Last updated on February 2nd, 2026 at 08:20 pm
ಕಾರ್ಕಳ, ಫೆ. 02: ಕಂಡನ್ಯನ ಕೈಟ್ ಪೆಟ್ಟ್ ತಿನ್ದ್ದ್ ಆಸ್ಪತ್ರೆಡ್ ಮರ್ದ್ ಪಲಿಪಂದೆ ಬೊಡೆದಿ ತೀರ್ದಿತ್ತ್ದ್, ಈ ಬಗೆಟ್ ಕಾರ್ಲ ಗ್ರಾಮಾಂತರ ಪೊಲೀಸ್ ಸ್ಟೇಶನ್ಡ್ ದಾಕಲಾದಿತ್ತಿನ ಕೆರ್ಪುನ ಪುನೆಪು ಪ್ರಕರಣೊನು ಕೊಲೆ ಪ್ರಕರಣ ಆದ್ ಪಗತ್ದೆರ್. ಆರೋಪಿ ಕಂಡನ್ಯನ್ ಕೈದ್ ಮಲ್ತ್ದೆರ್.
ಕಾರ್ಲ ನೂರಾಳ್ಬೊಟ್ಟು ಗ್ರಾಮೊದ ಗುಮ್ಮೆತ್ತು ನಿವಾಸಿ ಸುನೀಲ್ ಕುಮಾರ್(44) ಕೈದಾತಿನ ಆರೋಪಿ. ಸುನೀಲ್ ಬೊಕ್ಕ ಆಯನ ಬೊಡೆದಿ ಗೀತಾನ ನಡುಟು ಜ.27ತಾನಿ ಕಾಂಡೆ ಇಲ್ಲದ ವಿಚಾರೊಡು ಲಡಯಿ ಆದಿತ್ತ್ಂಡ್. ಈ ಪೊರ್ತುಡು ಸುನೀಲ್ ಕುಮಾರ್ ತನ್ನ ಬೊಡೆದಿನ್ ಕೆರ್ಪುನ ಉದ್ದೇಶೊಡು ಕೈಕ್ ತಿಕ್ಕಿ ಕೈದ್ಡ್ ಗೀತಾಗ್ ಆಕ್ದೆ. ಉಂದೆರ್ದಾವರ ಗಾತಿದ ಗಡಿಕುಲಾದಿತ್ತಿನ ಗೀತಾಗ್ ಕುಡ್ಲದ ಪ್ರೈವೇಟ್ ಆಸ್ಪತ್ರೆದ ಐ.ಸಿ.ಯು ಡ್ ಮರ್ದ್ ನಡತೊಂದಿತ್ತ್ಂಡ್.
ಈ ಬಗೆಟ್ ಕಾರ್ಲ ಗ್ರಾಮಾಂತರ ಪೊಲೀಸ್ ಸ್ಟೇಷನ್ಡ್ ಪ್ರಕರಣ ದಾಕಲಾದಿತ್ತ್ಂಡ್. ಜಡ್ತೆ ಮಲ್ತಿನ ಪೊಲೀಸೆರ್ ಆರೋಪಿ ಸುನೀಲ್ ಕುಮಾರ್ ನ್ ಕೈದ್ ಮಲ್ತ್ದ್, ನ್ಯಾಯಂತಡೆದ ಎದುರು ಲೆತೊಂದು ಪೋದಿತ್ತೆರ್. ನ್ಯಾಯಂತಡೆ ಆರೋಪಿಗ್ 14 ದಿನೊತ ನ್ಯಾಯಾಂಗ ಕೈದ್ ಕೊರ್ದಿತ್ತ್ಂಡ್. ಗಾತಿದ ಸ್ಥಿತಿಟ್ ಇತ್ತಿನ ಗೀತಾ, ಮರ್ದ್ ಪಲಿಪಂದೆ ಇನಿ ಫೆ.2ತಾನಿ ಪುಲ್ಯ 5:46 ತ ಅಂದಾಜಿಗ್ ಆಸ್ಪತ್ರೆಡ್ ತೀರ್ದೆರ್. ಅಂಚಾದ್ ಸ್ಟೇಷನ್ಡ್ ದಾಕಲಾದಿತ್ತಿನ ಕೆರ್ಪುನ ಪುನೆಪು ಪ್ರಕರಣೊನು ಕೆರ್ತಿನ ಪ್ರಕರಣ ಆದ್ ಪಗತ್ದ್, ಆ ಪ್ರಕಾರ ಜಡ್ತೆ ಮಲ್ತೊಂದುಲ್ಲೆರ್.