Last updated on December 21st, 2025 at 08:06 am
ಇಟ್ಟೆಲ್, ಡಿ. 21: ಬಂಟ್ವಾಳ ತಾಲೂಕ್ದ ಕೇಪು ಗ್ರಾಮೊಡು ಉಳ್ಳಾಲ್ದಿ ದೇಲಂತಡೆದ ಕಜಂಬು ಜಾತ್ರೆದ ಲೆಕ್ಕೊಡು ನಡತಿನ ಕೋರಿದ ಕಟ್ಟೊನು ಕಾನೂವಬಾಹಿರ ಪನ್ದ್ ಪನ್ಡ್ದ್ ಅವೆಎನ್ ನಡಪಾಯಿನ ಅಂಚೆನೇ ಅವೆಕ್ ಪ್ರಚೋದನೆ ಕೊರ್ತಿನ ಆರೋಪದ ಮಿತ್ತ್ ಪುತ್ತೂರು ಕ್ಷೇತ್ರೊದ ಶಾಸಕೆ ಅಶೋಕ್ ಕುಮಾರ್ ರೈ ಸೇರ್ದ್ 18 ಜನೊತ ಮಿತ್ತ್ ವಿಟ್ಲ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್.
ನಡಕೆದ ಒಲವು:
ಕೇಪು ಗ್ರಾಮೊದ ಮುರಳೀಧರ ರೈ ಪನ್ಪಿನಾರೆನ ಕಂಡೊಡು ಶುಕ್ರವಾರ (ಡಿ. 20) ಮಧ್ಯಾಹ್ನ ಒವ್ವೇ ಅನುದಾಂತೆ ಕೋರ್ದಟ್ಟ ಪಡಪಾವೊಂರುಪ್ಪುನ ಬಗೆಟ್ ಪತ್ತ ಒಲವು ಇತ್ತ್ದ್ ವಿಟ್ಲ ಪೊಲೀಸ್ ನಿರೀಕ್ಷಕೆರ್ ಸಿಬ್ಬಂದಿಲೆನ ಒಟ್ಟುಗು ದಾಳಿ ಮಲ್ತ್ದೆರ್. ಈ ಪೊರ್ತುಡು ನೂದುಗಟ್ಲೆ ಜನ ಕೋರಿಲೆನ ಒಟ್ಟುಗು ಸೇರ್ದಿತ್ತೆರ್. ಪೊಲೀಸೆರ್ ಈ ಕೃತ್ಯೋದ ಅಕ್ರಮೊದ ಬಗೆಟ್ ಜನೊಕ್ಲೆಗ್ ಎಚ್ಚರ್ಗೆ ಕೊರ್ದು ಬಲಿಪಾಯೆರ ತೂನಗ, ಅಲ್ಪ ಇತ್ತಿನ ಶಾಸಕ ಅಶೋಕ್ ಕುಮಾರ್ ರೈ ಮೇರ್ ಪೊಲೀಸೆರೆ ಸೂಚನೆ ಮೀರ್ದ್ ಕಟ್ಟ ಮಲ್ಪಿಯೆರ ಜನರಿಗೆ ಪ್ರಚೋದನೆ ಕೊರ್ತೆರ್ ಪನ್ದ್ ಒಯಿಲ್ಡ್ ತೆರಿಪಾದೆರ್.
ಪೊಲೀಸೆರೆ ಕಾರ್ಯಾಚರಣೆ:
ಪರಿಸ್ಥಿತಿ ಕೈತತ್ತೊಂದಿತ್ತಿಲೆಕನೆ ಎಚ್ಚಿಗೆ ಪೊಲೀಸ್ ಪಡೆ ಬೊಕ್ಕ ಕೆಎಸ್ಆರ್ಪಿ ಯೂನಿಟ್ನ್ ಜಾಗೆಗ್ ಲೆಪ್ಪುಡಾದೆರ್. ಬಯ್ಯ 5 ಗಂಟೆದ ಅಂದಾದಿಗ್ ಕಟ್ಟ್ ಮುಗಿತ್ದ್ ಪಿರ ಪೋವೊಂದಿತ್ತಿಕನಕ್ಲೆನ್ ಸಾದಿಡ್ ಉಂತಾಯಿನ ಪೊಲೀಸೆರ್ 16 ಜನೊನಕ ವಶೊಕು ಗೆತೊಂದೆರ್. ಕಾರ್ಯಾಚರಣೆದ ಪೊರ್ತುಡು 22 ಕಟ್ಟದ ಪೂಂಜೆರ್ ಬೊಕ್ಕ ಕೋರ್ಲೆಗ್ ಕಟ್ಟುನ ಬಾಲ್ನ್ ಜಪ್ತಿ ಮಲ್ತ್ದೆರ್.
