Last updated on November 30th, 2025 at 01:36 pm
ನ. 30: ವೆಸ್ಟ್ ಇಂಡೀಸ್ ದಿಗ್ಗಜೆ ಆ್ಯಂಡ್ರೆ ರಸೆಲ್ (Andre Russell) ಇಂಡಿಯನ್ ಪ್ರೀಮಿಯರ್ ಲೀಗ್ ಅಗತೊಂದುಲ್ಲೆರ್. ಕೊಲ್ಕತ್ತಾ ನೈಟ್ ರೈಡರ್ಸ್ ಕೂಟೊರ್ದು ಪಿದಯಿ ಬೂರ್ದಿನ ರಸೆಲ್ಗ್ ನನದ ಸೀಸನ್ಡ್ ಬೇತೆ ಕೂಟೊದ ಪರ ಗೊಬ್ಬೆರೆ ಮನಸ್ ಇಜ್ಜಿಗೆ. ಅಂಚಾದ್ ಐಪಿಎಲ್ಗ್ ವಿದಾಯ ಪನೊಂದುಲ್ಲೆ ಪನ್ದ್ ತೆರಿಪಾದೆರ್.
ಎನ್ನ ಐಪಿಎಲ್ ಶೂಲೆನ್ ನೇಲ್ಪಾದ್ ಪೋಪೆ… ಆಂಡ ಉಂದು ಎನ್ನ ಆಂಕಾರೊದ ನಡೆ ಅತ್ತ್. ಕರಿನ 12 ಸೀಸನ್ಲೆನ ನೆಂಪುಲು ಬೊಕ್ಕ ಕೆಕೆಆರ್ ಕುಟುಮೊಗು ಎನ್ನ ಕುಂದಂದಿ ಮೋಕೆ. ಯಾನ್ ನನಲಾ ಲೋಕೊದ ಬೇತೆ ಪ್ರತಿ ಲೀಗ್ಡ್ಲಾ ಸಿಕ್ಸರ್ ಆಕುವೆ ಅಂಚೆನೆ ವಿಕೆಟ್ಲೆನ್ ಗೆತೊನುವೆ. ಆಂಡ ಖುಷಿತ ವಿಚಾರ ದಾದ ಪನ್ಡ ಯಾನ್ ಕೆಕೆಆರ್ ನ್ ಬುಡ್ದು ಪೋವೊಂದಿಜ್ಜಿ ಪನ್ದ್ ರಸೆಲ್ ಪನ್ತೆರ್.
ಅಂದ್, ಐಪಿಎಲ್ಗ್ ವಿದಾಯ ಪನ್ತಿನ ಆ್ಯಂಡ್ರೆ ರಸೆಲ್ ನನದ ಸೀಸನ್ರ್ದ್ ಕೊಲ್ಕತ್ತಾ ನೈಟ್ ರೈಡರ್ಸ್ ಕೂಟೊದ ‘ಪವರ್ ಕೋಚ್’ ಆದ್ ಬೇಲೆ ಮಲ್ಪುವೆರ್. ಈ ಮುಕೇನ ಕೆಕೆಆರ್ ಪರ ಪೊಸ ಇನಿಂಗ್ಸ್ ಸುರು ಮಲ್ಪುನೆನ್ಲಾ ಐಪಿಎಲ್ ವಿದಾಯೊದ ಪೊರ್ತುಡೇ ರಸೆಲ್ ತೆರಿಪಾದೆರ್.
2012 ಟ್ ಡೆಲ್ಲಿ ಡೇರ್ ಡೆವಿಲ್ಸ್ (ಇತ್ತೆದ ಡೆಲ್ಲಿ ಕ್ಯಾಪಿಟಲ್ಸ್) ಪರ ಕಲೊಕು ಜಪ್ಪುನ ಮುಕೇನ ಐಪಿಎಲ್ ಕೆರಿಯರ್ ಸುರು ಮಲ್ತಿತ್ತಿನ ಆ್ಯಂಡ್ರೆ ರಸೆಲ್ 2014 ಟ್ ಕೊಲ್ಕತ್ತಾ ನೈಟ್ ರೈಡರ್ಸ್ ಕೂಟೊಗು ಗೋಡಿದಿತ್ತೆರ್. ಅವೆರ್ದ್ ಬೊಕ್ಕ ಬೆರಿಬೆರಿ 12 ಸೀಸನ್ಡ್ ಕೆಕೆಆರ್ ಪರ ಗೊಬ್ಬುದೆರ್. ಆಂಡಲಾ 37 ವರ್ಸ ಪ್ರಾಯೊದ ರಸೆಲ್ ನ್ ಈ ಸರ್ತಿ ಕೆಕೆಆರ್ ಬುಡುಗಡೆ ಮಲ್ದ್ಂಡ್. ರಿಲೀಸ್ ಆತಿನ ಬೆರಿಟೇ ರಸೆಲ್ ಐಪಿಎಲ್ಗ್ ವಿದಾಯ ಪನ್ತೆರ್. ಅವೆತ ಬೆರಿಟೇ ಕೆಕೆಆರ್ ಆರೆನ್ ಪವರ್ ಕೋಚ್ ಆದ್ ನೇಮಕ ಮಲ್ದಿನ ವಿಶೇಷ.
ಇಂಡಿಯನ್ ಪ್ರೀಮಿಯರ್ ಲೀಗ್ಡ್ 139 ಗೊಬ್ಬು ಗೊಬ್ಬುದಿನ ರಸೆಲ್ 115 ಇನಿಂಗ್ಸ್ಡ್ ಬ್ಯಾಟಿಂಗ್ ಮಲ್ತ್ದೆರ್. ಉಂದೆಟ್ 12 ಅರ್ಧಶತಕೊದೊಟ್ಟುಗು 2651 ರನ್ ಒಟ್ಟುಮಲ್ದೆರ್. ಅಂಚೆನೇ 123 ವಿಕೆಟ್ಲಾ ದೆತ್ತ್ದೆರ್. ಆತೇ ಅತ್ತಂದೆ 2014 ಬೊಕ್ಕ 2024 ಟ್ ಕೊಲ್ಕತ್ತಾ ನೈಟ್ ರೈಡರ್ಸ್ ಚಾಂಪಿಯನ್ ಆಯೆರ ಆ್ಯಂಡ್ರೆ ರಸೆಲ್ ನ ಮಲ್ಲ ಕೈ ಇತ್ತ್ಂಡ್. ಇತ್ತೆ ಕೆಕೆಆರ್ ಪರ ‘ಪವರ್ ಕೋಚ್’ ಆದ್ ಪೊಸ ಇನಿಂಗ್ಸ್ ಸುರು ಮಲ್ತೊಂದುಲ್ಲೆರ್.