Last updated on December 20th, 2025 at 02:41 pm
ಪಡ್ಡೆದ್ರ, ಡಿ. 20: ಒಂಜಿ ಕಾರ್ ನಡತೊಂದು ಪೋವೊಂದಿತ್ತಿನ ಇರ್ವೆರೆಗ್ ಎಡ್ತಿನೆರ್ದಾವರ ಗಾತಿದ ಗಡಿಕುಲಾದಿತ್ತಿನಕಲೆನ್ ಅವ್ವೇ ಸಾದಿಯೆ ಪೋವೊಂದಿತ್ತಿನ ಪ್ರೈವೇಟ್ ಬಸ್ ಸಿಬ್ಬಂದಿಲು ಬಸ್ಡೇ ಲೆತೊಂದು ಪೋದು ಬೊಕ್ಕ ಆಂಬ್ಯುಲೆನ್ಸ್ಗ್ ಬರ್ತಾದ್ ಮಾನವೀಯತೆ ತೂಪಾದೆರ್.
ಎರ್ಮಾಲ್ ಶ್ರೀ ಜನಾರ್ದನ ದೇಲಂತಡೆದ ಪೂತ ತೇರ್ ಒಯ್ತೊಂದುಪ್ಪುನಗ ಎರ್ಮಾಲ್ ಗರೊಡಿದ ಕೈತಲ್ ಒಂಜಿ ಕಾರ್ ಪಿರವುರ್ದ್ ಬತ್ತ್ದ್ ಇರ್ವೆರ್ ನಡತೊಂದು ಪೋಪುನಕ್ಲೆಗ್ ಎಡ್ತ್ದ್ಂಡ್. ಕಾರ್ ಡ್ರೈವರ್ನ ನಾಮಾಸ್ರ್ದಾವರ ಈ ಎಡ್ತೆ ಆತ್ಂಡ್.
ಅವ್ವೇ ಪೊರ್ತುಡು, ಆ ಸಾದಿಯೆ ಒಡಿಪುದಂಚಿ ಪೋವೊಂದಿತ್ತಿನ ದುರ್ಗಾಂಬಾ ಬಸ್ದ ಡ್ರೈವರ್ ಅಶ್ರಫ್ ಪೆಜಮಾಡಿ, ಕಂಡಕ್ಟರ್ ಆಕಾಶ್ ಕೋಡಿಕೆರೆ ಬೊಕ್ಕ ಅಶೋಕ್ ಎರ್ಮಾಳ್ ರಪಕ್ಕ ಬತ್ತ್ದ್ ಗಡಿಕುಲಾತಿನಕ್ಲೆನ್ ಬಸ್ಡ್ ಕಾಪು ದಂಡತೀರ್ಥ ಶಾಲೆಗ್ ಲೆತೊಂದು ಪೋತೆರ್.
ಬೊಕ್ಕ, ಮೂಳೂರುರ್ದ್ ಎಸ್ಡಿಪಿಐ ಆಂಬ್ಯುಲೆನ್ಸ್ ಜಾಗೆಗ್ ಬತ್ತ್ಂಡ್. ಆಂಬ್ಯುಲೆನ್ಸ್ ಸಿಬ್ಬಂದಿ ಜಲಾಲುದ್ದೀನ್ ಜಲ್ಲು ಬೊಕ್ಕ ಹಮೀದ್ ಉಚ್ಚಿಲ ಗಡಿಕುಲಾತಿನಕ್ಲೆನ್ ಒಡಿಪುದ ಪ್ರೈವೇಟ್ ಆಸ್ಪತ್ರೆಗ್ ಲೆತೊಂದು ಪೋಯೆರ ಸಕಾಯ ಮಲ್ತೆರ್.
ಬಸ್ ಡ್ರೈವರ್ ಬೊಕ್ಕ ಕಂಡಕ್ಟರ್ನ ಸಕಾಲಿಕ ಬೊಕ್ಕ ಮಾನವೀಯ ಕ್ರಮೊನು ಸಾರ್ವಜನಿಕೆರ್ ಪುಗರೊಂದುಲ್ಲೆರ್. ಪೆಟ್ಟಾತಿನಕುಲು ಉಸಾರಾವೊಂದುಲ್ಲೆರ್ ಪನ್ದ್ ವರದಿ ಆತ್ಂಡ್