ದಾಕಲಾತಿನ ಪ್ರಕರಣೊಲು:
ಅಕ್ರಮ ಕೃತ್ಯೊಗು ಜಾಗೆ ಕೊರ್ತಿನ ಮುರಳೀಧರ ರೈ, ಜನೊಕ್ಲೆಗ್ ಪ್ರಚೋದನೆ ಮಲ್ದಿನ ಶಾಸಕೆ ಅಶೋಕ್ ಕುಮಾರ್ ರೈ ಬೊಕ್ಕ ಕಟ್ಟೊಡು ಪಾಲ್ ಪಡೆತಿನ ಬೇತೆ 16 ಜನೊತ ಮಿತ್ತ್ ಬಿಎನ್ಸ್ (BNS-2023) ಕಾಯ್ದೆದ ಬೇತೆ ಬೇತೆ ಕಲಂಲು ಅಂಚೆನೇ ಪ್ರಾಣಿ ಹಿಂಸೆ ತಡೆ ಕಾಯ್ದೆ 1960ತ ಅಡಿಟ್ ಪ್ರಕರಣ ದಾಕಲಾತ್ಂಡ್.
ಶಾಸಕೆರೆ ಆಕ್ರೋಶ
ನಡಕೆಗ್ ಸಂಬಂಧಿತ್ದ್ ಪ್ರತಿಕ್ರಿಯೆ ಕೊರ್ನ ಶಾಸಕೆರ್, “ಕೇಪುಡೂ ಪರಕೆದ ರೂಪೊಡು ಸಾಂಪ್ರದಾಯಿಕವಾದ್ ಕೋರ್ದಟ್ಟ ಆಪುಂಡು. ಉಂದೆಟ್ ಒವ್ವೇ ಜುಗಾರಿ ಇಜ್ಜಂಡ್. ಧಾರ್ಮಿಕ ಭಾವನೆಗ್ ಗೌರವ ಕೊರ್ದು ಒಂತೆ ಪೊರ್ತು ಅವಕಾಶ ಕೊರ್ಯೆರ ಅಧಿಕಾರಿಲೆಡ ಬಿನ್ನಪು ಮಲ್ತಿತ್ತ್ಂಡ್. ಆಂಡ ಈ ಬಿನ್ನಪುಗು ಮನ್ನಣೆ ಕೊರಂದೆ ಪೊಲೀಸೆರ್ ಜನೊಕ್ಲೆನ್ ಬೆರಿಪತ್ತ್ದೆರ್. ಅಂಚಾದೇ ಯಾನ್ ಅಡೆ ಪೋದಿತ್ತೆ” ಪನ್ದ್ ಸಮರ್ಥನೆ ಮಲ್ತೊಂದೆರ್.
ದೇರಂತಡೆದ ಭಂಡಾರದಕೊಟ್ಯದ ಎದುರು ಸಂಪ್ರದಾಯದ ಪ್ರಕಾರ ನಡಪುನ ಈ ಕಟ್ಟೊಗು ಗೃಹ ಸಚಿವೆರ್ ಬೊಕ್ಕ ಪೆರಿಯ ಅಧಿಕಾರಿಲೆರ್ದ್ ಸೂಚನೆ ತಿಕ್ಕ್ಂಡಲಾ, ಸ್ಥಳೀಯ ಪೊಲೀಸೆರ್ ಕಾನೂನುಬಾಹಿರ ಪನ್ಪಿ ನೆವನ ಕೊರ್ದು ಅನು ಕೊರ್ತಿಜೆರ್ ಪನ್ದ್ ತೆರಿದ್ ಬೈದ್ಂಡ್.
