Last updated on January 6th, 2026 at 08:55 am
ಬೆಂಗಳೂರು, ಜ. 05: ಪ್ಲ್ಯಾಟ್ಡ್ ಆಕಸ್ಮಿಕ ಸೂ ಬೂರ್ದ್ ಪುಗೆಕ್ ದಮ್ಮುಕಟ್ಟ್ದ್ ಕುಡ್ಲದ ಜವನ್ದಿ ಒರ್ತಿ ತೀರ್ದಿನ ನಡಕೆ ಬೆಂಗಳೂರ್ದ ರಾಮಮೂರ್ತಿನಗರ ಪೊಲೀಸ್ ಸ್ಟೇಶನ್ ಸೀಮೆದ ಸುಬ್ರಹ್ಮಣ್ಯ ಲೇಔಟ್ದ ಅಪಾರ್ಟ್ಮೆಂಟ್ಡ್ ಶನಿವಾರ ರಾತ್ರೆ ನಡತ್ದ್ಂಡ್.
ತೀರ್ದಿನಾರೆನ್ ಕಾವೂರು ಮೂಲೊದ ಶರ್ಮಿಳಾ (34) ಪನ್ದ್ ಗುರ್ತ ಪತ್ತ್ದೆರ್. ಶರ್ಮಿಳಾ ಒಂಜರೆ ವರ್ಸೊರ್ದಿಂಚಿ ಸುಬ್ರಹ್ಮಣ್ಯ ಲೇಔಟ್ದ ಅಪಾರ್ಟ್ಮೆಂಟ್ಡ್ ದೋಸ್ತಿನೊಟ್ಟುಗು ಇತ್ತೆರ್. ತನ್ನ ಇಲ್ಲ ಕೈತಲ್ದ ಸಾಫ್ಟ್ ವೇರ್ ಕಂಪನಿಡ್ ಬೇಲೆ ಮಲ್ತೊಂದಿತ್ತೆರ್. ರಜೆ ಇತ್ತಿನೆರ್ದಾವರ ಆರೆನ ದೋಸ್ತಿ ಊರುಗು ಪೋದಿತ್ತಲ್, ಅಂಚಾದ್ ಇಲ್ಲಡ್ ಒರ್ತಿಯೇ ಇತ್ತೆರ್. ರಾತ್ರೆ 11 ಗಂಟೆದ ಅಂದಾಜಿಗ್ ಇಲ್ಲದ ಅದೆಟ್ ಒರರ್ದ್ ಒರಾನೆ ಸೂ ತೋಜಿದ್ ಬತ್ತ್ದ್ ಪುಗೆ ಲಕ್ಕ್ದ್ಂಡ್. ಅಪಗ ಬರಿತ ಅದೆಟ್ ಇತ್ತಿನ ಶರ್ಮಿಳಾ ಸೂ ಬೂರ್ದಿನ ಅದೆತಂಚಿ ಬರ್ಯೆರ ತೂತೆರ್.
ಅವ್ವೇ ಪೊರ್ತುಡು ಕರೆಂಟ್ ಕಟ್ ಆತ್ಂಡ್. ಅಂಚಾದ್ ಕತ್ತಲೆಡ್ ಕಂಡಿ ಬೊಕ್ಕ ಬಾಕಿಲ್ ದೆಪ್ಪೆರಾತಿಜಿ. ಇಲ್ಲಡೊರ್ಮೆ ಪುಗೆ ದಿಂಜಿನೆರ್ದಾವರ ದಮ್ಮುಕಟ್ಟ್ದ್ ಅಲ್ಪನೇ ತೀರ್ದೆರ್. ಪ್ರಾಥಮಿಕ ಜಡ್ತೆಡ್ ಶಾರ್ಟ್ ಸರ್ಕ್ಯೂಟ್ರ್ದಾವರ ಸೂ ಪತೊಂದುಂಡು ಪನ್ದ್ ತೆರಿದ್ ಬೈದ್ಂಡ್.
ಈ ಬಗೆಟ್ ರಾಮಮೂರ್ತಿನಗರ ಪೊಲೀಸ್ ಸ್ಟೇಶನ್ಡ್ ಯುಡಿಆರ್ ದಾಕಲ್ತೊಂದು ಪೊಲೀಸೆರ್ ಜಡ್ತೆ ಮಲ್ತೊಂದುಲ್ಲೆರ್.