ಭಾರತ ಸರ್ಕಾರ ಪೆಟ್ರೋಲ್, ಡೀಸೆಲ್‌ದ ಮಿತ್ತ್‌ದ ಅಬಕಾರಿ ಟ್ಯಾಕ್ಸ್ ಕಮ್ಮಿ ಮಲ್ತಿನಿ ದಾಯೆ? ಪೆಟ್ರೋಲ್ ಡೀಸೆಲ್‌ದ ರೇಟ್ ತಗ್ಗುಂಡಾ?

Last updated on March 27th, 2026 at 01:53 pm

ದೆಲ್ಲಿ, ಮಾರ್ಚ್ 27: ಅಂತಾರಾಷ್ಟ್ರೀಯ ಮಟ್ಟೊಡು ಕ್ರೂಡ್ ಆಯಿಲ್‌ದ ಬಿಲೆ ಎಚ್ಚ ಆವೊಂದುಪ್ಪುನವು ದೇಶೊದ ಆಯಿಲ್ ಮಾರ್ಕೆಟ್ ಕಂಪೆನಿಲೆನ ಮಿತ್ತ್ ಭಾರಿ ಒತ್ತಮೆ ಪಾಡ್ದಿತ್ತ್ಂಡ್, ಕಂಪೆನಿಲೆನ ನಷ್ಟ ಏರೊಂದಿತ್ತ್ಂಡ್. ಇತ್ತೆ ಕೇಂದ್ರ ಸರ್ಕಾರ ಅಬಕಾರಿ ಸುಂಕ(Excise Duty) ನ್ ಕಮ್ಮಿ ಮಲ್ಪರೆ ಅಟ್ಟನೆ ಮಲ್ತಿತ್ತ್‌ದ್, ಆಯಿಲ್ ಕಂಪೆನಿಲೆಗ್ ಕುಸಿತ ಸುದ್ದಿ ಕೊರ್ತುಂಡು. ಪಡ್ಡಾಯಿ ಏಷ್ಯಾಡ್ ನಡತೊಂದುಪ್ಪುನ ಕೊಲಲ ಬೊಕ್ಕ ಅವೆತ ಪರಿಣಾಮೊರ್ದಾವರ ಉಂಡಾತಿನ ಇಂಧನೊದ ತಲೆಪುದ ನಡುಟು, ಸರ್ಕಾರ ಒಂಜಿ ಮಲ್ಲ ಪಜ್ಜೆ ದೀತ್ಂಡ್.

ಮಾರ್ಚ್ 26 ತಾನಿ ಪಣವು ಸಚಿವಾಲಯ ಪಿದಡ್ಪಾದಿನ ಅಧಿಸೂಚನೆದ ಪ್ರಕಾರ, ಪೆಟ್ರೋಲ್ ಬೊಕ್ಕ ಡೀಸೆಲ್‌ದ ಮಿತ್ತ್ ಇತ್ತಿನ ಅಬಕಾರಿ ಸುಂಕೊನು ಲೀಟರ್‌ಗ್ 10 ರೂಪಾಯಿದಾತ್ ಕಮ್ಮಿ ಮಲ್ಪೆರೆ ಸರ್ಕಾರ ನಿರ್ಧಾರ ಗೆತೊಂದುಂಡು. ಈ ಕ್ರಮೊತ ಬೆರಿಟೆ, ದುಂಬು 13 ರೂಪಾಯಿ ಇತ್ತಿನ ಪೆಟ್ರೋಲ್‌ದ ಅಬಕಾರಿ ಸುಂಕ ಇತ್ತೆ 3 ರೂಪಾಯಿಗ್ ಜತ್ತ್‌ದ್ಂಡ್ ಅಂಚೆನೇ ದುಂಬು 10 ರೂಪಾಯಿ ಇತ್ತಿನ ಡೀಸೆಲ್‌ದ ಅಬಕಾರಿ ಸುಂಕ ಇತ್ತೆ ಪುಜ್ಯ(0) ಆತ್ಂಡ್.

