Last updated on January 14th, 2026 at 10:17 am
ಜ. 14: ನ್ಯೂಝಿಲೆಂಡ್ ಎದುರುದ ಸುರುತ ಏಕದಿನ ಪಂದ್ಯೊಡು ಸಮ ಬ್ಯಾಟಿಂಗ್ ಮಲ್ತಿನ ವಿರಾಟ್ ಕೊಹ್ಲಿ 91 ಬಾಲ್ಡ್ 1 ಸಿಕ್ಸ್ ಬೊಕ್ಕ 8 ಫೋರ್ ಆಕ್ದ್ 93 ರನ್ ಮಲ್ತಿತ್ತೆರ್. ಈ ಅರ್ಧಶತಕೊದ ಒಟ್ಟುಗು ಕಿಂಗ್ ಕೊಹ್ಲಿ ವಿಶೇಷ ದಾಕಲೆನ್ಲಾ ಬರೆತೆರ್. ಈ ದಾಕಲೆದೊಟ್ಟುಗು ಸಚಿನ್ ತೆಂಡೂಲ್ಕರ್ರೆನ ವಿಶ್ವ ದಾಕಲೆಂಂಚಿ ಪೋವೊಂದುಲ್ಲೆರ್.
ದಾಕಲೆಲೆನ ಸರದಾರೆ ವಿರಾಟ್ ಕೊಹ್ಲಿನ ಪುದರ್ಗ್ ಕುಡೊಂಜಿ ದಾಕಲೆ ಗೋಡಿದ್ಂಡ್. ಈ ದಾಕಲೆದೊಟ್ಟುಗು ಕಿಂಗ್ ಕೊಹ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟ್ದ ರನ್ ಸರದಾರೆರೆನ ಪಟ್ಟಿಡ್ ರಡ್ಡನೇ ತಾನೊಗು ಏರ್ದೆರ್. ಅವುಲಾ ಶ್ರೀಲಂಕಾದ ಲೆಜೆಂಡ್ ಕುಮಾರ ಸಂಗಾಕ್ಕರ ಮೆರೆನ್ ಪಿರವು ಪಾಡ್ದ್!
2000 ರ್ದ್ 2015 ಮುಟ್ಟ ಶ್ರೀಲಂಕಾಗ್ ಗೊಬ್ಬುದಿನ ಕುಮಾರ ಸಂಗಕ್ಕಾರ ಒಟ್ಟು 594 ಮ್ಯಾಚ್ ಗೊಬ್ಬುದೆರ್. ಇಂದೆಟ್ 666 ಇನಿಂಗ್ಸ್ ಗೊಬ್ಬುದಿನ ಮೇರ್ 63 ಶತಕ ಬೊಕ್ಕ 153 ಅರ್ಧಶತಕೊದ ಒಟ್ಟುಗು ಒಟ್ಟು 28016 ರನ್ ಮಲ್ತ್ದೆರ್. ಈ ಮುಕೇನ ಅಂತಾರಾಷ್ಟ್ರೀಯ ಕ್ರಿಕೆಟ್ಡ್ ಮಾತೆರೆರ್ದ್ ಎಚ್ಚ ರನ್ ಮಲ್ದಿನ 2ನೇ ಬ್ಯಾಟರ್ ಆದಿತ್ತೆರ್. ಆಂಡ ಇತ್ತೆ ಈ ದಾಕಲೆನ್ ವಿರಾಟ್ ಕೊಹ್ಲಿ ಪೊಲ್ತ್ದೆರ್.
