Last updated on April 2nd, 2026 at 01:51 pm
ಬೆಂಗಳೂರ್, ಏ. 02: ಅಪ್ಪೆ ಆಜಿಡ್ದಿತ್ತಿನ ಕುಂಟು ಕನಯೆರೆ ಪೋದಿತ್ತಿನ ಪೊರ್ತುಡು, ನೀರ್ದ ಬಾಲ್ದಿಡ್ ಮುರ್ಕ್ದ್ ಬಾಲೆ ತೀರ್ದಿತ್ತ್ದ್, ಉಂದೆನ್ ಬೆಸರ್ಡ್ ಅಪ್ಪೆ ಆತ್ಮಹತ್ಯೆ ಮಲ್ತೊಂದಿನ ದಾರುಣ ನಡಕೆ ಬೆಂಗಳೂರ್ದ ಚಂದ್ರಾಲೇಔಟ್ ಸ್ಟೇಶನ್ದ ಭೈರವೇಶ್ವರ ನಗರಡ್ ನಡತ್ದ್ಂಡ್.
ಅಗಸ್ತ್ಯೆ ತೀರ್ದಿನ ಬಾಲೆ. ಪ್ರತಿಭಾ ಆತ್ಮಹತ್ಯೆ ಮಲ್ತೊಂದಿನ ಅಪ್ಪೆ ಪನ್ದ್ ತೆರಿದ್ ಬೈದ್ಂಡ್. ಇಲ್ಲಡ್ ಅಪ್ಪೆ, ಬಾಲೆ ಇರ್ವೆರೇ ಇಪ್ಪುನಗ ಈ ನಡಕೆ ನಡತ್ದ್ಂಡ್.
ಪ್ರತಿಭಾ ಬೊಕ್ಕ ಮಹಂತೇಶ್ ದಂಪತಿಲು ಬೇಲೆಡ್ ಸಾಫ್ಟ್ವೇರ್ ಉದ್ಯೋಗಿಲು. ಪ್ರತಿಭಾ ವರ್ಕ್ ಫ್ರಂ ಹೋಂ ಮಲ್ತೊಂದಿತ್ತೆರ್. ಕಂಡನೆ ಮಹಂತೇಶ್ ಬೇಲೆದ ಮಿತ್ತ್ ಪಿದಯಿ ಪೋದಿತ್ತೆರ್. ರಾತ್ರೆ ಕಂಡನೆ ಮಹಂತೇಶ್ ಇಲ್ಲಗ್ ಪಿರ ಬನ್ನಗ ಈ ನಡಕೆ ಬೊಲ್ಪುಗು ಬೈದ್ಂಡ್.
ಬೊಡೆದಿ ಬಾಕಿಲ್ ದೆಪ್ಪಂದಿನೆಕ್ ಮಹಂತೇಶ್ ಆರೆಡ ಇತ್ತಿನ ಕುಡೊಂಜಿ ತರ್ಕೋಲುಡು ಬಾಕಿಲ್ ದೆತ್ತ್ದ್ ಉಲಯಿ ಬತ್ತ್ದ್ ತೂನಗ ಪ್ರತಿಭಾ ಬಲ್ಲ್ ಪಾಡೊಂದಿನ, ಬಾಲೆ ಹಾಸಿಗೆಡ್ ಜೆತೊಂದಿನ ಸ್ಥಿತಿಟ್ ತೋಜಿದ್ ಬೈದ್ಂಡ್. ಬೊಕ್ಕ ಬಾಲೆಲಾ ತೀರ್ದಿನ ತೆರಿದ್ ಬೈದ್ಂಡ್. ಒಟ್ಟುಗು ಬರಿಟ್ ಬೊಡೆದಿ ಬರೆದ್ ದೀತಿನ ಡೆತ್ ನೋಟ್, ಐತ ಬರಿಟ್ ಕಾಲಿ ಆತಿನ 15 ಮಾತ್ರೆದ ಶೀಟ್ ತಿಕ್ಕ್ದ್ಂಡ್.
ಯಾನ್ ಕುಂಟು ಆಜಿಡ್ದಿತ್ತೆ, ಅವೆನ್ ಕನಯೆರ ಟೆರೆಸ್ಗ್ ಪೋದಿತ್ತೆ. ಈ ಪೊರ್ತುಡು ಬಾಲೆ ಗೊಬ್ಬೊಂದು ಬಾತ್ರೂಮ್ಗ್ ಪೋತೆ. ಆ ಪೊರ್ತುಡು ಬಾಲ್ದಿಡ್ ಮುರ್ಕುದ್ ಬಾಲೆ ತೀರ್ದ್ಂಡ್. ಎನ್ನ ಬಾಲೆನ್ ಒರಿತೊನರೆ ಆತಿಜಿ. ಎನ್ನ ಬಾಲೆ ಸಯ್ಯೆರ ಏನೇ ನೆವನ. ಅಂಚಾದ್ ಏನ್ ಆತ್ಮಹತ್ಯೆ ಮಲ್ತೊಂದುಲ್ಲೆ ಪನ್ದ್ ಪ್ರತಿಭಾ ಡೆತ್ ನೋಟ್ಡ್ ಬರೆತೆರ್.
ಸುರುಕು ಪ್ರತಿಭಾ ಮಾತ್ರೆ ನಿಂಗ್ದ್, ಕೈ ಕೊಯ್ಯೊಂದು ಜೂವ ಗತ್ತೊನ್ರ ತೂತೆರ್. ಆಂಡ ನೆತ್ತೆರ್ ಬರಂದಿನೆರ್ದಾವರ ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತೊಂದೆರ್. ಈ ಬಗೆಟ್ ಕೈತಲ್ದ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್.