Last updated on March 18th, 2026 at 11:46 am
ಕುಡ್ಲ, ಮಾ. 18: ದೊಂಬು, ಸೆಖೆ ಎಚ್ಚ ಆದ್ ಬೆಯ್ತ್ ಪೋದಿತ್ತಿನ ಜನೊಕ್ಲೆಗ್ ಅಲ್ಪಲ್ಪ ಎಡ್ಡೆ ಬರ್ಸ ಬತ್ತ್ದ್ ಒಂತೆ ತಂಪಾತ್ಂಡ್. ತುಳುನಾಡ್ ಬೊಕ್ಕ ಕರ್ನಾಟಕೊದ ಬೇತೆ ಜಿಲ್ಲೆಲೆಡ್ ಮಾರ್ಚ್ 18 ರ್ದ್ 23 ಮುಟ್ಟ ಸಾಧಾರಣ ಬರ್ಸ ಬರ್ಪಿನ ಸಾಧ್ಯತೆ ಉಂಡು ಪನ್ದ್ ಹವಾಮಾನ ಇಲಾಖೆ ಸೂಚನೆ ಕೊರ್ತುಂಡು.
ಬುಧವಾರ ಮಂಗಳೂರು ಬೊಕ್ಕ ಒಡಿಪು ಜಿಲ್ಲೆಲೆನ ಕೆಲ ಕಡೆಟ್ ತೆಡಿಲ್ದ ಒಟ್ಟುಗು ಒಂತೆ ಬರ್ಸ ಬರ್ಪಿನ ಸಾಧ್ಯತೆ ಉಂಡು. ಬೀದರ್, ಕಲಬುರ್ಗಿ, ಯಾದಗಿರಿ, ರಾಯಚೂರು, ಬೆಳಗಾವಿ ಬೊಕ್ಕ ಧಾರವಾಡ ಜಿಲ್ಲೆಲೆಡ್ ಮಧ್ಯಮ ಬರ್ಸ ಬರು. ಬೆಂಗಳೂರು, ಮೈಸೂರು, ಕೊಡಗು, ಶಿವಮೊಗ್ಗಡ್ ಗಂಟೆಗ್ 40-50 ಕಿ.ಮೀ ಬೀಸದ ಸುಯಿಗಾಳಿದೊಟ್ಟುಗು ಬರ್ಸ ಬರ್ಪಿನ ಸಾಧ್ಯತೆ ಉಂಡು.
ಕರಿನ ವಾರ 40 ಡಿಗ್ರಿ ಸೆಲ್ಸಿಯಸ್ ಎತ್ತ್ದಿತ್ತಿನ ಕಲಬುರ್ಗಿದ ಗರಿಷ್ಠ ತಾಪಮಾನ ಅಂಗಾರೆ 38 ಡಿಗ್ರಿ ಸೆಲ್ಸಿಯಸ್ಗ್ ಜತ್ತ್ದ್ಂಡ್. ಗುರುವಾರರ್ದ್ ತುಳುನಾಡ್ ಬೊಕ್ಕ ಮಲೆನಾಡ್ ಭಾಗೊದ ಒಟ್ಟುಗು ಕೋಲಾರ, ಚಿಕ್ಕಬಳ್ಳಾಪುರ ಬೊಕ್ಕ ಮಂಡ್ಯ ಜಿಲ್ಲೆಲೆಡ್ಲಾ ಬರ್ಸದ ಅಬತರ ತೂವರೆ ತಿಕ್ಕು ಪನ್ದ್ ಇಲಾಖೆ ತೆರಿಪಾದ್ಂಡ್.