Last updated on February 28th, 2026 at 09:05 am
ಕುಡ್ಲ, ಫೆ. 28: ಕುಂಟಿಕಾನದ ಕೈತಲ್ ಜೋಕುಲೆನ್ ಕನ್ಡ್ದ್ ಕೊನೊಪುನಕುಲು ಬೈದೆರ್ ಪನ್ಪಿ ಕಲು ಸುದ್ದಿ ಶುಕ್ರವಾರ ಕಾಂಡೆ ವೈರಲ್ ಆದ್ ಸಾರ್ವಜನಿಕೆರೆಗ್ ಬಾರೀ ಪೋಡಿಗೆ, ಮಂಡೆಬೆಚ್ಚ ಉಂಡು ಮಲ್ತಿತ್ತ್ಂಡ್. ಆಂಡ, ಕದ್ರಿ ಪೊಲೀಸೆರೆ ಸಮಗ್ರ ಜಡ್ತೆರ್ದ್ ಬೊಕ್ಕ, ಈ ವರದಿಲು ಅಲಕ್ಕ ಕಲು ಪನ್ದ್ ಸ್ಪಷ್ಟ ಮಲ್ತ್ದೆರ್.
ವಾಟ್ಸ್ಆ್ಯಪ್ಡ್ ತಿರ್ಗೊಂದುಪ್ಪುನ ಸುದ್ದಿಲು ಅಲಕ್ಕ ಸುಳ್ಳು. ಏರ್ಲಾ ಪೋಡ್ಯೊರ್ಚಿ ಪನ್ದ್ ಮಾತಾ ರೀತಿದ ವದಂತಿಲೆಗ್ ಮಂಗಳ ಪನ್ತೆರ್.
ಗುರುವಾರ ಬಯ್ಯಡ್ ಕುಂಟಿಕಾನದ ಕೈತಲ್ ನಡತೊಂದು ಪೋವೊಂದಿತ್ತಿನ ಆಣ್ ಒರಿ ಅಲ್ಪ ಇತ್ತಿನ ರಿಕ್ಷಾಡ್ ಜೋಕುಲು ಬುಲ್ಪುನೆನ್ ಕೇನ್ದ್, ತನ್ನ ದೋಸ್ತಿಗ್ ಜೋಕುಲೆನ್ ಕನ್ಡುನಕುಲು ಬೈದೆರ್, ಜೋಕುಲೆನ್ ಕಿಡ್ನಾಪ್ ಮಲ್ತೊಂದುಲ್ಲೆರ್ ಪನ್ದ್ ಪನ್ದಿತ್ತೆ. ಆಣನ ದೋಸ್ತಿ ತನ್ನ ಗುರ್ತದ ಪೊಂಜೊವು ಒರ್ತಿಗ್ ಅವೆನ್ ಪನ್ತೆ.
ಆರ್ ವಾಟ್ಸಾಪ್ಡ್ ಈ ಬಗೆಟ್ ವಾಯ್ಸ್ ಮೆಸೇಜ್ ಪಾಡ್ದೆರ್. ಒಟ್ಟುಗು ಅವೆನ್ ಕೇನ್ಡಿನ ಅಂಗನವಾಡಿ ಟೀಚರ್ಲಾ ಮಾತೆರ್ಲಾ ಜಾಗ್ರ್ತೆಡ್ ಇಪ್ಪುಲೆ ಪನ್ದ್ ವಾಯ್ಸ್ ಮೆಸೇಜ್ ಪಾಡ್ದೆರ್. ಉಂದು ಮಾತಾ ಗ್ರೂಪ್ಲೆಗ್ ಪೋಯಿನೆರ್ದಾವರ ಅಲ್ಪದ ಜನೊಕುಲು ಪೋಡಿದೆರ್. ಈ ಬಗೆಟ್ ಜಡ್ತೆ ಮಲ್ತ್ದ್ ಆ ಆಣನ ವಿಚಾರಣೆ ಮಲ್ತಿ ಬೊಕ್ಕ ಉಂದೊಂಜಿ ವದಂತಿ, ಕಲು ಸುದ್ದಿ ಪನ್ದ್ ತೆರಿದ್ ಬೈದ್ಂಡ್.