Last updated on February 19th, 2026 at 10:43 am
ಬೆಂಗಳೂರು, ಫೆ. 19: ಕರ್ನಾಟಕ ರಾಜ್ಯ ಸಾರಿಗೆ ನೌಕರೆರ್ ತನ್ಕುಲೆ ಪ್ರಮುಖ ಕಾಯೇಸ್ಲೆನ್ ಈಡೆತ್ತಾಯೆರ ಇನಿ ಬೆಂಗಳೂರು ಚಲೋ ಪೊರ್ಮ್ಬಾಟ ಮಲ್ತೊಂದುಲ್ಲೆರ್. 38 ತಿಂಗೊಲ್ದ ಸಂಬಳ ದುಂಬುದಬಾಕಿ ಕೊರೊಡು ಬೊಕ್ಕ 2024 ಜನವರಿ 1ರ್ದ್ ವೇತನ ಪರಿಷ್ಕರಣೆ ಮಲ್ಪೊಡು ಪನ್ದ್ ನೌಕರೆರ್ ಕಾಯೆಸ್ ಮಲ್ತಿತ್ತ್ದ್, ಸರ್ಕಾರೊದ 26 ತಿಂಗೊಲ್ದ ದುಂಬುದಬಾಕಿ ಕೊರ್ಪುನ ಬೊಕ್ಕ 2025ತ ಏಪ್ರಿಲ್ರ್ದ್ ವೇತನ ಪರಿಷ್ಕರಣೆದ ಪ್ರಸ್ತಾವನೆನ್ ಅಲಕ್ಕ ತಿರಸ್ಕರಿತ್ದೆರ್.
ರಾಜ್ಯೊದ ನಾಲ್ ಸಾರಿಗೆ ನಿಗಮೊಲೆನ ನೌಕರೆರೆ ಕಡೆರ್ದ್ ಬೆಂಗಳೂರ್ದ ಫ್ರೀಡಂ ಪಾರ್ಕ್ಡ್ ಬೆಂಗಳೂರು ಚಲೋ ಪೊರ್ಮ್ಬಾಟ ನಡತೊಂದಿತ್ತ್ದ್, ಬಯ್ಯ 4 ಗಂಟೆಗ್ ಜಂಟಿ ಕ್ರಿಯಾ ಸಮಿತಿ ಸುದ್ದಿಗೋಷ್ಠಿ ಮಲ್ತ್ದ್ ತನ್ಕುಲೆ ನನದ ನಿರ್ಧಾರೊನು ತೆರಿಪಾವೆರ್. ಶುಕ್ರವಾರ (ಎಲ್ಲೆ) ಕಾಂಡೆರ್ದೇ ರಾಜ್ಯೊಡೊರ್ಮೆ ಬಸ್ ಸಂಚಾರೊನು ಉಂತಾದ್ ಸಂಪೂರ್ಣ ಮುಷ್ಕರೊಗು ಲೆಪ್ಪು ಕೊರ್ಪುನ ಸಾಧ್ಯತೆ ಎಚ್ಚ ಉಂಡು. ಎಂಕುಲು ಬಂಙೊಡು ಬೆನ್ಪುನಕುಲು. ಎಂಕ್ಲೆನ ಬೆನ್ಪಟಿಗೆಗ್ ತಕ್ಕ ಪ್ರತಿಫಲೊನು ಕೇನೊಂದುಲ್ಲ. ಈ ವಿಚಾರೊಡು ಒವ್ವೇ ನೆವನೊಗ್ಲಾ ರಾಜಿ ಆಪಿನ ಪ್ರಶ್ನೆನೇ ಇಜ್ಜಿ ಪನ್ದ್ ಜಂಟಿ ಕ್ರಿಯಾ ಸಮಿತಿದ ನಾಯಕೆರ್ ಸ್ಪಷ್ಟ ಮಲ್ತ್ದೆರ್.
ಈ ಬಗೆಟ್ ಪಾತೆರ್ನ ಉಪಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಮೇರ್, 26 ತಿಂಗೊಲ್ದ ದುಂಬುದ ಬಾಕಿ ಕೊರ್ಯೆರ ನಿರ್ಧಾರ ಮಲ್ತ್ದ. ನೌಕರೆರ್ ಉಂದೆಕ್ ಕುಸಿ ಆವೊಡು ಅಂಚೆನೇ ಸರ್ಕಾರೊದ ಪರಿಸ್ಥಿತಿನ್ ಅರ್ಥ ಮಲ್ತೊನೊಡು ಪನ್ದ್ ಕೇನೊಂದೆರ್. 38 ತಿಂಗೊಲು ಕೇನ್ದಿತ್ತೆರ್, 26 ತಿಂಗೊಲ್ದ ಕೊರ್ತ. ಇತ್ತೆ ಈತಾಂಡಲಾ ಕೊರ್ತೆರತಾ ಪನ್ದ್ ಕುಸಿ ಪಡೆವೊಡು. ಸರ್ಕಾರೊದ ಪರಿಸ್ಥಿತಿ ಅರ್ಥ ಮಲ್ತೊನ್ಲೆ. ದಯದೀದ್ ಸಾರಿಗೆ ನೌಕರೆರ್ ಮಾತಾ ಸಾಕಾರ ಮಲ್ಪೊಡು ಪನ್ದ್ ಆರ್ ಕೇನೊನ್ದೆರ್. ಆಂಡ, ಸಾರಿಗೆ ನೌಕರೆರೆ ಸಂಘೊ ಸರ್ಕಾರೊದ ಈ ಪ್ರಸ್ತಾವನೆನ್ ತಿರಸ್ಕರಿತ್ದಿತ್ತ್ದ್, ತನ್ಕುಲೆ ಕಾಯೆಸ್ಲೆನ್ ಈಡೆತ್ತಾಯೆರ ಪೊರ್ಮ್ಬಾಟ ದುಂಬರಿಪೆರ ನಿರ್ಧಾರ ಮಲ್ತ್ದ್ಂಡ್. ಇನಿ ಬಯ್ಯದ ಸಭೆರ್ದ್ ಬೊಕ್ಕ ಬಸ್ ಸಂಚಾರೊದ ಭವಿಷ್ಯ ನಿರ್ಧಾರ ಆಪುಂಡು.