Last updated on April 2nd, 2026 at 09:20 am
ಬೆಂಗಳೂರ್, ಎ. 01: ಪೊಂಜೊವುನ ಮಿತ್ತ್ ಅತ್ಯಾಚಾರ ಮಲ್ದಿನ ಆರೋಪ ಇಪ್ಪುನ ಬೆದ್ರದ ಸಸ್ಪೆಂಡ್ ಆತಿನ ಇನ್ಸ್ಪೆಕ್ಟರ್ ಸಂದೇಶ್ ಸಂದಾದಿನ ಅರ್ಜಿದ ವಿಚಾರಣೆ ಮಲ್ತಿನ ಕರ್ನಾಟಕ ಹೈಕೋರ್ಟ್, ಆರೋಪಿ ಅಧಿಕಾರಿನ್ ಸಮ ತರಾಟೆಗ್ ಗೆತೊಂದುಂಡು. “ಒಯಿಲ್ ಬರೆಪಾಯೆರೆ ಬತ್ತಿನ ಪೊಂಜೊವುಡ ಸಂಬಂಧ ಬುಲೆಪಾವುನು ಅಧಿಕಾರೊದ ದುರುಪಯೋಗ ಅತ್ತಾ?” ಪನ್ದ್ ನ್ಯಾಯಂತಡೆ ಕೇನ್ದ್ನ್ಡ್.
ಬೆದ್ರಡ್ ಇನ್ಸ್ಪೆಕ್ಟರ್ ಆದಿತ್ತಿನ ಸಂದೇಶ್ ತನ್ನ ಮಿತ್ತ್ ದಾಕಲಾತಿನ ಎಫ್ಐಆರ್ ರದ್ದ್ ಮಲ್ಪೆರೆ ಕೇನ್ದ್ ಹೈಕೋರ್ಟ್ಗ್ ಪೋದಿತ್ತೆರ್. ವಿಚಾರಣೆದ ಪೊರ್ತುಡು ಸಂದೇಶ್ ಪರ ವಕೀಲೆರ್, “ಇಂದು ಇರ್ವೆರ್ ಒತ್ತೊಂದು ಆತಿನ ಸಂಬಂಧ, ಅತ್ಯಾಚಾರೊಗು ಒವ್ವೇ ಆಧಾರೊಲು ಇಜ್ಜ” ಪನ್ದ್ ವಾದ ಮಲ್ತಿತ್ತೆರ್. ಈ ವಾದೊಗು ಅಸಮಾಧಾನ ತೂಪಾಯಿನ ನ್ಯಾಯಮೂರ್ತಿ ಎಂ. ನಾಗಪ್ರಸನ್ನ ಮೆರೆನ ಪೀಠ, ಜಡ್ತೆಗ್ ಮಧ್ಯಂತರ ತಡೆ ಕೊರಂದೆ ಅಂಚೆನೇ ಕೈದಾಪಿನೆರ್ದ್ ರಕ್ಷಣೆ ಕೊರಂದೆ, ವಿಚಾರಣೆನ್ ಏಪ್ರಿಲ್ 6ಕ್ ದುಂಬು ಪಾಡ್ದ್ಂಡ್.
ಬೋಲ್ತೇರ್ ತಾಲೂಕ್ಡ್ ಸರ್ಕಲ್ ಇನ್ಸ್ಪೆಕ್ಟರ್ ಆದಿತ್ತಿನ ಪೊರ್ತುಡು ಪನ್ಡ 2018 ರ್ದ್ 2023 ಮುಟ್ಟ ಸಂದೇಶ್ ಎನ್ನ ಮಿತ್ತ್ ನಿರಂತರವಾಗಿ ಅತ್ಯಾಚಾರ ಮಲ್ತ್ದೆರ್ ಪನ್ದ್ ಟೀಚರ್ ಒರ್ತಿ ವೇಣೂರು ಪೊಲೀಸ್ ಸ್ಟೇಶನ್ಡ್ ಒಯಿಲ್ ಬರೆಪಾದೆರ್. ಪ್ರಕರಣೊಲೆನ ಬಗೆಟ್ ಪೋಡಿಕಟ್ಟಾದ್, ಬುಡಂದೆ 5 ವರ್ಸ ಲೈಂಗಿಕ ಶೋಷಣೆ ಮಲ್ದೆರ್ ಪನ್ದ್ ಒಯಿಲ್ಡ್ ಬರೆಪಾದೆರ್. ದುಂಬುಲಾ ಇರ್ವೆರ್ ಪೊಂಜೊವುನಕುಲು ಸಂದೇಶ್ನ ಮಿತ್ತ್ ಇಂಚಿನನೇ ಆರೋಪ ಮಲ್ದಿನ ರಾಜ್ಯೊಡೊರ್ಮೆ ಚರ್ಚೆಗ್ ನೆವನ ಆದಿತ್ತ್ಂಡ್.