Last updated on March 11th, 2026 at 12:26 pm
ಮಂಡ್ಯ, ಮಾ.11: ಅನೈತಿಕ ಸಂಬಂಧೊಗು ತಲೆಪು ಆದಿತ್ತಿನ ಕಂಡನ್ಯನ್ ಬೊಡೆದಿಯೇ ತನ್ನ ಲವರ್ ಬೊಕ್ಕ ಆಯನ ದೋಸ್ತಿನಕಲೆಡ ಕೆರ್ಪಾದಿನ ನಡಕೆ ಮಂಡ್ಯ ಜಿಲ್ಲೆದ ಶ್ರೀರಂಗಪಟ್ಟಣ ತಾಲೂಕ್ದ ಮರಳಗಾಲಡ್ ಬೊಲ್ಪುಗು ಬೈದ್ಂಡ್. ಅರ್ಚಕೆ ಸಿದ್ದಲಿಂಗಪ್ಪೆ (46) ತೀರ್ದಿನಾರ್. ಪ್ರಕರಣೊಗು ಸಂಬಂಧಿತ್ದ್ ಬೊಡೆದಿ ಶಾಲಿನಿ, ಚಂಗಾಯಿ ಹರೀಶ್ ಬೊಕ್ಕ ಆಯನ ಇರ್ವೆರ್ ದೋಸ್ತಿಲೆನ್ ಪೊಲೀಸೆರ್ ಕೈದ್ ಮಲ್ತ್ದೆರ್. ಮಾ. 6ತಾನಿ ಸಿಡಿಎಸ್ ತೋಡುಡು ಸಿದ್ದಲಿಂಗಪ್ಪೆ ಪುನ ಆದ್ ತಿಕ್ಕ್ದೆರ್. ಆರೆನ ಜೋಡು ತಿಕ್ಕಿನ ಜಾಗೆಡ್ ನೆತ್ತೆರ್ದ ಕಲೆ ಇತ್ತಿನೆರ್ದಾವರ ಪೊಲೀಸೆರೆಗ್ ಅನುಮಾನ ಬತ್ತ್ದ್ ಜಡ್ತೆನ್ ಒಂತೆ ಚುರ್ಕ್ ಮಲ್ಪುನಗ ಈ ಸತ್ಯ ತೆರಿದ್ ಬೈದ್ಂಡ್.
ಮರಳಗಾಲ ಗ್ರಾಮೊದ ಅರ್ಚಕೆ ಸಿದ್ದಲಿಂಗಪ್ಪೆ ಬೊಕ್ಕ ಬೊಡೆದಿ ಶಾಲಿನಿಗ್, ಇರ್ವೆರ್ ಜೋಕುಲು ಇತ್ತ್ದ್, ಸುಖೊಟು ಜೂವನ ಕರಿತೊಂದುಪ್ಪುನಗ, ಅವ್ವೇ ಗ್ರಾಮೊದ ಹರೀಶ್ ಪನ್ಪಿನಾಯನ ಒಟ್ಟುಗು ಶಾಲಿನಿ ಅನೈತಿಕ ಸಂಬಂಧ ಬುಲೆಪಾವೊಂದಲ್. ಒಂಜರೆ ವರ್ಸೊಗು ದುಂಬು ಸಿದ್ದಲಿಂಗಪ್ಪಗ್ ಈ ವಿಷಯ ತೆರಿದ್ ಬೊಡೆದಿನ್ ರೆಡ್ ಹ್ಯಾಂಡ್ ಆದ್ ಪತ್ತ್ದಿತ್ತೆರ್. ಅಪಗ ಬೊಡೆದಿಗ್ ಬುದ್ಧಿಪಾತೆರ ಪನ್ಡ್ದ್ ಎಡ್ಡೆಸಾದಿಗ್ ಕನಯೆರ ತೂದಿತ್ತೆರ್. ಆಂಡ ಬೊಡೆದಿ ಶಾಲಿನಿ ಮಾತ್ರ ತನ್ನ ಕಾಮದ ಗೊಬ್ಬುಗು ಕಂಡನೆ ತಲೆಪು ಆದುಲ್ಲೆ ಪನ್ದ್ ಆಯನ್ ಕೆರ್ಯೆರ ಸ್ಕೆಚ್ ಪಾಡ್ದಿತ್ತಲ್.
ಮಾರ್ಚ್ 6ತಾನಿ ಸಿದ್ದಲಿಂಗಪ್ಪೆ ಪೂಜೆಗ್ ಬರಿತ ಊರ್ಗ್ ಪೋದಿಪ್ಪುನಗ, ಶಾಲಿನಿ ತನ್ನ ಚಂಗಾಯಿ ಹರೀಶ್ಗ್ ಮೆಸೇಜ್ ಮಲ್ತ್ದ್ ಕಂಡನೆ ಪಿದಯಿ ಪೋತಿನ ಬಗೆಟ್ ಒಲವು ಕೊರ್ತಲ್. ಸಿದ್ದಲಿಂಗಪ್ಪೆ ಪೂಜೆ ಮಲ್ತ್ದ್ ಬೈಕ್ಡ್ ಮರಳಗಾಲದ ಪುಣಿಟೆ ಬನ್ನಗ, ಹರೀಶ್ ಬೊಕ್ಕ ಆಯನ ದೋಸ್ತಿಲಾಯಿನ ಸಂತೋಷ್ ಬೊಕ್ಕ ಗಣೇಶ್ ಅಡ್ಡಕಟ್ಟ್ದೆರ್. ಸಿದ್ದಲಿಂಗಪ್ಪನ ತರೆಕ್ ಸೋಂಟೆಡ್ ಜೋರುಡು ಆಕ್ದ್ ಕೆರ್ನ ಆರೋಪಿಲು, ಸಾಕ್ಷ್ಯ ನಾಶ ಮಲ್ಪೆರ ಪುನ ಬೊಕ್ಕ ಬೈಕ್ ನ್ ಸಿಡಿಎಸ್ (CDS) ತೋಡುಗು ದಕ್ಕ್ದ್ ಪದ್ರಾಡಾದಿತ್ತೆರ್.
ಪೋಲೀಸೆರೆಗ್ ಅಲ್ಪನೇ ಕರೆಟ್ ಸಿದ್ದಲಿಂಗಪ್ಪನ ಜೋಡು ಬೊಕ್ಕ ಕುಂಟು ತಿಕ್ಕ್ನಗ ನೆತ್ತೆರ್ದ ಕಲೆಕುಲು ತೋಜಿದ್ ಬತ್ತಿತ್ತ. ಉಂದು ಕಾಲಿ ಆ್ಯಕ್ಸಿಡೆಂಟ್ ಅತ್ತ್, ಕೆರ್ದುಪ್ಪೆರ ಯಾರು ಪನ್ಪಿ ಸಂಶಯೊಡು ಶ್ರೀರಂಗಪಟ್ಟಣ ಗ್ರಾಮಾಂತರ ಪೊಲೀಸೆರ್ ಜಡ್ತೆ ಮಲ್ಪುನಗ ಶಾಲಿನಿನ ಅಕ್ರಮ ಸಂಬಂಧೊದ ವಿಷಯ ತೆರಿದ್ ಬೈದ್ಂಡ್. ಈ ಬಗೆಟ್ ಅಕಲೆನ್ ವಶೊಕು ಗೆತೊಂದು ವಿಚಾರಣೆ ಮಲ್ಪುನಗ ಆರೋಪಿಲು ಕೃತ್ಯ ಮಲ್ತ್ದಿನೆನ್ ಒತ್ತೊಂದೆರ್.