Last updated on January 21st, 2026 at 07:41 am
ಕುಡ್ಲ, ಜ. 21: ಪೇಂಟೆದ ಪದವುದಂಗಡಿ ಪ್ರದೇಶೊದ ಕೊರಗಜ್ಜನ ಕಟ್ಟೆದ ಎದುರು ಕೋಡೆ ಆಕಸ್ಮಿಕವಾದ್ ನೇಲ್ಯ ಮರ ಒಂಜಿ ಮಗ್ರ್ದ್ಂಡ್. ಅಲ್ಪನೇ ಉಂತಾದಿತ್ತಿನ ಸ್ಕೂಟರ್ದ ಮಿತ್ತ್ ಮರ ಬೂರ್ದಿನೆರ್ದಾವರ ಸ್ಕೂಟರ್ ಞಕ್ಕೆ ಆತ್ಂಡ್. ಮರ ಬೂರ್ದಿನ ಪೆಟ್ಟ್ಗ್ ಬರಿಟಿತ್ತಿನ ಕರೆಂಟ್ ಕುಂದೊಲಾ ಪೊಲಿದ್ ಬೂರ್ದ್ಂಡ್.
ಸ್ಕೂಟರ್ದ ಮಿತ್ತ್ ಮರ ಬೂರ್ದಿನೆರ್ದಾವರ ಸ್ಕೂಟರ್ಗ್ ಭಾರೀ ಹಾನಿ ಆತ್ಂಡ್. ದೇಬೆರೆ ದಯೆಟ್, ಸ್ಕೂಟರ್ದ ಕೈತಲ್ ಏರ್ಲಾ ಇಜ್ಜಂದಿನೆರ್ದಾವರ ಪ್ರಾಣಾಪಾಯ ತತ್ತ್ದ್ಂಡ್. ಆತೇ ಅತ್ತಂದೆ, ಅವ್ವೇ ಪೊರ್ತುಡು ಸಾದಿಯೆ ಪೋವೊಂದಿತ್ತಿನ ಟೆಂಪೋ ಡ್ರೈವರ್ ಮರ ಬೂರುನ ಪೊರ್ತುಡು ತಪ್ಪಾವೊಂದು ಬಚಾವಾತೆರ್.
ಮರ ಬೂರ್ದಿನೆರ್ದಾವರ ಬರಿತ ಕಟ್ವಾನ ಒಂಜೆತ ಗ್ಲಾಸ್ಲು ಪೊಡಿ ಪೊಡಿ ಆದಿತ್ತ್ದ್, ಅಲ್ಪ ಒಂತೆ ಪೊರ್ತು ಪೋಡಿಗೆದ ವಾತಾವರಣ ಉಂಡಾದಿತ್ತ್ಂಡ್. ನಡಕೆ ನಡತಿನೇ ಮೆಸ್ಕಾಂ ಸಿಬ್ಬಂದಿಲು ಜಾಗೆಗ್ ಬತ್ತ್ದ್ ಕರೆಂಟ್ ಕನೆಕ್ಷನ್ ಕಡ್ತ್ದ್, ಮುಟ್ಟದಕ್ಲೆನ ಸಕಾಯೊಡು ಮರ ದೆಪ್ಪಾದೆರ್. ಈ ನಡಕೆಡ್ ಒವ್ವೇ ಪ್ರಾಣಹಾನಿ ಆತಿಜಿ ಪನ್ದ್ ತೆರಿದ್ ಬೈದ್ಂಡ್.