Last updated on February 10th, 2026 at 04:28 pm
ಕಾಸ್ರೋಡ್, ಫೆ. 10: ತುಳು ಭಾಷೆ, ಸಂಸ್ಕೃತಿ, ತೆನಸ್ಲೆನ ವಿಷಯೊಡು ಸೋಶಿಯಲ್ ಮೀಡಿಯಾಡ್ ವೀಡಿಯೋ ಮಲ್ತೊಂದು, ತನ್ನ ಕಾಸ್ರೋಡ್ ಮೋಡಿದ ತುಳುಭಾಷೆಡೇ ಪಾತೆರೊಂದು ‘ಚಿನ್ನುಪಾಪು’ ಪುದರ್ಡ್ ಇನ್ಸ್ಟಾಗ್ರಾಮ್ ಸ್ಟಾರ್ ಆದಿತ್ತಿನ ಅಡೂರು ಮೂಲೊದ ಜವನ್ದಿ ರೇಷ್ಮಾ ಆತ್ಮಹತ್ಯೆ ಮಲ್ತೊಂದು ತೀರ್ದೆರ್.
ಕಾಸ್ರೋಡ್ ಕೈತಲ್ದ ಕೂಡ್ಲು ಪನ್ಪಿನಲ್ಪದ ಬಾಡಾಯಿದ ಇಲ್ಲಡ್ ಇತ್ತಿನ ರೇಷ್ಮಾ, ಅವ್ವೇ ಇಲ್ಲಡ್ ಆತ್ಮಹತ್ಯೆ ಮಲ್ತೊಂದಿನ ಸ್ಥಿತಿಟ್ ತಿಕ್ಕ್ದೆರ್.
ರೇಷ್ಮಾ ಗ್ ಇನ್ಸ್ಟಾ ಪೇಜ್ಡ್ ರಡ್ಡ್ ಲಕ್ಷೊರ್ದ್ಲಾ ಎಚ್ಚ ಫಾಲೋವರ್ ನಕುಲು ಉಲ್ಲೆರ್. 28 ವರ್ಸ ಪ್ರಾಯೊದ ರೇಷ್ಮಾ ಚಿನ್ನುಪಾಪು ಪನ್ಪಿ ಪುದರ್ಡ್ ವಿಡಿಯೋ ಅಪ್ಲೋಡ್ ಮಲ್ತೊಂದಿತ್ತೆರ್. ಕಾಸ್ರೋಡ್- ಸುಳ್ಯ ಗಡಿಭಾಗೊದ ಅಡೂರು ಮೂಲೊದ ರೇಷ್ಮಾ ಮೋಕೆ ಮಲ್ತ್ದ್ ಮದಿಮೆ ಆದಿತ್ತೆರ್. ಆಂಡ ನಾಲ್ ತಿಂಗೊಲುಗು ದುಂಬು ಕಂಡನ್ಯನೊಟ್ಟುಗು ಮನಸ್ತಾಪರ್ದಾವರ ಬರ ಪನ್ಡ್ದ್, ಇತ್ತೆ ಬೇತೆನೇ ಇತ್ತೆರ್. ಸೋಮವಾರ ಮಧ್ಯಾಹ್ನ ಬರಿತಿಲ್ಲದಕುಲು ರೇಷ್ಮಾ ತನ್ನ ಇಲ್ಲಡ್ ಬಲ್ಲ್ ಪಾಡೊಂದಿನೆನ್ ತೂದು ಪೊಲೀಸೆರೆಗ್ ತೆರಿಪಾದೆರ್.
ಚಿನ್ನು ಪಾಪು ಪುದರ್ಡ್ ತುಳು ಬೊಕ್ಕ ಮಲ್ಯಾಲಿಡ್ ಕೊಞ್ಞೆ ಪಾತೆರೊಂದು ರೀಲ್ಸ್ ಮಲ್ತೊಂದಿತ್ತಿನೆರ್ದಾವರ ಭಾರೀ ಸಂಖ್ಯೆಡ್ ಅಭಿಮಾನಿಲು ಇತ್ತೆರ್. ಊರುದ ಶೈಲಿದ ಜೀವನ, ತೆನಸ್, ಪ್ರಚಾರ ದಾಂತಿನ ಜಾಗೆಲು, ತುಳುವ ಸಂಸ್ಕೃತಿ ದ ಬಗೆಟ್ ವಿಡಿಯೋ ಮಲ್ತೊಂದಿತ್ತೆರ್. ಇಂದೆತ ನಡುಟು, ಕೆಲ ತಿಂಗೊಲುಗು ದುಂಬು ತನ್ನ ಡಿವೋರ್ಸ್ದ ವಿಚಾರೊನ್ಲಾ ಸೋಶಿಯಲ್ ಮೀಡಿಯಾಡ್ ಪಟ್ಟೊಂದೆರ್. ನಾಲ್ ತಿಂಗೊಲುರ್ದಿಂಚಿ ಎಂಕುಲು ಬೇತೆ ಬೇತೆ ಉಲ್ಲ, ಯಾನ್ ಇತ್ತೆ ಸಿಂಗಲ್ ಪೇರೆಂಟ್ ಪನ್ದ್ ಪನೊಂದು ಬಾಲೆದೊಟ್ಟುಗು ಇತ್ತಿನ ಫೋಟೋ ಷೇರ್ ಮಲ್ತಿತ್ತೆರ್.
ರೇಷ್ಮಾಗ್ ನಾಲ್ ವರ್ಸೊದ ಬಾಲೆ ಇತ್ತ್ದ್, ಪೊಲೀಸೆರ್ ಅಸಹಜ ಸಾವು ಪನ್ದ್ ಪ್ರಕರಣ ದಾಕಲ್ತೊಂದು, ಜಡ್ತೆ ಮಲ್ತೊಂದುಲ್ಲೆರ್. ಮೊಬೈಲ್ ಕಾಲ್, ಪೋಸ್ಟ್ ಮಾರ್ಟಂ ರಿಪೋರ್ಟ್ದ ಆಧಾರೊಡು ನನದ ಜಡ್ತೆ ಮಲ್ಪುವೆರ್. ನಡಕೆದ ಪೊರ್ತುಡು ಆರೆನ ಬಾಲೆ ಅಡೂರ್ಡ್ ಆರೆನ ಅಪ್ಪೆ ಇಲ್ಲಡ್ ಇತ್ತ್ಂಡ್ಗೆ.