Last updated on April 1st, 2026 at 03:39 pm
ಕಾರ್ಲ, ಏ. 01: ಮದಿಮೆ ಆತಿನ ಕಾಲಿ ಒಂಜಿ ತಿಂಗೊಲುಡೇ ಸಂಶಯಾಸ್ಪದವಾದ್ ತೀರ್ದಿನ ನೆಲ್ಯಾಡಿ ಮೂಲೊದ ಉದ್ಯಮಿ ಸುದೀಪ್ ಶೆಟ್ಟಿ (30) ಪನ್ಪಿನಾರೆನ ಆತ್ಮಹತ್ಯೆ ಪ್ರಕರಣೊಗು ಇತ್ತೆ ಪೊಸ ಟ್ವಿಸ್ಟ್ ತಿಕ್ಕ್ದ್ಂಡ್. ಸುದೀಪ್ನ ಅಮ್ಮೆರ್ ದಾಮೋದರ್ ಮೇರ್ ಮರ್ಮಲ್ ಸೌಮ್ಯ ಶೆಟ್ಟಿನ ಮಿತ್ತೇ ಕಾರ್ಲ ನಗರ ಪೊಲೀಸ್ ಸ್ಟೇಶನ್ಡ್ ಒಯಿಲ್ ಬರೆಪಾದಿತ್ತ್ದ್, ಮಗೆ ಆತ್ಮಹತ್ಯೆ ಮಲ್ತೊನರೆ ಮರ್ಮಲೇ ನೆವನ ಪನ್ದ್ ಆರೋಪ ಮಲ್ತ್ದೆರ್.
ಫೆಬ್ರವರಿ 17 ತಾನಿ ಪುತ್ತೂರ್ಡ್ ರಿಜಿಸ್ಟರ್ ಮದಿಮೆ ಆದಿತ್ತಿನ ಈ ಜೋಡಿದ ಸಂಸಾರೊಡು ಸುರುರ್ದೇ ವಿರಸ ಇತ್ತ್ಂಡ್ಗೆ. ಮಾರ್ಚ್ 17 ತಾನಿ ಸೌಮ್ಯ ಮೇರ್ ನೆಲ್ಯಾಡಿಗ್ ಬತ್ತ್ದ್ ಸುದೀಪ್ಗ್ ಪೋಡ್ಯಾದೆರ್, ಅಂಚಾದ್ ಬೆಸರ್ಡ್ ಮಾರ್ಚ್ 22 ತಾನಿ ಸುದೀಪ್ ವಿಷ ಪರ್ತೆರ್ ಪನ್ದ್ ಅಮ್ಮೆ ಒಯಿಲ್ಡ್ ಬರೆಪಾದೆರ್. ಮರ್ದ್ ಪಲಿಪಂದೆ ಮಾರ್ಚ್ 29 ದಾನಿ ಸುದೀಪ್ ಕುಡ್ಲದ ಆಸ್ಪತ್ರೆಡ್ ತೀರ್ದೆರ್.
ಈ ಮಾತಾ ಆರೋಪಲೆನ್ ಒತ್ತೊನಂದಿನ ಬೊಡೆದಿ ಸೌಮ್ಯ ಶೆಟ್ಟಿ, “ಎಂಕ್ಲೆನ ಮದಿಮೆನ್ ಸುದೀಪ್ನ ಇಲ್ಲದಕುಲು ಒತ್ತೊಂದಿಜ್ಜಂಡ್. ಅತ್ತಂದೆ ಸುದೀಪ್ಗ್ ಲಕ್ಷಗಟ್ಲೆ ರೂಪಾಯಿ ಕಡ ಇತ್ತ್ಂಡ್. ಕಡ ಕೊರ್ತಿನಕುಲು ಫೋನ್ ಮಲ್ಪುನಗ ಆರೆನ ಅಮ್ಮೆರೇ ಎನ್ನ ನಂಬರ್ ಕೊರೊಂದಿತ್ತೆರ್. ಈ ಮಾತಾ ಮಾನಸಿಕ ಪ್ರೆಷರ್ಡ್ ಸುದೀಪ್ ಈ ನಿರ್ಧಾರ ಗೆತೊಂದುಪ್ಪೆರ್” ಪನ್ದ್ ಪನ್ತೆರ್. ಎಂಕ್ ನೆಕ್ಕ್ ದುಂಬು ಒಂಜಿ ಮದಿಮೆ ಆದ್ ಡಿವೋರ್ಸ್ ಆತಿನ ವಿಷಯ ಸುದೀಪ್ಗ್ ತೆರಿದಿತ್ತ್ಂಡ್ ಪನ್ದ್ ಆರ್ ಸ್ಪಷ್ಟ ಮಲ್ದೆರ್.