ನಡತಿನಿ ದಾದ ?
ಕೇಪು ಉಳ್ಳಾಲ್ತಿ ದೇವಸ್ಥಾನೊಡು ಶನಿವಾರ ಮಧ್ಯಾಹ್ನ ಧಾರ್ಮಿಕ ಕಾರ್ಯಕ್ರಮ ಮುಗಿಯೊಂದಿತ್ಯಿಲೆಕನೆ ಭಂಡಾರದಕೊಟ್ಯದ ಎದುರುದ ಕಂಡೊಡು ದುಂಬುರ್ದು ನಡಣೊಂದು ಬತ್ತಿಲೆಕ ಕಟ್ಟ ಮಲ್ತ್ದೆರ್. ಪೊಲೀಸ್ ಇಲಾಖೆರ್ದ್ ಉಂದೆಕ್ ವಿರೋಧ ತೋಜಿದ್ ಬೈದ್ಂಡ್. ಶಾಸಕೆ ಅಶೋಕ್ ಕುಮಾರ್ ರೈ ಜಾಗೆಗ್ ಬತ್ತ್ದ್ ಬಯ್ಯ 50ಗಂಟೆ ಮುಟ್ಟ ಕೋಳಿ ಕಟ್ಟ ನಡಪುಂಡು ಪನ್ದ್ ಸೂಚನೆ ಕೊರ್ದು ಅಲ್ಪನೇ ಕುಲ್ಲುದು ಕೋರ್ದಟ್ಟ ತೂಯೆರ್. 5 ಗಂಟೆ ಆವೊಂದಿತ್ತಿನೇ ಕಟ್ಟ ಉಂತಾದೆರ್. ಕ್ಷೇತ್ರೊದ ಪ್ರಭಾವ ತೆರಿದ್ ಅಲ್ಪನೇ ಅರೆಸ್ಟ್ ಮಲ್ಪಂದೆ ಅವೆರ್ದ್ ಬೊಕ್ಕ ಎಚ್ಚಿಗೆ ಪೋಲೀಸೆರೆನ್ ಲೆಪುಡಾದ್ ಕಟ್ಠ ಮುಗಿದ್ ಪೋನಗ ಸಾದಿಡ್ ಕಟ್ಟಗ್ ಬತ್ತಿನಕ್ಲೆನ್ ಪೊಲೀಸೆರ್ ಪತ್ತ್ದೆರ್.
ಅನು ಕೊರ್ದಿಜ್ಜಂಡ್!
ಅನಾದಿ ಕಾಲೊದ ಕಟ್ಟ್ ಪ್ರಕಾರ ನಡಪುನ ಕಟ್ಟ ಪನ್ದ್ ಪನ್ಡಲಾ, ಪೊಲೀಸ್ ಇಲಾಖೆ ಒವ್ವೇ ಅನು ಕೊರ್ದಿಜ್ಜಂಡ್. ಪೆರಿಯ ಅಧಿಕಾರಿಲೆರ್ದ್ ಜಿಲ್ಲಾ ಮಟ್ಟದ ಅಧಿಕಾರಿಲೆಗ್ ಸೂಚನೆ ಕೊರ್ನ್ಡಲಾ, ಗೃಹ ಸಚಿವೆರೆರ್ದ್ ನ್ಯಾಯಾಧೀಶೆರೆರ್ದ್ ಕಾಲ್ ಮಲ್ಪಾದ್ ಅಡ್ಡ ಬರಂದಿಲೆಕ ಸೂಚನೆ ಕೊರ್ದಿತ್ತೆರ್. ಆಂಡಲಾ ಕಾನೂನುಬಾಹಿರ ಪನ್ಪಿ ನೆವನ ಕೊರ್ದು ಅನು ಕೊರ್ತಿಜೆರ್ ಪನ್ದ್ ಊರುದಕುಲು ಒಲವು ಕೊರ್ತೆರ್.