Last updated on February 26th, 2026 at 12:21 pm
ಕೀನ್ಯಾ, ಫೆ. 26: ಕೀನ್ಯಾದ ಜವನೆ ನಾಯಕೆ ಒರಿ ಭಗವದ್ಗೀತೆ ಪತೊಂದು ಪ್ರಮಾಣವಚನ ಗೆತೊಂದಿನ ಫೋಟೊ ಒರ್ಮೆಲ ವೈರಲ್ ಆತ್ಂಡ್. ಈ ಜವನಟಿಗೆದ ನಾಯಕನ ಪುದರ್ ಕ್ಯಾಲೆಬ್. ಮೊಂಬಾಸಾದ ಕೌಂಟಿದ ವಿಧಾನಸಭೆಟ್ ಈ ನಡಕೆ ನಡತ್ದ್ಂಡ್.
ಮೊಂಬಾಸಾ ಕೌಂಟಿದ ಚಂಗಮ್ವೆ ಕ್ಷೇತ್ರೊದ ಪ್ರತಿನಿಧಿ ಆದ್ ಯುವ ಶಾಸಕೆ ಕ್ಯಾಲೆಬ್ ಪ್ರಮಾಣವಚನ ಗೆತೊನರೆ ಭಗವದ್ಗೀತೆದ ಒಟ್ಟುಗು ಬತ್ತಿತ್ತೆರ್. ಈ ಬಗೆಟ್ ಇಸ್ಕಾನ್ದ ಓಂಕಾರ ಮುಕುಂದ ದಾಸ್ ಪಾತೆರ್ದ್, ಈ ನಡಕೆ ನಾಟಕೀಯ ಅತ್ತ್, ಪ್ರಚಾರೊಗ್ಲಾ ಅತ್ತ್, ಆ ಭಾವ ಆರೆನ ಉಡಲ್ಡೇ ಪುಟ್ಟುದ್ಂಡ್, ಅವ್ವೇ ಸತ್ಯ ಪನ್ದ್ ಪನ್ಡೆರ್. ಸಾರ್ವಜನಿಕ ಹುದ್ದೆ ಎಚ್ಚಾದ್ ಪ್ರಬಲ ಧಾರ್ಮಿಕ ಸಂಪ್ರದಾಯೊಲೆನ ಜನೊಕ್ಲೆಡ ಇಪ್ಪುನ ದೇಶೊಡು, ಭಗವದ್ಗೀತೆದ ಮಿತ್ತ್ ಪ್ರಮಾಣ ಮಲ್ದಿನ ಕ್ಯಾಲೆಬ್ ರೆನ ನಿರ್ಧಾರ ಪೊಸ ಭರವಸೆ ಉಂಡುಮಲ್ದ್ಂಡ್ ಪನ್ದ್ ಆರ್ ಪನ್ಡೆರ್.
ಕ್ಯಾಲೆಬ್ ಹರೇ ಕೃಷ್ಣ ಸಮುದಾಯೊಡು ಇಪ್ಪುನ ಭಕ್ತೆ, ಆರೆನ ಪಲಯನ ಮುಕೇನ ಇಸ್ಕಾನ್ದ ಒಟ್ಟುಗು ಗೋಡ್ಯೊಂದೆರ್. ಮೊಂಬಾಸಾದ ವಿದ್ಯಾರ್ಥಿಲೆಡ ವೈಷ್ಣವ ಸಂಸ್ಕೃತಿನ್ ಪಸೆರಾಯೆರೆ 2021 ಟ್ ಉಂಡು ಮಲ್ದಿನ ವಿಶ್ವವಿದ್ಯಾಲಯ ಆಧಾರಿತ ಉಪಕ್ರಮ ಆಯಿನ ದಿ ಬೆಟರ್ ಯು ಕ್ಲಬ್ದ ಅಧ್ಯಕ್ಷೆ ಆದ್, ಕ್ಯಾಲೆಬ್ ಕ್ಲಬ್ ನ್ 180 ಪದುಕೆರೆ ಮುಟ್ಟ ಬುಲೆಪಾಯೆರ ಸಕಾಯ ಮಲ್ತ್ದೆರ್.
ವಿಧಾನಸಭೆತ ಪದುಕೆರೆ ಎದುರುಡು ಕ್ಯಾಲೆಬ್ ‘ಭಗವದ್ಗೀತಾ ಆ್ಯಸ್ ಇಟ್ ಈಸ್’ ಮಸ್ತಿರೆನ್ ದೆರ್ತ್ ಪತ್ತ್ದ್ ಪ್ರಮಾಣ ವಚನ ಗೆತೊಂಡೆರ್. ಮೊಂಬಾಸಾ ಯುವ ಅಸೆಂಬ್ಲಿ ಕೀನ್ಯಾ ಯುವ ಅಸೆಂಬ್ಲಿದ ಕಟ್ಟ್ಲೆನ ಅಡಿಟ್ ನಡಪುಂಡು. ಉಂದು ಯುವ ನಾಯಕೆರೆಗ್ ಔಪಚಾರಿಕ ರಾಜಕೀಯೊಗು ದುಂಬು ಜವಾಬ್ದಾರಿನ್ ಅಭ್ಯಾಸ ಮಲ್ಪುನ ಮಿತ್ತರ್ಮೆ ಆದುಂಡು.