Last updated on December 14th, 2025 at 04:33 pm
ಕುಡ್ಲ, ಡಿ. 14: ‘ಯಕ್ಷಗಾನೊಡು ವಿಶೇಷ ಉಮೇದ್ ಇತ್ತಿನ ದಾಮೋದರ ನಿಸರ್ಗೆರ್ ತನ್ನ ಅಮ್ಮೆರೆನ ಪುದರ್ಡ್ ನಡಪಾವೊಂದಿತ್ತಿನ ಬೋಳೂರು ದೋಗ್ರ ಪೂಜಾರಿ ಪ್ರಶಸ್ತಿ ಪ್ರದಾನ ಕಾರ್ಯಕ್ರಮೊಡು ಪ್ರತಿವರ್ಷ ತಾಳಮದ್ದಳೆ ನಡಪಾವೊಂದಿತ್ತೆರ್. ಆತೇ ಅತ್ತಂದೆ ತುಳುಕೂಟೊದ ಆಶ್ರಯೊಡು ತುಳು ಸಂಸ್ಕೃತಿಗ್ ಸಂಬಂಧಿತಿನ ಪಾಕ ಕಾರ್ಯಕ್ರಮೊಲೆನ ಅಟ್ಟನೆ ಮಲ್ತೊಂದಿತ್ತೆರ್. ಇತ್ತೆ ತುಳುಕೂಟ ಗರೋಡಿಡ್ ಬೆರ್ಮೆರ್ ಬೈದೆರ್ಲೆನ ಪುಣ್ಯಜಾಗೆಡ್ ನಿಸರ್ಗೆರೆ ನೆಂಪುದ ಸಪ್ತಾಹ ನಡಪಾವೊಂದುಪ್ಪುನ ಒಂಜಿ ಸಾರ್ಥಕ ಸಂಸ್ಮರಣೆ’ ಪನ್ದ್ ಪೆರಿಯ ವಿದ್ವಾಂಸೆರಾಯಿನ ಡಾ. ಎಂ. ಪ್ರಭಾಕರ ಜೋಷಿ ಪನ್ಡೆರ್.
ಕುಡ್ಲ ತುಳುಕೂಟ ದಿ| ದಾಮೋದರ ನಿಸರ್ಗೆರೆ ಸ್ಮರಣಾರ್ಥ ಕಂಕನಾಡಿ ಬೆರ್ಮೆರ್ ಬೈದೆರ್ಲೆನ ಗರೊಡಿ ಕ್ಷೇತ್ರೊಡು ನಡಪಾವಂದುಪ್ಪುನ ‘ತುಳು ತಾಳಮದ್ದೊಲಿ’ ಸಪ್ತಾಹ ಕಾರ್ಯಕ್ರಮೊಡು ಮಲ್ಲ ಬಿನ್ನೆರಾದ್ ಪಾತೆರ್ಯೆರ್. ಈ ಪೊರ್ತುಡು ಪುಗರ್ತೆದ ಅರ್ಥಧಾರಿ ಜಬ್ಬಾರ್ ಸಮೋ ಮೆರೆನ್ ತುಳುಕೂಟೊದ ಅಧ್ಯಕ್ಷೆದಿ ಹೇಮಾ ದಾಮೋದರ ನಿಸರ್ಗ ಶಾಲ್ – ಸ್ಮರಣಿಕೆ ಕೊರ್ದು ಮಾನಾದಿಗೆ ಮಲ್ತೆರ್. ಕಾರ್ಯಕ್ರಮೊಡು ಯಕ್ಷಗಾನ ಅರ್ಥಧಾರಿ ಪ್ರೊ. ಭಾಸ್ಕರ ರೈ ಕುಕ್ಕುವಳ್ಳಿ, ನಾಗೇಶ ದೇವಾಡಿಗ, ಮಧುಸೂದನ ಅಲೆವೂರಾಯ, ಶಶಿಧರ ಪೊಯ್ಯತ್ತಬೈಲ್, ನ್ಯಾಯವಾದಿ ಗೋಪಾಲಕೃಷ್ಣ ಭಟ್ ಗುತ್ತಿಗಾರ್ ಒತ್ತುಪಾಲ್ ಇತ್ತೆರ್. ತುಳುಕೂಟೊದ ಕಾರ್ಯದರ್ಶಿ ವರ್ಕಾಡಿ ರವಿ ಅಲೆವೂರಾಯ ಎದುಕೊಂದು, ಸೊಲ್ಮೆ ಸಂದಾಯೆರ್.
‘ಕಾನದ ಕೌಶಿಕೆ’ ತಾಳಮದ್ದೊಲಿ:
ಸಪ್ತಾಹೊದ ಲೆಕ್ಕೊಡು ಸರಯೂ ಯಕ್ಷಗಾನ ಮಂಡಳಿರ್ದ್ ‘ಕಾನದ ಕೌಶಿಕೆ’ ತುಳು ಯಕ್ಷಗಾನ ತಾಳಮದ್ದೊಲಿ ನಡತ್ಂಡ್. ಬಿನ್ನೆ ಕಲಾವಿದೆರ್ ಪ್ರೊ.ಭಾಸ್ಕರ ರೈ ಕುಕ್ಕುವಳ್ಳಿ (ಶ್ರೀ ದೇವಿ) ಬೊಕ್ಕ ಜಬ್ಬಾರ್ ಸಮೋ ಸಂಪಾಜೆ (ಶುಂಭ) ಪ್ರಧಾನ ಅರ್ಥಧಾರಿಲಾದ್ ಪಾಲ್ ಪಡೆಯೆರ್. ಗೋಪಾಲಕೃಷ್ಣ ಭಟ್ ಗುತ್ತಿಗಾರ್ ಬೊಕ್ಕ ಕೂಟದಕುಲು ಹಿಮ್ಮೇಳಡ್ ಸಹಕರಿತೆರ್.