ಸುದೀಪ್ ಆರಾದೇ ಫೇಸ್ಬುಕ್ ಡ್ ಎನಡ ಪಾತೆರ್ರೆ ಬತ್ತಿತ್ತೆರ್. ಕರಿನ ವರ್ಸ ಫೆಬ್ರವರಿರ್ದ್ ಮೆಸೇಜ್ ಮಲ್ತೊಂದಿತ್ತೆರ್. ಆಂಡ ಯಾನ್ ಇಂಚಿಪ ಆರೆಗ್ ವಾಪಸ್ ಮೆಸೇಜ್ ಮಲ್ತಿತ್ತೆ. ಬೊಕ್ಕ ಆರ್ ಮದಿಮೆದ ಪ್ರಸ್ತಾಪ ಮಲ್ತ್ದೆರ್. ಎನ್ನ ಇಲ್ಲದಕಲೆಗ್ ಪನ್ಲೆ ಪನ್ದ್ ತೆರಿಪಾದಿತ್ತೆ. ಒಂಜಿ ವರ್ಸೊರ್ದಿಂಚಿ ಈರೆನ್ ತೂದು ಯಾನ್ ಮದಿಮೆ ಆವರೆ ನಿರ್ಧಾರ ಮಲ್ತ್ದೆ ಪನ್ದ್ ಸುದೀಪ್ ಪನ್ದಿತ್ತೆರ್. ಯಾನ್ಲಾ ಇಲ್ಲದಕುಲು ಒತ್ತೊಂಡೆರ್ನ್ಡ ಮದಿಮೆ ಆಪೆ ಪನ್ದ್ ಪನ್ಡೆ. ಆರ್ ಇಲ್ಲದಕ್ಲೆನ್ ಒಪ್ಯಾದ್ ಮದಿಮೆದ ತೀರ್ಮಾನೊಗು ಬತ್ತೆರ್. ಎನ್ನ ಮೆಗ್ಯನ್ ಇನ್ಸ್ಟಾಗ್ರಾಮ್ ಮುಕೇನ ತಿಕ್ಕ್ದ್ ಆಯಡ ಪಾತೆರ್ದ್ ಮದಿಮೆದ ತೀರ್ಮಾನೊಗು ಬತ್ತೆರ್.
ಎನ್ನ ದುಂಬುದ ಜೀವನೊದ ಬಗೆಟ್ ಮಾತಾ ವಿಚಾರ ಆರೆಗ್ ತೆರಿಪಾದೆ. ಆ ಬಗೆಟ್ ಆರೆಗ್ ಮಂಡೆಬೆಚ್ಚ ಇಜ್ಜಂಡ್. ಮದಿಮೆ ರಿಜಿಸ್ಟರ್ ಆಯಿ ಬೊಕ್ಕ ಎನ್ನ ಇಲ್ಲಡ್ ಮಾತೆರ್ನ ಒಟ್ಟುಗು ಕುಸಿಟ್ ಇತ್ತೆರ್. ಇತ್ತೆ ದಾಯೆ ಜೂವ ದೆತ್ತೊಂಡೆರ್ ಪನ್ದ್ ಪಿನ್ಪಿಜ್ಜಿ. ಎಂಕ್ಲೆನ ಮದಿಮೆಗ್ ಆರೆನ ಇಲ್ಲದಕುಲು ಒತ್ತೊನಂದಿನಲಾ ನೆವನ ಆದುಪ್ಪು. ಈ ಬಗೆಟ್ ಪೊಲೀಸೆರ್ ಜಡ್ತೆ ಮಲ್ಪಡ್. ಯಾನ್ಲಾ ಒಯಿಲ್ ಬರೆಪಾವೆ ಪನ್ದ್ ಪನ್ಡೆರ್. ಇತ್ತೆ ಪೊಲೀಸೆರ್ ಪ್ರಕರಣ ದಾಕಲ್ತೊಂದು, ಮರಣೋತ್ತರ ಪರೀಕ್ಷೆದ ವರದಿರ್ದ್ ಬೊಕ್ಕನೇ ಪತ್ತ ನೆವನ ತೆರಿದ್ ಬರೊಡಾತೆ.