2008 ರ್ದ್ ಅಂತಾರಾಷ್ಟ್ರೀಯ ಕ್ರಿಕೆಟ್ ಗೊಬ್ಬೊಂದುಪ್ಪುನ ವಿರಾಟ್ ಕೊಹ್ಲಿ ಇದಮುಟ್ಟ 557 ಮ್ಯಾಚ್ ಗೊಬ್ಬುದೆರ್. ಇಂದೆಟ್ 624 ಇನಿಂಗ್ಸ್ ಗೊಬ್ಬುದಿನ ಕಿಂಗ್ ಕೊಹ್ಲಿ 84 ಶತಕ ಬೊಕ್ಕ 146 ಅರ್ಧಶತಕೊದ ಒಟ್ಟುಗು 28068 ರನ್ ಮಲ್ತ್ದೆರ್. ಈ ಮುಕೇನ ಇಂಟರ್ನ್ಯಾಷನಲ್ ಕ್ರಿಕೆಟ್ಡ್ ಮಾತೆರೆರ್ದ್ ಎಚ್ಚ ರನ್ ಮಲ್ದಿನ ವಿಶ್ವೊದ 2ನೇ ಬ್ಯಾಟರ್ ಆತೆರ್. ಈ ಪಟ್ಟಿಡ್ ಕಡೀರ ತಾನೊಡ್ ಇಪ್ಪುನಾರ್ ಮಾಸ್ಟರ್ ಬ್ಲಾಸ್ಟರ್ ಸಚಿನ್ ತೆಂಡೂಲ್ಕರ್.
1989 ರ್ದ್ 2013 ಮುಟ್ಟ ಸಚಿನ್ ತೆಂಡೂಲ್ಕರ್ ಅಂತಾರಾಷ್ಟ್ರೀಯ ಕ್ರಿಕೆಟ್ಡ್ 664 ಮ್ಯಾಚ್ ಗೊಬ್ಬುದೆರ್. ಇಂದೆಟ್ 782 ಇನಿಂಗ್ಸ್ಡ್ ಬ್ಯಾಟಿಂಗ್ ಮಲ್ತ್ದ್ 100 ಶತಕ ಬೊಕ್ಕ 164 ಅರ್ಧಶತಕೊದ ಒಟ್ಟುಗು, ಒಟ್ಟು 34357 ರನ್ ಮಲ್ತ್ದೆರ್. ಈ ಮುಕೇನ ಅಂತಾರಾಷ್ಟ್ರೀಯ ಕ್ರಿಕೆಟ್ ಇತಿಹಾಸೊಡೇ ಮಾತೆರೆರ್ದ್ ಎಚ್ಚ ರನ್ ಮಲ್ದಿನ ಬ್ಯಾಟರ್ ಆದುಲ್ಲೆರ್.
ಇತ್ತೆ ರನ್ ಸರದಾರೆರೆನ ಪಟ್ಟಿಡ್ ರಡ್ಡನೇ ತಾನೊಗು ಏರ್ದಿನ ವಿರಾಟ್ ಕೊಹ್ಲಿನ ಎದುರು ಇಪ್ಪುನ ಸಚಿನ್ ತೆಂಡೂಲ್ಕರ್ರೆನ ಸಾರ್ವಕಾಲಿಕ ದಾಕಲೆ. ಈ ದಾಕಲೆ ಪೊಲಿಪೆರ ಕೊಹ್ಲಿಗ್ ನನಲಾ 6289 ರನ್ ಬೋಡು. ಇತ್ತೆನೇ ಟೆಸ್ಟ್ ಬೊಕ್ಕ ಟಿ20 ಕ್ರಿಕೆಟ್ಗ್ ಗುಡ್ ಬೈ ಪನ್ತಿನ ಕೊಹ್ಲಿ ನನದ ದಿನೊಟು ಏಕದಿನ ಗೊಬ್ಬುಲೆನ ಮುಕೇನ 6 ಸಾರರ್ದ್ ಎಚ್ಚ ರನ್ ಮಲ್ಪೆರ ಬಂಙ ಉಂಡು. ಅಂಚಾದ್ ಸಚಿನ್ ತೆಂಡೂಲ್ಕರ್ರೆನ ಸಾರ್ವಕಾಲಿಕ ದಾಕಲೆ ಸಾರ್ವಕಾಲಿಕ ಆದೇ ಒರಿಪುನ ಸಾಧ್ಯತೆ ಎಚ್ಚ ಉಂಡು.