Last updated on January 17th, 2026 at 08:12 am
ಉತ್ತರಪ್ರದೇಶ, ಜ. 16: ವಿಷೊತ ಮರಿನ್ ಕೈಟ್ ಪತೊಂದು ಸಾರ್ವಜನಿಕೆರೆ ಎದುರು ಡೈಲಾಗ್ ಆಕೊಂದು ಶೋ ಕೊರೊಂದಿತ್ತಿನ ಆಂಜೊವುಗು ಅವ್ವೇ ಮರಿ ತುಚ್ಚಿದ್ ನಡುಸಾದಿಡ್ ತೀರಿನ ನಡಕೆ ಉತ್ತರಪ್ರದೇಶೊದ ರಾಂಪುರ ಜಿಲ್ಲೆಡ್ ನಡತ್ದ್ಂಡ್.
ಉತ್ತರ ಪ್ರದೇಶೊದ ರಾಂಪುರ ಜಿಲ್ಲೆದ ರಾಂಪುರ ಕೈತಲ್ದ ಪ್ರದೇಶೊಡು ನೇಲ್ಯ ಮರಿ ಒಂಜಿ ತೂಯೆರೆ ತಿಕ್ಕ್ದಿತ್ತ್ಂಡ್. ಮರಿನ್ ತೂದು ಪೋಡಿದ್ ಸ್ಥಳೀಯೆರ್ ದೂರ ಬಲ್ತ್ದೆರ್. ಆಂಡ ಅಲ್ಪ ಇತ್ತಿನ ಆಂಜೊವು ಒರಿ ಯಾನ್ ಮಲ್ಲ ತಂಕೊದಾಯೆ ಪನ್ದ್ ತೋಜಾಯೆರ ಮರಿನ್ ಪತೊಂದು ತರೆತ ಮಿತ್ತ್ ದೀವೊಂದೆ. ಅಲ್ಪ ಇತ್ತಿನಕುಲು ಏತ್ ಪನ್ಡಲಾ ಕೇನಂದೆ ಉಚ್ಚುನು ಕೈಟ್ ಪತೊಂದು ಶೋಬಾಜಿ ಮಲ್ತ್ದೆ. ಈ ಪೊರ್ತುಡು ಉಚ್ಚು ಆಯಗ್ ಮೂಜಿ ಸರ್ತಿ ತುಚ್ಚಿದ್ಂಡ್. ಬಾರೀ ವಿಷ ಇಪ್ಪುನ ಉಚ್ಚು ಆಯಿನೆರ್ದಾವರ ಒಂತೆ ಪೊರ್ತುಡೇ ಆ ಆಂಜೊವು ಸಾದಿಡೇ ಕುಸ್ಕ್ದ್ ಬೂರ್ದೆ. ಅಲ್ಪ ಇತ್ತಿನಕುಲು ಆಯನ್ ಆಸ್ಪತ್ರೆಗ್ ಲೆತೊಂದು ಪೋಪಿನ ದುಂಬೇ ತೀರ್ದೆ ಪನ್ದ್ ವರದಿ ಆತ್ಂಡ್.
ಕಾಳಿಂಗ ಸರ್ಪದ ಜಾತಿಗ್ ಸೇರ್ದಿನ ಮರಿ ಉಂದಾದಿತ್ತ್ದ್, ಉಂದು ತುಚ್ಚಿನ ಒಂತೆ ನಿಮಿಷೊಡೇ ನರಮಾನಿ ತೀರುನ ಸಾಧ್ಯತೆ ಇಪ್ಪುಂಡು ಪನ್ದ್ ತಜ್ಞೆರ್ ಪನ್ತೆರ್. ಇತ್ತೆ ಸಾಮಾಜಿಕ ಬಲೆತ್ತಾನೊಡು ಆ ಆಂಜೊವು ಮರಿನ್ ಪತೊಂದಿನ ವಿಡಿಯೋ ವೈರಲ್ ಆತ್ಂಡ್.