ಸಚಿವೆ ಹರ್ದೀಪ್ ಸಿಂಗ್ ಪುರಿ ಪಾತೆರ್ದ್, ನರೇಂದ್ರ ಮೋದಿ ಸರ್ಕಾರೊದ ಎದುರು ಕಾಲಿ ರಡ್ಡ್ ಅಜಪುಲು ಇತ್ತ, ಒಂಜಿ ಬೇತೆ ಮಾತಾ ದೇಶೊಲು ಮಲ್ತಿಲೆಕ ಬಿಲೆನ್ ಎಚ್ಚ ಮಲ್ಪುನು ಅತ್ತ್ಂಡ ಅಂತಾರಾಷ್ಟ್ರೀಯ ಎಚ್ಚಿಕಮ್ಮಿಲೆರ್ದ್ ಭಾರತೀಯ ನಾಗರಿಕೆರೆನ್ ರಕ್ಷಿಪೆರೆ ಬೋಡಾದ್ ಅವೆತ ಕಾಸ್‌ದ ಪುದೆನ್ ತಾನೇ ತುಂಬುನು.

ಆಯಿಲ್ ಕಂಪನಿಲೆಗ್ ಮಲ್ಲ ಪಿರಿಕಟ್ಟ್
ಪಡ್ಡಾಯಿ ಏಷ್ಯಾಡ್ ನಡತೊಂದುಪ್ಪುನ ಕೊಲಲದ ನಡುಟು ಜಾಗತಿಕ ಕಚ್ಚಾ ತೈಲದ ಬಿಲೆ ಏರೊಂದುಪ್ಪುನ ಸಮಸ್ಯೆನ್ ತೂವೋಂದುಪ್ಪುನ ತೈಲ ಮಾರ್ಕೆಟ್ ಕಂಪೆನಿಲಾಯಿನ HPCL, BPCL ಬೊಕ್ಕ IOC ಲೆಗ್ ಪಿರಿಕಟ್ಟ್ ಕೊರ್ಯೆರ ಈ ಕ್ರಮ ಗೆತೊಂದೆರ್. ಈ ಕ್ರಮ ಇತ್ತೆರ್ದೇ ಜಾರಿಗ್ ಬರ್ಪುಂಡು ಪನ್ದ್ ಸಚಿವಾಲಯ ತೆರಿಪಾದ್ಂಡ್. ಪಶ್ಚಿಮ ಏಷ್ಯಾಡ್ ನಡತೊಂದುಪ್ಪುನ ಕೊಲಲರ್ದಾವರ, ಅಂತರರಾಷ್ಟ್ರೀಯ ಆಯಿಲ್ ಬಿಲೆ ಸುಮಾರ್ 50% ಎಚ್ಚ ಆತ್ಂಡ್. ಆಂಡಲಾ, ಈ ಅರ್ಗಂಟ್‌ದ ನಡುಟುಲಾ, ಸರ್ಕಾರ ಪೆಟ್ರೋಲ್ ಬೊಕ್ಕ ಡೀಸೆಲ್ ಬಿಲೆನ್ ಸ್ಥಿರವಾದ್ ಒರಿತೊಂದು ಬೈದ್ಂಡ್, ಅಂಚಾದ್ ದೇಶೊದ ಇಂಧನ ಮಾರ್ಕೆಟ್ ಕಂಪೆನಿಲು ಪ್ರೆಷರ್‌ಡ್ ಉಲ್ಲ.

