Last updated on December 2nd, 2025 at 09:52 am
ಮಡಿಕೇರಿ, ಡಿ. 02: ನಾಪತ್ತೆ ಆದಿತ್ತಿನ 2 ವರ್ಸ ಪ್ರಾಯೊದ ಬಾಲೆನ್ ನಾಯಿ ಒಂಜಿ ನಾಡ್ದ್ ಕೊರ್ತಿನ ನಡಕೆ ಕೊಡಗುದ ಬಿ.ಶೆಟ್ಟಿಗೇರಿ ಕೈತಲ್ದ ಕೊಂಗಣ ಗ್ರಾಮೊಡು ನಡತ್ದ್ಂಡ್.
ಕಾಫಿ ಕೊಯ್ಲ್ದ ಪೊರ್ತು ಆಯಿನೆರ್ದಾವರ ಕೊಡಗು ಜಿಲ್ಲೆದ ಪೊನ್ನಂಪೇಟೆ ತಾಲೂಕ್ದ ಕೊಂಗಣ ಗ್ರಾಮೊಡು ಕಾರ್ಮಿಕ ದಂಪತಿ ಸುನಿಲ್ ಬೊಕ್ಕ ನಾಗಿಣಿ ತನ್ಕುಲೆ ಇರ್ವೆರ್ ಜೋಕುಲೆನ್ ಒಟ್ಟುಗೇ ಲೆತೊಂದು ಪೋದಿತ್ತೆರ್. ಕಾಫಿ ತೋಟೊಡು ಬೇಲೆಡ್ ಇತ್ತಿನ ಅಕುಲು ಬಯ್ಯಡ್ ತೂನಗ ರಡ್ಡ್ ಜೋಕುಲೆಡ್ ಒರ್ತಿ, 2 ವರ್ಸ ಪ್ರಾಯೊದ ಬಾಲೆ ಸುಕನ್ಯಾ ನಾಪತ್ತೆ ಆತಿನ ತೆರಿದ್ ಬೈದ್ಂಡ್.
ಮಗಲೆನ್ ಒರ್ಮೆಲಾ ನಾಡ್ದೆರ್. ಆಂಡ ಬಾಲೆ ತಿಕ್ಕಂದಿನೆರ್ದಾವರ ವಿಷಯೊನು ಅರಣ್ಯ ಇಲಾಖೆ ಅಧಿಕಾರಿಲೆಗ್ ತೆರಿಪಾದೆರ್. ಅಪಗನೇ ಅಕುಲುಲಾ ಜಾಗೆಗ್ ಬತ್ತಿತ್ತ್ದ್, ಸುಕನ್ಯಾ ನ್ ಕಾಫಿ ತೋಟೊಡೊರ್ಮೆ ನಾಡ್ದೆರ್. ಆಂಡ, ನಡೀರ್ ಮುಟ್ಟ ನಾಡ್ಂಡಲಾ ಬಾಲೆ ತಿಕ್ಕ್ದಿಜಲ್.
ಬೊಕ್ಕ ಅನಿಲ್ ಪನ್ಪಿನಾರೆನ ನಾಯಿಲೆನ್ಲಾ ನಾಡ್ಯೆರ ಗಲಸ್ದೆರ್. ಈ ಪೊರ್ತುಡು ಆ ನಾಯಿಲೆಡ್ ಓರಿಯೋ ಪನ್ಪಿ ನಾಯಿ ಸುಕನ್ಯಾನ್ ನಾಡ್ದ್ಂಡ್. ಕಾಫಿ ತೋಟೊದ ಎತ್ತರೊದ ಜಾಗೆಡ್ ಬಾಲೆನ್ ತೂದು ಓರಿಯೋ ಕೊರೆಪರೆ ಪತ್ತ್ದ್ಂಡ್. ಅಂಚಾದ್ ಅಲ್ಪ ಪೋದು ತೂನಗ ಸುಕನ್ಯಾ ತಿಕ್ಕ್ದಲ್. ಗರ್ಗಂಡ ಕತ್ತಲೆಡ್ ಒಂಜಿ ದಿನ ಕರಿತಿನ ಬಾಲೆ ಸುರಕ್ಷಿತವಾದ್ ಇಲ್ಲಗ್ ಎತ್ತ್ದಲ್. ಮಗಲ್ ತೋಜಂದೆ ಆತಿನೆರ್ದಾವರ ಸೋತ್ ಪೋದಿತ್ತಿನ ಸುನಿಲ್ ಬೊಕ್ಕ ನಾಗಿಣಿ ದಂಪತಿ ಸಮಾದಾನ ಆತೆರ್.