Last updated on April 1st, 2026 at 11:29 am
ದೆಲ್ಲಿ, ಎ. 01: ಪೊಸ ಫೈನಾನ್ಶಿಯಲ್ ವರ್ಸೊದ ಕಡೀರ ದಿನೊನೇ ಸಾಮಾನ್ಯ ಜನೊಕ್ಲೆಗ್ ಡಬಲ್ ಶಾಕ್ ತಿಕ್ಕ್ದ್ಂಡ್. ಕಮರ್ಷಿಯಲ್ ಗ್ಯಾಸ್ ಸಿಲಿಂಡರ್ದ ಬಿಲೆ 19 ರೂ ಏರ್ಂಡ, ಪ್ರೀಮಿಯಮ್ ಪೆಟ್ರೋಲ್ ಬೊಕ್ಕ ಡೀಸೆಲ್ದ ರೇಟ್ಡ್ಲಾ (Premium Petrol price) ಬಾರೀ ಏರ್ತೆಲ್ ಆತ್ಂಡ್. ಪ್ರೀಮಿಯಮ್ ಪೆಟ್ರೋಲ್ಗ್ ಲೀಟರ್ಗ್ 11 ರೂ. ಎಚ್ಚ ಆತ್ಂಡ್. ಪ್ರೀಮಿಯಮ್ ಡೀಸೆಲ್ ರೇಟ್ಡ್ ಒಂಜರೆ ರೂ. ದಾತ್ ಎಚ್ಚ ಆತ್ಂಡ್. ಆಯಿಲ್ ಕುಂದೆಲ್ ದುಂಬರಿದಿನೆರ್ದಾವರ ಆಯಿಲ್ ಮಾರ್ಕೆಟ್ ಕಂಪೆನಿಲು ಈ ಬಿಲೆ ಏರ್ತೆಲ್ ಮಲ್ತ್ದ. ಕರಿನ ತಿಂಗೊಲುಲಾ ಪ್ರೀಮಿಯಮ್ ಇಂಧನ ಬಿಲೆ ಏರ್ದಿತ್ತ್ಂಡ್.
ಭಾರತೊದ ಮಾಮಲ್ಲ ಆಯಿಲ್ ಮಾರ್ಕೆಟ್ ಸಂಸ್ಥೆ ಆಯಿನ ಇಂಡಿಯನ್ ಆಯಿಲ್ ತನ್ನ ಪ್ರೀಮಿಯಮ್ ದರ್ಜೆದ ಎಕ್ಸ್ಪಿ100 ಪೆಟ್ರೋಲ್ ಬಿಲೆನ್ 149 ರ್ದ್ 160 ರೂ. ಗ್ ಎಚ್ತಾದ್ಂಡ್. ಈ ಎಕ್ಸ್ಪಿ100 ಭಾರತೊದ ಸುರೂತ 100 ಆಕ್ಟೇನ್ ಪ್ರೀಮಿಯಮ್ ಪೆಟ್ರೋಲ್ ಆದುಂಡು.
ಹಿಂದೂಸ್ತಾನ್ ಪೆಟ್ರೋಲಿಯಂ ಕಾರ್ಪೊರೇಶನ್ ಸಂಸ್ಥೆದ ಪವರ್100 ಪೆಟ್ರೋಲ್ದ ರೇಟ್ಲಾ ಎಚ್ಚ ಆತ್ಂಡ್. ಈ ಪ್ರೀಮಿಯಮ್ ಪೆಟ್ರೋಲ್ನ್ ಎಚ್ಚ ಎಂಜಿನ್ ಪರ್ಫಾರ್ಮೆನ್ಸ್ ಅಗತ್ಯ ಇಪ್ಪುನ ಲಕ್ಷುರಿ ಕಾರ್, ಸ್ಪೋರ್ಟ್ಸ್ ಬೈಕ್ಲೆಡ್ ಗಲಸುವೆರ್.
ಪ್ರೀಮಿಯಮ್ ಡೀಸೆಲ್ ರೇಟ್ಡ್ಲಾ ಏರ್ತೆ ಆತ್ಂಡ್. ಇಂಡಿಯನ್ ಆಯಿಲ್ದ ಎಕ್ಸ್ಟ್ರಾ ಗ್ರೀನ್ ಪ್ರೀಮಿಯಮ್ ಡೀಸಲ್ದ ರೀಟೇಲ್ ರೇಟ್ ಒಂಜಿ ಲೀಟರ್ಗ್ 91.49 ರೂ.ರ್ದ್ 92.99 ರೂ.ಗ್ ಏರ್ದ್ಂಡ್.
ಆಂಡ, ಬೇತೆ ಸಾಮಾನ್ಯ ಪೆಟ್ರೋಲ್ ಬೊಕ್ಕ ಡೀಸೆಲ್ಡ್ ಒವ್ವೇ ಏರ್ತೆ ಆತಿಜಿ. ನಯಾರಾ ಪೆಟ್ರೋಲ್ ಬಂಕ್ಲೆಡ್ ಮಾತ್ರ ಪೆಟ್ರೋಲ್ ಬಿಲೆ 5 ರೂ ಎಚ್ಚ ಆತ್ಂಡ್. ಇಂಡಿಯನ್ ಆಯಿಲ್, ಬಿಪಿ, ಎಚ್ಪಿ ಪಂಪ್ಲೆಡ್ ಸಾಮಾನ್ಯ ಪೆಟ್ರೋಲ್ ಬೊಕ್ಕ ಡೀಸೆಲ್ ರೇಟ್ ಅಂಚೆನೇ ಉಂಡು. ಕರಿನ ವಾರ ಸರ್ಕಾರ ಪೆಟ್ರೋಲ್ ಬೊಕ್ಕ ಡೀಸೆಲ್ದ ಮಿತ್ತ್ ಇತ್ತಿನ ಅಬಕಾರಿ ಸುಂಕೊನು ಕಮ್ಮಿ ಮಲ್ತಿತ್ತ್ಂಡ್. ಉಂದೆರ್ದಾವರ ಆಯಿಲ್ ಕಂಪೆನಿಲೆನ ಮಿತ್ತ್ದ ಪುದೆನ್ ಸರ್ಕಾರ ಜಪ್ಪಾಯಿಲೆಕ ಆತ್ಂಡ್.
ಇಂದೇ ಪೊರ್ತುಡು ಇನಿ 19 ಕಿಲೋ ಕಮರ್ಷಿಯಲ್ ಎಲ್ಪಿಜಿ ಸಿಲಿಂಡರ್ ರೇಟ್ಡ್ 195 ರೂ.ದಾತ್ ಎಚ್ಚ ಆತ್ಂಡ್. ಮಾರ್ಚ್ ತಿಂಗೊಲುರ್ದಿಂಚಿ ಕಮರ್ಷಿಯಲ್ ಗ್ಯಾಸ್ ಸಿಲಿಂಡರ್ದ ರೇಟ್ಡ್ ಸುಮಾರ್ 300 ರೂ ಎಚ್ಚ ಆಯಿಲೆಕ ಆತ್ಂಡ್. ಇಲ್ಲಡ್ ಗಲಸುನ ಎಲ್ಪಿಜಿ ಸಿಲಿಂಡರ್ದ ರೇಟ್ ಕರಿನ ತಿಂಗೊಲುಡು ಒರ ಏರ್ದಿತ್ತ್ಂಡ್.