ತೈಲ ಮಾರ್ಕೆಟ್ ಕಂಪೆನಿಲೆನ ನಷ್ಟ ಕಮ್ಮಿ ಆಪುಂಡು
ಕಚ್ಚಾ ತೈಲದ ಏವರೇಜ್ ಬಿಲೆ ಬ್ಯಾರೆಲ್‌ಗ್ 100-105 ಡಾಲರ್‌ದಾತ್ ಇತ್ತ್ಂಡ, ಇಂಧನ ಕಂಪೆನಿಲು ಪೆಟ್ರೋಲ್‌ಗ್ ಲೀಟರ್‌ಗ್ 11 ರೂ ಬೊಕ್ಕ ಡೀಸೆಲ್‌ಗ್ ಲೀಟರ್‌ಗೆ 14 ರೂ ನಷ್ಟ ತಿನೊಡಾಪುಂಡು. ಈ ತಿಂಗೊಲ್ದ ಸುರುಟು, ಅಂತಾರಾಷ್ಟ್ರೀಯ ತೈಲ ಬಿಲೆ ಬ್ಯಾರೆಲ್‌ಗ್ 119 ಡಾಲರ್ ಆದಿತ್ತ್ಂಡ್, ಬೊಕ್ಕ ಅವು ಬ್ಯಾರೆಲ್‌ಗ್ ಸುಮಾರ್ 100 ಡಾಲರ್‌ಗ್ ಜತ್ತ್‌ದ್ಂಡ್. ಇತ್ತೆ, ದೆಲ್ಲಿಡ್ ಪೆಟ್ರೋಲ್ ಬಿಲೆ ಲೀಟರ್‌ಗ್ 94.77 ರೂ ಬೊಕ್ಕ ಡೀಸೆಲ್ ಲೀಟರ್‌ಗ್ 87.67 ರೂ. ಡ್ ಉಂತುದುಂಡು.

ಭಾರತ ತನ್ನ ಒಟ್ಟು ಕಚ್ಚಾ ತೈಲೊದ ಅಗತ್ಯೊದ ಸುಮಾರ್ 88% ಬೊಕ್ಕ ನೈಸರ್ಗಿಕ ಅನಿಲೊದ ಅರ್ಧೊದಾತ್ ಭಾಗೊನು ಇಮ್‌ಪೋರ್ಟ್ ಮಲ್ತೊಂದುಂಡು, ಇಂದೆಟ್ ಎಚ್ಚಿನ ಭಾಗ ಹಾರ್ಮುಜ್ ಜಲಸಂಧಿದ ಮುಕೇನ ಬರ್ಪುಂಡು. ಸಂಘರ್ಷ ಎಚ್ಚ ಆವೊಂದಿತ್ತಿನೇ, ಇರಾನ್ ಜಲಸಂಧಿನ್ ನಿರ್ಬಂಧ ಮಲ್ತಿತ್ತ್ಂಡ್, ವಾಸ್ತವಿಕವಾದ್ ಟ್ಯಾಂಕರ್ ಸಂಚಾರೊನು ಉಂತಾದಿತ್ತ್ಂಡ್.

ನಯಾರಾ ಎನರ್ಜಿ ರೇಟ್ ಎಚ್ಚ ಮಲ್ದ್ಂಡ್
ದೇಶೊದ 102,075 ಪೆಟ್ರೋಲ್ ಪಂಪ್‌‌ಲೆಡ್ 6,967 ನ್ ತೂವೊನುನ ನಯಾರಾ ಎನರ್ಜಿ, ಎಚ್ಚ ಆತಿನ ಕೆಲ ಕರ್ಚಿಲೆನ್ ಗ್ರಾಹಕೆರೆನ ಮಿತ್ತ್ ಪಾಡ್ರೆ ಪಿದಡ್ದ್ಂಡ್. ಅವೆತ ಪಂಪ್‌‌ಲೆಡ್ ಪೆಟ್ರೋಲ್ ಲೀಟರ್‌ಗ್ 100.71 ರೂ. ಬೊಕ್ಕ ಡೀಸೆಲ್ ಲೀಟರ್‌ಗ್ 91.31 ರೂ. ಆತ್ಂಡ್. ಇಂದೆತ ನಡುಟು, ರಿಲಯನ್ಸ್ ಇಂಡಸ್ಟ್ರೀಸ್ ಬೊಕ್ಕ ಬಿಪಿದ ಜಂಟಿ ಇಂಧನ ಚಿಲ್ಲರೆ ವೈವಾಟ್‌ದ, 2,185 ಔಟ್‌ಲೆಟ್‌ ಇಪ್ಪುನ ಜಿಯೋ-ಬಿಪಿ, ಭಾರೀ ನಷ್ಟ ಆದಿತ್ತ್ಂಡಲಾ ನನಲಾ ಬಿಲೆ ಎಚ್ಚ ಮಲ್ದಿಜಿ. ಮಾರ್ಕೆಟ್‌ದ ಸರಿಸುಮಾರ್ 90% ನಿಯಂತ್ರಣ ಮಲ್ಪುನ ಸರ್ಕಾರಿ ಸ್ವಾಮ್ಯೊದ ತೈಲ ಕಂಪೆನಿಲು ಇತ್ತೆಗ್ ರೇಟ್ ಎಚ್ಚ ಮಲ್ಪಂದೆ ಇತ್ತಿಲೆಕ ಒರಿತೊಂದು ಬೈದ.

