Last updated on March 22nd, 2026 at 09:12 am
ಬೆಂಗಳೂರ್, ಮಾ. 22: ಪುಟ್ಟುರ್ದೇ ಹೈಪರ್ಇನ್ಸುಲಿನಿಸಮ್ (Congenital Hyperinsulinism) ಪನ್ಪಿನ ಅಪರೂಪೊದ ಸೀಕ್ಡ್ ನರೆಲೊಂದಿತ್ತಿನ 16 ದಿನೊತ ಪುರುಬಾಲೆಗ್ ರೋಬೋಟಿಕ್ ಸರ್ಜರಿ ವೈಟ್ಫೀಲ್ಡ್ದ ಮಣಿಪಾಲ್ ಆಸ್ಪತ್ರೆಡ್ ಯಶಸ್ವಿಯಾದ್ ನಡತ್ದ್ಂಡ್. ಬಾರೀ ಗಾತಿದ ಹೈಪೋಗ್ಲೈಸೀಮಿಯಾ (ನೆತ್ತೆರ್ಡ್ ಸಕ್ಕರೆದಂಶೊದ ಪ್ರಮಾಣ ಅಲಕ್ಕ ಕಮ್ಮಿ ಆಪುನು) ರ್ದಾವರ ಬಾಲೆಗ್ ಶಾಶ್ವತ ಬೊಂಡು ಹಾನಿದ ಉಂಬರೊ ಆದಿತ್ತ್ಂಡ್. 4.6 ಕೆ.ಜಿ ತೂಕ ಇತ್ತಿನ ಈ ಪುರುಬಾಲೆಗ್ ಎಚ್ಚಿಗೆ ಪ್ರಮಾಣೊದ ಇಂಟ್ರಾವೀನಸ್ ಗ್ಲೂಕೋಸ್ ಕೊರೊಂದಿತ್ತ್ಂಡಲಾ ನೆತ್ತೆರ್ಡ್ ಸಕ್ಕರೆದಂಶ ಒರಾನೆ ಅಲಕ್ಕ ಕಮ್ಮಿ ಆವೊಂದಿತ್ತ್ಂಡ್. ಅಂಚಾದ್ ಈ ತುರ್ತು ಚಿಕಿತ್ಸೆ ಮಲ್ತ್ದೆರ್.
ರೋಬೋಟಿಕ್ ಸರ್ಜರಿ ದಾಯೆ?
ಬಾಲೆದ ಪ್ರಾಯ ಬೊಕ್ಕ ಸಮಸ್ಯೆದ ಗಂಭೀರತೆನ್ ತೂವೊಂದು, ಡಾಕ್ಟರ್ನಕುಲು ರೋಬೋಟಿಕ್ ಸರ್ಜರಿನ್ ಅಜತ್ದೆರ್. ಇಂದೆತ ಮುಕೇನ ಸಮಸ್ಯೆ ಇತ್ತಿನ ಭಾಗೊಡು ನಿಖರವಾದ್ ಸರ್ಜರಿ ಮಲ್ತ್ದೆರ್. ಒವ್ವೇ ನೆತ್ತೆರ್ ಪೋಪುನ ಅತ್ತ್ಂಡ ಸಂಕೀರ್ಣತೆ ದಾಂತೆ ಸರ್ಜರಿ ಯಶಸ್ವಿಯಾದ್ ನಡತ್ದ್ಂಡ್. ಬೊಕ್ಕ ಬಾಲೆದ ನೆತ್ತೆರ್ಡ್ ಸಕ್ಕರೆದಂಶ ಅಪಗನೇ ಸಾಮಾನ್ಯ ಆತಿನತ್ತಂದೆ, ಗ್ಲೂಕೋಸ್ ಕೊರ್ಪುನ ಅಗತ್ಯೊಲಾ ಬೈದಿಜಿ. ಬಾಲೆನ್ ಒರ್ಮ್ಬ ದಿನೊ ಮುಟ್ಟ ನವಜಾತ ಶಿಶು ತೀವ್ರ ನಿಗಾ ಘಟಕೊಡು (NICU) ದೀದ್, ಆರೋಗ್ಯ ಸಮ ಆವೊಂದು ಬತ್ತಿನೇ ಇಲ್ಲಗ್ ಕಡಪುಡ್ದೆರ್ ಪನ್ದ್ ದಿ ನ್ಯೂ ಇಂಡಿಯನ್ ಎಕ್ಸ್ಪ್ರೆಸ್ ವರದಿ ಮಲ್ತ್ದ್ಂಡ್.