Last updated on February 17th, 2026 at 02:28 pm
ಬೆಂಗಳೂರು, ಫೆ. 17: ಪೊಲೀಸೆರೆ ಪುದರ್ಡ್ ಇಲ್ಲಗ್ ಪೊಗ್ಗಿನ ಗ್ಯಾಂಗ್, ರಿಯಲ್ ಎಸ್ಟೇಟ್ ಉದ್ಯಮಿನ ಇಲ್ಲರ್ದ್ 20 ಲಕ್ಷ ರೂಪಾಯಿ ಕಾಸ್ ಬೊಕ್ಕ ಸುಮಾರ್ ಅರ್ಧ ಕೆಜಿ ಬಂಗಾರ್ ಕನ್ಡ್ದ್ ಪದ್ರಾಡಾತಿನ ನಡಕೆ ಬೆಂಗಳೂರ್ದ ಬಿಇಎಲ್ ಲೇಔಟ್ಡ್ ನಡತ್ದ್ಂಡ್. ನಾಲ್ ಜನೊತ ಕೂಟ ಈ ಕೃತ್ಯ ಮಲ್ತ್ದ್ಂಡ್ಗೆ, ಆರೋಪಿಲೆನ್ ಪೊಲೀಸೆರ್ ನಾಡೊದುಲ್ಲೆರ್. ಹೊಂಬಾಳೆಗೌಡ ಪನ್ಪಿನಾರೆನ ಇಲ್ಲಡ್ ಕೋಡೆ ಈ ನಡಕೆ ನಡತ್ದ್ಂಡ್.
ಹೊಂಬಳೆಗೌಡ್ರ್ ಬೊಡೆದಿ ಮಂಗಳಮ್ಮ ಬೊಕ್ಕ ಪುಲ್ಲಿಯರ್ಲೆನ ಒಟ್ಟುಗು ಇಲ್ಲಡಿತ್ತಿನ ಪೊರ್ತುಡು ಪೊಲೀಸೆರೆ ಲೆಕ ಆರೋಪಿಲು ಇಲ್ಲಗ್ ಬತ್ತ್ದೆರ್. ಎಂಕ್ಲ ಯಲಹಂಕ ಸ್ಟೇಶನ್ರ್ದ್ ಬತ್ತ್ದ ಪನ್ದ್ ತೆರಿಪಾದಿತ್ತ್ದ್, ಬ್ಯಾಗ್ ಬೊಕ್ಕ ಡೈರಿನ್ಲಾ ಪತೊಂದು ಬತ್ತಿತ್ತೆರ್. ಅಂಚಾದ್ ಸುರುಕು ಇಲ್ಲದಕುಲುಲಾ ಆರೋಪಿಲೆನ ಪಾತೆರ ನಂಬುದಿತ್ತೆರ್. ಆಂಡ ಆರೋಪಿಲು ಬೊಕ್ಕ ಪ್ರಾಯೊದ ದಂಪತಿಲೆನ್ ಬೆಡಿ ಬೊಕ್ಕ ಬೀಸತ್ತಿ ತೋಜಾದ್ ಪೋಡಿಕಟ್ಟಾದ್, ಅಕ್ಲೆನ ಕೈಕಾರ್ನ್ ಕಟ್ಟ್ದ್ ಪಾಡ್ದೆರ್. ಇಡೀ ಇಲ್ಲ್ ಅಡಿಮೇಲ್ ಮಲ್ತ್ ನಾಡ್ನ ಕಲ್ವೆರ್ ಕಾಸ್, ಬಂಗಾರ್ ಬೊಕ್ಕ ಮೊಬೈಲ್ಲೇನ್ ಕನ್ಡ್ದೆರ್. ಇರ್ವೆರ್ ಇಲ್ಲದುಲಯಿ ಪೊಗ್ಗಿಯೆರ್ನ್ಡ ಕುಡ ಇರ್ವೆರ್ ಪಿದಯಿ ಕಾಪುಗು ಉಂತುದಿತ್ತೆರ್ಗೆ.
ನಡಕೆರ್ದ್ ಬೊಕ್ಕ ಹೊಂಬಳೆಗೌಡೆರ್ ಪೊಲೀಸೆರೆಗ್ ಈ ಬಗೆಟ್ ಒಲವು ಕೊರ್ದಿತ್ತ್ದ್, ಪ್ರಕರಣ ದಾಕಲ್ತೊಂದಿನ ಪೊಲೀಸೆರ್ ರಡ್ಡ್ ವಿಶೇಷ ಕೂಟೊಲೆನ್ ಮಲ್ತೊಂದು ಜಡ್ತೆ ಸುರು ಮಲ್ತ್ದೆರ್. ಆರೋಪಿಲು ಕನ್ಡೊನ್ದು ಪೋನಗ ಇಲ್ಲದ ಸಿಸಿಟಿವಿ ಡಿವಿಆರ್ನ್ಲಾ ಲಕ್ಕಾವೊಂದು ಪೋತೆರ್ಗೆ. ಪೊಲೀಸೆರೇ ಏಸೊಡೇ ಆರೋಪಿಲು ಬತ್ತಿನೆರ್ದಾವರ ಏರೆನ್ ನಂಬುನ ಏರೆನ್ ಬುಡ್ಪುನ ಪನ್ದ್ ಜನೊಕುಲು ಮಂಡೆಬೆಚ್ಚಡ್ ಉಲ್ಲೆರ್.