ಬರೊಂದಿತ್ತ್ದ್, ಆ ಪೊರ್ತುಡು ಬನ್ನಂಜೆರ್ದ್ ಕಲ್ಸಂಕ ಜಂಕ್ಷನ್ ಮುಟ್ಟ ರೋಡ್ ಶೋ ಮಲ್ಪುವೆರ್ ಪನ್ದ್ ತೆರಿದ್ ಬೈದ್ಂಡ್.
ಈ ಬಗೆಟ್ ಒಡಿಪು ಬಿಜೆಪಿ ಜಿಲ್ಲಾಧ್ಯಕ್ಷೆ ಕುತ್ಯಾರ್ ನವೀನ್ ಶೆಟ್ಟಿ ಮೇರ್ ಒಲವು ಕೊರ್ದಿತ್ತ್ದ್, ಕಾಂಡೆ 11:40 ಗ್ ಪ್ರಧಾನಿ ಮೋದಿಯೆರೆನ ರೋಡ್ ಶೋ ಒಡಿಪು-ಬನ್ನಂಜೆ ಡಾ.ವಿ.ಎಸ್. ಆಚಾರ್ಯ ಬಸ್ ಉಂತಡೆದ ಕೈತಲ್ ಶ್ರೀ ನಾರಾಯಣ ಗುರು ಸರ್ಕಲ್ರ್ದ್ ಪಿದಡ್ದ್ ಸಿಟಿ ಬಸ್ ಸ್ಟ್ಯಾಂಡ್ ಆದ್ ಕಲ್ಸಂಕ ಜಂಕ್ಷನ್ ಮುಟ್ಟ ಪೋಪುಂಡು ಪನ್ದ್ ಪನ್ತೆರ್.
ಕಲ್ಸಂಕ ಸಾದಿರ್ದ್ ಸೀದಾ ಪಾರ್ಕಿಂಗ್ ಏರಿಯಾ-ರಥಬೀದಿ ಆದ್ ಮಧ್ಯಾಹ್ನ 12 ಗಂಟೆ ಗ್ ಶ್ರೀ ಕೃಷ್ಣ ಮಠ ಎತ್ತ್ದ್, ಶ್ರೀ ಕೃಷ್ಣನ ದರ್ಶನ ಗೆತೊನುವೆರ್. ಬೊಕ್ಕ ಲಕ್ಷ ಕಂಠ ಗೀತಾ ಪಾರಾಯಣಡ್ ಪಾಲ್ಪಡೆದ್ ಸಾರ್ವಜನಿಕ ಸಭೆನ್ ಉದ್ದೇಶಿತ್ದ್ ಪಾತೆರುವೆರ್.
ಪ್ರಧಾನಿ ಮೋದಿಯೆರೆನ್ ಎದುಕೊನರೆ ಒಡಿಪು ಜಿಲ್ಲಾ ಬಿಜೆಪಿರ್ದ್ ಮಾತಾ ರೀತಿದ ವ್ಯವಸ್ಥೆ ಆತ್ಂಡ್. ರೋಡ್ ಶೋ ಮಾರ್ಗೊಡು, ಸಾಂಸ್ಕೃತಿಕ ಕೂಟೊಲು ಯಕ್ಷಗಾನ, ಪಿಲಿ ನಲಿಕೆ ಕೂಟೊಲು ಬೊಕ್ಕ ಶ್ರೀಕೃಷ್ಣನ ಏಸ ಪಾಡ್ದ್ ಕಲಾವಿದೆರ್ ಅಂಚೆನೇ ತುಳುನಾಡ ಕಲಾ ಪ್ರಕಾರೊಲೆನ ಪ್ರದರ್ಶನ ಆವರೆಗುಂಡು.
ಸಾದಿದ ಒಂಜಿ ಮೆಯಿಟ್ ಬ್ಯಾರಿಕೇಡ್ಲೆನ್ ಪಾಡ್ದಿತ್ತ್ದ್, ಪ್ರಧಾನಿನ್ ಎದುಕೊನ್ರೆ 30,000 ರ್ದ್ಲಾ ಎಚ್ಚ ಜನ ಸಾಲ್ಕಟ್ಟ್ದ್ ಉಂತುನ ನಿರೀಕ್ಷೆ ಉಂಡು. ರೋಡ್ ಶೋ ತೂಪುನ ಮಾತಾ ನಾಗರಿಕೆರ್ ನ.28 ಶುಕ್ರವಾರ ಕಾಂಡೆ 10:30ದ ಉಲಯಿ ಬನ್ನಂಜೆ-ಕಲ್ಸಂಕ ಸಾದಿದ ರಡ್ಡ್ ಮೆಯಿಟ್ಲಾ ಇಪ್ಪೊಡು ಪನ್ದ್ ಕೇನೊನ್ದೆರ್.