Last updated on December 20th, 2025 at 06:17 pm
ಕಡಬ, ಡಿ. 20: ಎಲ್ಲೆ ನಡಪುನ ಕಡಬ ತಾಲೂಕ್ದ ಕಡೀರ ತುಳು ಸಮ್ಮೇಳನೊದ ಲೆಕ್ಕೊಡು ಇನಿ ಡಿಸೆಂಬರ್ 20ದ ಬಯ್ಯಡ್ ಕಡಬ ಪೇಂಟೆರ್ದ್ ಕೇಪು ದೇಲಂತಡೆ ಮುಟ್ಟ ತುಳುವಪ್ಪೆನ ನೇರೊಣಿಗೆ ನಡತ್ದ್ ಕೇಪು ದೇಲಂತಡೆಗ್ ನಟ್ಟಿಬುಲೆ ಸಂದೈತೊ ನಡತ್ಂಡ್.
ಕಡಬದ ಅಪ್ಪೆ ದುರ್ಗಾಂಬಿಕೆನ ದೇಲಂತಡೆರ್ದ್ ತೊಡಂಗಿನ ನೇರೊಣಿಗೆನ್ ಕಡಬ ಪಟ್ಟಣ ಪಂಚಾಯತ್ದ ಗುರ್ಕಾರ್ದಿ ತಮನ್ನಾ ಜಬೀನ್ ತುಳು ಕೊಡಿ ಬೀಜಾದ್, ಸಮ್ಮೇಳನೊದ ಸ್ವಾಗತ ಸಮಿತಿದ ಗುರ್ಕಾರ್ಲು ಶಿವರಾಮ ಶೆಟ್ಟಿ ಕೇಪು ತಾರಾಯಿ ಆಕ್ದ್ ಉದಿಪನ ಮಲ್ತೆರ್. ದುರ್ಗಾಂಬಿಕಾ ದೇಲಂತಡೆದ ವ್ಯವಸ್ಥಾಪನಾ ಸಮಿತಿದ ಗುರ್ಕಾರ್ಲು ಚಂದ್ರಶೇಖರ್ ಕರ್ಕೇರ ತುಳುವಪ್ಪೆನ ಒರುಕು ಪೂತ ಅರ್ಚನೆ ಮಲ್ತೆರ್.
ಬೊಕ್ಕ ಬ್ಯಾಂಡ್, ಚೆಂಡೆದ ಒಟ್ಟುಗು ಕಡಬ ಪೇಂಟೆ ಆದ್, ಮರ್ಧಾಳ ಪೇಂಟೆಡೆ ಆದ್ ನೇರೊಣಿಗೆ ಕೇಪು ದೇಲಂತಡೆ ಎತ್ತ್ಂಡ್.
ಈ ನೇರೊಣಿಗೆಡ್ ಸಮ್ಮೇಳನಾಧ್ಯಕ್ಷೆ ಸೇಸಪ್ಪ ರೈಕುಲು, ಉದ್ಯಮಿ ಕೇಶವ ಅಮೈ, ನೇತ್ರಾವತಿ ತುಳುಕೂಟದ ಪದುಕೆರ್, ತೆಗ್ರ್ ತುಳುಕೂಟ ನೂಜಿಬಾಳ್ತಿಲದ ಪದುಕೆರ್, ಸಮ್ಮೇಳನ ಸಮಿತಿದ ಪದಾಧಿಕಾರಿಲು, ಕಡಬದ ತುಳುವೆರ್ ಪಾಲ್ಪಡೆಯೆರ್.
ಎಲ್ಲೆ ಡಿ. 20ಗ್ ಕಡಬ ತಾಲೂಕ್ದ ಕಡೀರ ತುಳು ಸಮ್ಮೇಳನೊ ಕೇಪು ಕುಟ್ರುಪ್ಪಾಡಿ ಶ್ರೀ ಮಹಾಗಣಪತಿ ಲಕ್ಷ್ಮೀ ಜನಾರ್ಧನ ಆಂಜನೇಯ ದೇಲಂತಡೆದ ಸಭಾಂಗಣೊಡು ನಡಪರೆಗುಂಡು.
