Last updated on November 29th, 2025 at 09:53 am
ಒಡಿಪು, ನ. 28: ಸಿರಿ ಕಿಟ್ಣನ ಊರು ಒಡಿಪುಗು ಬತ್ತಿನ ದೇಶೊದ ಪ್ರಧಾನಿ ನರೇಂದ್ರ ಮೋದಿಯೆರ್ ಕಿಟ್ಣನ ಒರುನು ಕಣ್ಣ್ ದಿಂಜಾವೊಂದು ಪುಗರ್ತೆದ ಕನಕನ ಕಂಡಿ(ಕಿಂಡಿ) ಗ್ ಪೊಸತಾದ್ ಮಾಜಿ ಸಚಿವೆ ಪ್ರಮೋದ್ ಮಧ್ವರಾಜೆರ್ ಮುಚ್ಯಾದಿನ ಬಂಗಾರ್ದ ಕವಚೊನು ಲೋಕಾರ್ಪಣೆ ಮಲ್ತ್ದೆರ್. ಅವ್ವೇ ಕನಕನ ಕಿಂಡಿ ದ ಮಿತ್ತ್ ಮೂಜಿ ಮೂಜಿ ಬಗೆತ ಅಕ್ಷರೊಡು ಮಲ್ಲೆಟ್ ‘ಕನಕನ ಕಿಂಡಿ’ ಪನ್ದ್ ಬರೆತೆರ್. ಸುರೂತ ರಡ್ಡ್ ಕನ್ನಡ ಬೊಕ್ಕ ಇಂಗ್ಲೀಷ್. ಅಕೇರಿದ ನಮ್ಮ ತುಳು ಲಿಪಿ.
ಪ್ರಮೋದ್ ಮಧ್ವರಾಜೆರೆ ಉಮೇದ್ಡ್ ಲೋಕತೂಪಿ ಈ ಪಲವೆಡ್ ತುಳುಲಿಪಿಕ್ಲಾ ಜಾಗೆ ತಿಕ್ಕ್ದ್ಂಡ್. ತುಳುಕೊಂಜಿ ಲಿಪಿ ಉಂಡು ಪನ್ಪಿ ಲೋಕೊಗು ಬೊಟ್ಟುದ್ ಬೊಟ್ಟುದ್ ಪನ್ಯೆರ ಎಡ್ಡೆ ಮಿತ್ತರ್ಮೆ ತಿಕ್ಕ್ದ್ಂಡ್. ನನಲಾ ಏತೋ ಜನ ತುಳುವೆರೆಗೇ ತುಳುಕೊಂಜಿ ಲಿಪಿ ಉಂಡು, ನಮ್ಮ ಪಿರಾಕ್ದ ಸಾಹಿತ್ಯೊಲೆನ್ ಆ ಲಿಪಿಟೇ ಬರೆಪೆದೆರ್ ಪನ್ಪಿ ಕನಿಷ್ಟ ಗೇನೊಲಾ ಇಜ್ಜಾಂದಿನ ನಿಜವಾದ್ ಬೆಸರ್ ಕನಪುಂಡು. ದಾಲ ಆವಡ್, ತುಳುಲಿಪಿನ್ ಪಲವೆಡ್ ಗಲಸ್ದ್ ತುಳುಲಿಪಿತ ಕಮ್ಮೆನ ಲೋಕೊರ್ಮೆ ಪಟ್ಟೆರೆ ಸಕಾಯ ಮಲ್ದಿನ ಪ್ರಮೋದ್ ಮಧ್ವರಾಜೆರೆಗ್ ಅಂಚೆನೇ ಶ್ರೀಕೃಷ್ಣ ಮಠೊಕು ಸೊಲ್ಮೆ ಸಂದಾವ. ಅಂಚೆನೇ ತುಳುನಾಡ್ಡ್ ನನಲಾತ್ ಜಾಗೆಲೆಡ್, ದೇಲಂತಡೆಲೆಡ್, ಮಂದಿರ, ಪಲ್ಲಿ, ಇಗರ್ಜಿಲೆಡ್ ಈ ಮಣ್ಣ್ಡ್ ಬುಲೆಯಿನ ಲಿಪಿ ತೂಪುಲೆಕ ಆವಡ್ ಪನ್ದ್ ಬಾಮ್ಯೊನುವ..
ಕೃಷ್ಣಮಠೊಟು ಉಂದು ಮಾತ್ರ ತುಳು ಲಿಪಿತ ಪಲವೆ ಅತ್ತ್, ಮಠೊಕು ಪೊಗ್ಗುನಲ್ಪಲಾ ಬಾಕಿಲ್ಡ್ ಪೊರ್ಲಡು “ಶ್ರೀಕೃಷ್ಣಮಠ ಒಡಿಪು” ಪನ್ದ್ ಬರೆತೆರ್. ಈ ಪಲವೆ ಪಾಡಿನಪಗ ಕನ್ನಡೆರ್ ಅಂಚೆನೇ ಕನ್ನಡ ಮಾಧ್ಯಮೊಲು ವಿರೋಧ ಮಲ್ದಿನ ನಮಕ್ ಮಾತಾ ತೆರಿದೇ ಉಂಡು. ಅಂಚೆನೇ ಕುಡೊಂದಿ ಕಡೆಟ್ ಸಾದಿದ ಗುರ್ತೊದ ಸೂಚನೆಲಾ ತುಳುಲಿಪಿಟ್ ಪಾಡ್ದೆರ್. ಈ ರಡ್ಡ್ ಪಲವೆಲೆಡ್ ತುಳು ಲಿಪಿ ಕಡೀರ ಸಾಲ್ಡ್ ಉಂಡು.
ಲಿಪಿಗಲಕೆದ ಕೃಷ್ಣ ಮಠೊತ ಈ ಪುನೆಪು ನನಲಾತ್ ಕಡೆಟ್ ತುಳು ಲಿಪಿತ ಪಲವೆಲೆನ್ ಪಾಡ್ಯೆರ ಉಮೇದಾವಡ್.