ಪೆಟ್ರೋಲ್, ಡೀಸೆಲ್ ರೇಟ್ ಕಮ್ಮಿ ಆಪುಂಡಾ?
ಇತ್ತೆ ಮಾತೆರೆನ ಮಂಡೆಡ್ ಇಪ್ಪುನ ಪ್ರಶ್ನೆ ಪೆಟ್ರೋಲ್, ಡೀಸೆಲ್‌ದ ಮಿತ್ತ್ ಇಪ್ಪುನ ಅಬಕಾರಿ ಸುಂಕ ದಾನ್ನ ಕಮ್ಮಿ ಆತ್ಂಡ್ ಆಂಡ ಪೆಟ್ರೋಲ್, ಡೀಸೆಲ್‌ದ ರೇಟ್ ಕಮ್ಮಿ ಆಪುಂಡಾ ಪನ್ದ್. ಆಂಡ ಚಿಲ್ಲರೆ ಇಂಧನ ರೇಟ್‌ಡ್ ಕಮ್ಮಿ ಆಪುನವು ನನಲಾ ಪತ್ತ ಆತಿಜಿ. ಭಾರತೊಡು ಚಿಲ್ಲರೆ ಇಂಧನ ರೇಟ್‌ ಸರ್ಕಾರೊದ ಸೀದಾ ಅಂಕೆಡ್ ಇಜ್ಜಿ. ಇಂಡಿಯನ್ ಆಯಿಲ್ ಕಾರ್ಪೊರೇಷನ್, ಭಾರತ್ ಪೆಟ್ರೋಲಿಯಂ ಕಾರ್ಪೊರೇಷನ್ ಬೊಕ್ಕ ಹಿಂದೂಸ್ತಾನ್ ಪೆಟ್ರೋಲಿಯಂ ಕಾರ್ಪೊರೇಷನ್‌ದಂಚಿನ ತೈಲ ಮಾರ್ಕೆಟ್ ಕಂಪೆನಿಲು ಬಿಲೆ ನಿರ್ಧಾರ ಮಲ್ಪುವ, ಇಂದು ಚಿಲ್ಲರೆ ರೇಟ್ ಪರಿಷ್ಕರಣೆ ಮಲ್ಪೆರೆ ದುಂಬು ಜಾಗತಿಕ ಕಚ್ಚಾ ತೈಲೊದ ರೇಟ್, ಎಕ್ಸ್‌ಚೇಂಜ್ ರೇಟ್ ಬೊಕ್ಕ ಅಕ್ಲೆನನೇ ಆಯಿನ ಲಾಭಾಂಶೊಲೆನ್ ತೂಪ.

