Last updated on November 26th, 2025 at 03:07 pm
ಕುಂದಾಪುರ, ನ. 26 : ಪುಗರ್ತೆದ ಯಕ್ಷಗಾನ ಪ್ರಸಂಗಕರ್ತೆ ಅಂಚೆನೇ ನಿವೃತ್ತ ಶಿಕ್ಷಕೆ ಕಂದಾವರ ರಘುರಾಮ ಶೆಟ್ಟಿ (89) ಮೇರ್ ನವೆಂಬರ್ 26ತ ಬುಧವಾರ ಕಾಂಡೆ ತೀರ್ಯೆರ್.
ಕುಂದಾಪುರ ತಾಲೂಕ್ದ ಬಳ್ಕೂರ್ ಗ್ರಾಮೊದ ಕಂದಾವರಡ್ 1936 ಟ್ ಕರ್ಕಿ ಸದಿಯಣ್ಣ ಶೆಟ್ಟಿ ಬೊಕ್ಕ ಕಂದಾವರ ಪುಟ್ಟಮ್ಮ ದಂಪತಿಲೆಗ್ ಪುಟ್ಟಿನ ರಘುರಾಮ ಶೆಟ್ಟಿ, ಕಂಡ್ಲೂರ್ದ ನೇತಾಜಿ ಪೆರಿಯ ಪ್ರಾಥಮಿಕ ಶಾಲೆಡ್ ಸುಮಾರ್ 35 ವರ್ಸ ಸಕಾಯಕ ಶಿಕ್ಷಕೆರಾದ್ ಅವೆರ್ದ್ ಬೊಕ್ಕ ಮುಖ್ಯೋಪಾಧ್ಯಾಯೆರಾದ್ ಬೇಲೆ ಮಲ್ದಿನಾರ್. ಮೆರೆನ ಸೇವಾ ಅವಧಿಡ್ ಮೆರೆಗ್ ‘ಮಾದರಿ ಶಿಕ್ಷಕ’ ಪ್ರಶಸ್ತಿ ತಿಕ್ಕ್ದಿತ್ತ್ಂಡ್.
ಯಕ್ಷಗಾನ ಕ್ಷೇತ್ರೊಡು ‘ಕಂದಾವರ’ ಪನ್ಪಿ ಪುದರ್ಡೇ ಪುದರಾತಿನ ರಘುರಾಮ ಶೆಟ್ರ್ ಅರ್ಥಧಾರಿ, ವೇಷಧಾರಿ, ನಾಟಕ ಕಲಾವಿದೆ ಬೊಕ್ಕ ಮಾತೆರ್ದ್ ಎಚ್ಚಾದ್ ಬಾರೀ ಗೌರವಾನ್ವಿತ ಪ್ರಸಂಗಕರ್ತೆರಾದ್ ಪುಗರ್ತೆ ಪಡೆತಿನಾರ್. ಜೋಕ್ಲೆನ ಯಕ್ಷಗಾನೊಡು ಆರೆನ ವಿದ್ಯಾರ್ಥಿ ದಿನೊಟು ಯಕ್ಷಗಾನೊದ ಒಟ್ಟುಗು ಸಂಬಂಧ ತೊಡಂಗ್ಂಡ್. ಬೊಕ್ಕ ಆರ್ ಕುಂದಾಪುರದ ಪುಗರ್ತೆದ ವಕೀಲೆ ಅಂಚೆನೇ ಯಕ್ಷಗಾನ ಮೇಳೊದ ಪೋಷಕೆರಾಯಿನ ದಿವಂಗತ ಎಂಎಎಂ ಹೆಗ್ಡೆರೆನ ಮುತಾಲಿಕೆದ ಕೂಟೊಡು ಪ್ರದರ್ಶನ ಕೊರ್ಯೆರ್.
ಮೇರ್ ಪಾಕ ಪುಗರ್ತೆದ ಕಲಾವಿದೆರೊಡಪ್ಪ ಪ್ರದರ್ಶನ ಕೊರ್ತೆರ್ ಅಂಚೆನೇ ತಾಳಮದ್ದಳೆಡ್ಲಾ ಪುದರ್ ಪಡೆತಿನಾರ್. 1978 ರ್ದ್ ಕಂದಾವರ ರಘುರಾಮ ಶೆಟ್ರ್ ಪ್ರಸಂಗಕರ್ತೆರಾದ್ ಯಕ್ಷಗಾನ ಕ್ಷೇತ್ರೊಗು ಕೊರ್ಪುಗೆ ಕೊರ್ತೆರ್. ಆರೆನ ಚೆಲುವೆ ಚಿತ್ರಾವತಿ, ರತಿ ರೇಖಾ, ಶ್ರೀ ದೇವಿ ಬನಶಂಕರಿ ಬೊಕ್ಕ ಶೂದ್ರ ತಪಸ್ವಿನಿ ಇಂಚಿನ ಪ್ರಸಂಗೊಲು ಜನೊಕ್ಲೆಗ್ ಬಾರೀ ಇಷ್ಟ ಆತಿನವು. ಆರ್ ತನ್ನ ಅಕೇರಿದ ದಿನೊಕ್ಲೆನ್ ನೂಜಾಡಿಡ್ ಕರಿತೆರ್.