Last updated on February 11th, 2026 at 05:27 pm
ಕೂಳೂರ್, ಫೆ. 11: ಪ್ರಕೃತಿದ ಆರಾಧನೆನೇ ತುಳುವ ಸಂಸ್ಕೃತಿದ ಮೂಲ. ನಮ್ಮ ಒವ್ವೇ ಆಚರಣೆಲು, ಪರ್ಬೊಲು ಇಪ್ಪಡ್, ಮಾತಲಾ ಬೈದಿನ ಪ್ರಕೃತಿ ಮೂಲೊರ್ದು. ಕೋಡೆ-ಇನಿ-ಎಲ್ಲೆ ಕರಿತೊಂದುಪ್ಪುನ ಕೆಡ್ಡಸದಾತ್ ಮಲ್ಲ ಪ್ರಕೃತಿ ಆರಾಧನೆ ತುಳುವೆರೆಡ ಅತ್ತಂದೆ ಬೇತೆ ವಾ ಸಂಸ್ಕೃತಿಡ್ಲಾ ತೂವರೆ ತಿಕ್ಕಂದ್! ಆಂಡ ತುಳುನಾಡ್ಡ್ ಇತ್ತೆ ದಾದ ಆವೊಂದುಂಡು? ನಮ್ಮ ಸಂಸ್ಕೃತಿದ ಮೂಲ ಪ್ರಕೃತಿಯೇ ಇನಿ ತೆಟ್ಟೊಂದುಂಡು, ಅಪ್ಪೆ ಪುಡಮಿನ ಉಡಲ್ಡ್ ತೊಟ್ಟೆ, ಕಜವು, ವಿಷ ದಿಂಜಾವುನ ಬೇಲೆ ಆವೊಂದುಂಡು. ನಮ್ಮ ಧಾರ್ಮಿಕ ಆಚರಣೆಲೆಗ್ ಅಡ್ಡ ಬರ್ಪಿನ ಕಾನೂನುಲು ಇಂಚ ಪುಡಮಿದ ಉಡಲ್ಗ್ ವಿಷ ದಿಂಜಾನಗ ಮನಿಪಂದೆ ಆಪಿನ ಮಾತ್ರ ಬಾರೀ ಸೋದ್ಯದ ವಿಷಯ.
ಕೂಳೂರ್ದಾರ್ ಒರಿ ರೆಕಾರ್ಡ್ ಮಲ್ದಿನ ವೀಡಿಯೋಡು ಬಾರೀ ಬೆಸರ್ದ ವಿಷಯ ಒಂಜಿ ತೋಜೊಂದುಂಡು. ಎಡ್ಡೆ ಇತ್ತಿನ ನೀರ್ ಒಂತೆ ದಿನೊರ್ದಿಂಚಿ ಕಪ್ಪು ಕಟೊಂದು ಬರೊಂದಿತ್ತ್ದ್, ನಾತಲಾ ಬರ್ರೆ ಪತ್ತ್ದ್ಂಡ್. ಪಾಕ ಮೀನ್ಲ್, ಡೆಂಜಿಲು ಸೈತ್ದ್ ನೀರ್ದ ಮಿತ್ತ್ ಪಾಂಬೊದುಲ್ಲ. ಬದ್ಕ್ ಕಟ್ಟ್ದ್ ಕೊರ್ಪುನ ಸುದೆಕ್ ಏರೋ, ಒವ್ವಾ ಕಾರ್ಖಾನೆದಕುಲು ವಿಷ ನೀರ್ ಬುಡೊಂದುಪ್ಪೊಡು ಪನ್ದ್ ಈ ವಿಡಿಯೋಡ್ ಸಮ ತೋಜೊಂದುಂಡು, ನೀರ್ ಆ ಮಟ್ಟ್ಗ್ ಗಲೇಜಿ ಆತ್ಂಡ್.
ಕೂಳೂರು ರಾಯಿಕಟ್ಟೆದಲ್ಪ ಫಲ್ಗುಣಿ ಸುದೆಕ್ ಪೋದು ಗೋಡ್ಯುನ ತೋಡುಡು ಈ ದೃಶ್ಯ ತೂವರೆ ತಿಕ್ಕ್ದ್ಂಡ್. ಸುಮಾರ್ ಒಂಜಿ ವಾರೊರ್ದಿಂಚಿ ಒರರ್ದ್ ಒರಾನೆ ನೀರ್ ಇಂಚ ಕಪ್ಪೇರೊಂದು ಬೈದಿತ್ತ್ದ್, ವಾಸನೆ ಲಕ್ಕೆರೆ ಸುರು ಆತ್ಂಡ್. ಕೈತಲ್ದ ಕಾರ್ಖಾನೆಲು ಕಾನೂನುಗು ತತ್ತ್ದ್ ಸುದೆ ತೋಡುಗು ಕೆಮಿಕಲ್ ವೇಸ್ಟ್ ಬುಡೊಂದುಲ್ಲೆರ್ ಪನ್ದ್ ಊರುದಕ್ಲು ಪನೊಂದುಲ್ಲೆರ್. ಏತ್ ಒಯಿಲ್ ಬರೆಪಾಂಡಲಾ, ಪೊರ್ಮ್ಬಾಟ ಮಲ್ತ್ಂಡಲಾ ಈ ಸಮಸ್ಯೆಗ್ ಪಿರಿಕಟ್ಟ್ ಮಲ್ಪೆರೆ ಅಧಿಕಾರಿಲೆಗ್ ಆವೊಂದಿಜ್ಜಿ ಪನ್ದ್ ನೆಟೆದಕುಲು ಪನೊಂದುಲ್ಲೆರ್.
ಆಯಿನಾತ್ ಬೇಗ ಈ ವಿಷಯೊಡು ಜಡ್ತೆ ಆದ್, ಸಂಬಂಧಿತಿನ ಕಾರ್ಖಾನೆಲೆಗ್ ದಂಡ ಪಾಡ್ದ್, ಕೆಮಿಕಲ್ ವೇಸ್ಟ್ನ್ ಸುದೆಕ್ ಬುಡಂದಿಲೆಕ ಕ್ರಮ ಗೆತೊಂದು, ಪಸಂದ್ರೊನು ಒರಿಪಾವುನಂಚಿ ಅಧಿಕಾರಿಲು ಗೇನ ಕೊರೊಡು.