ಬಿಲೆ ಕಮ್ಮಿ ಆಪುಜಾ??
ತಜ್ಞೆರೆ ಪ್ರಕಾರ, ಈ ಕಂಪೆನಿಲು ಸುಂಕ ಕಮ್ಮಿ ಆತಿನೆತ ಲಾಭಾಂಶೊನು ಗ್ರಾಹಕೆರೆಗ್ ಇತ್ತೆನೇ ಕೊರ್ಪುನ ಸಾಧ್ಯತೆ ಕಮ್ಮಿ. ಅಂಚಿನ ಪರಿಸ್ಥಿತಿಡ್, ಕಂಪೆನಿಲು ಬಿಲೆನ್ ಇತ್ತೆನೇ ಕಮ್ಮಿ ಮಲ್ಪುನ ಬುಡ್ದು ದುಂಬುದ ನಷ್ಟೊಲೆನ್ ಸಮ ಮಲ್ಪೆರೆ ತೂವ. ಪ್ರಯೋಜನ ಗ್ರಾಹಕೆರೆಗ್ ಇತ್ತೆನೇ ಸಂಪೂರ್ಣವಾದ್ ಎತ್ತಂದೆ ಇಪ್ಪು.

ತೈಲ ಸಚಿವೆ ಹರ್ದೀಪ್ ಸಿಂಗ್ ಪುರಿ ಮೆರೆನ ಪ್ರಕಾರ, ಕರಿನ ಒಂಜಿ ತಿಂಗೊಲುಡು ಅಂತಾರಾಷ್ಟ್ರೀಯ ಕಚ್ಚಾ ತೈಲೊದ ಬಿಲೆ ಬಾರೀ ಏರ್ದಿತ್ತ್‌ದ್, ಪ್ರತಿ ಬ್ಯಾರೆಲ್‌ಗ್ ಸುಮಾರ್ 70 ಡಾಲರ್‌ರ್ದ್ ಸುಮಾರ್ 122 ಡಾಲರ್‌ಗ್ ಏರ್ದ್ಂಡ್. ಇಂದೆರ್ದಾವರ, ಲೋಕೊಡೊರ್ಮೆ ಇಂಧನ ಬಿಲೆ ಗಮನಾರ್ಹವಾದ್ ಏರ್ದಿತ್ತ್‌ದ್, ಪಾಕ ಕಡೆಟ್ ಶೇ.30 ರ್ದ್ ಶೇ.50 ದಾತ್ ಏರ್ದ್ಂಡ್ ಪನ್ದ್ ವರದಿ ಆತ್ಂಡ್.

ಇಂಧನ ಬಿಲೆತ ಮಿತ್ತ್ ಪ್ರಭಾವ ಪಾಡುನ ಮಲ್ಲ ಅಂಶ ಜಾಗತಿಕ ಕ್ರೂಡ್ ಆಯಿಲ್‌. ಬ್ರೆಂಟ್ ಕಚ್ಚಾ ತೈಲ ನನಲಾ ಬ್ಯಾರೆಲ್‌ಗ್ 100 ಡಾಲರ್‌ರ್ದ್ ಎಚ್ಚ ರೇಟ್‌ಡ್ ಉಂಡು. ಅಬಕಾರಿ ಸುಂಕ ಕಮ್ಮಿ ಮಲ್ದಿನವು ಸೀದಾ ರೇಟ್ ಕಮ್ಮಿ ಮಲ್ಪುನೆರ್ದ್ ಎಚ್ಚಾದ್ ಒಂಜಿ ಕುಶನ್ ಲೆಕ ಆದಿಪ್ಪುಂಡು. ಇಂದು ತೈಲ ಕಂಪೆನಿಲೆಗ್ ಚಿಲ್ಲರೆ ರೇಟ್‌ಡ್ ತಗ್ಗಾಯೆರ ಒತ್ತಾಯ ಮಲ್ಪುನ ಬುಡ್ದು, ಬಿಲೆನ್ ಇತ್ತೆಗ್ ಎಚ್ಚ ಮಲ್ಪಂದೆ ಕರ್ಚಿಲೆನ್ ಸಮ ಮಲ್ತೊನರೆ ಸಕಾಯ ಆಪುಂಡು

ಈ ಕ್ರಮ ಜಾಗತಿಕ ಅನಿಶ್ಚಿತತೆದ  ಪೊರ್ತುಡು ಬಿಲೆನ್ ಸ್ಥಿರವಾದ್ ಒರಿತೊನರೆ ಸಕಾಯ ಮಲ್ಪುನ ಸಾಧ್ಯತೆ ಉಂಡು.