Last updated on April 6th, 2026 at 11:37 am
ಒಡಿಪು, ಎ. 06: ತತ್ತ್ದ್ ಉಗ್ಗೆಲ್ಗ್ ಬೂರ್ದಿತ್ತ್ದ್, ಪಿದಯಿದ ಏರ್ನಲಾ ಸಂಪರ್ಕದಾಂತೆ ಮೂಜಿ ದಿನ ಸಾವು-ಬದ್ಕ್ದ ನಡುಟು ಪೊರ್ಮ್ಬ್ದ್ 62 ವರ್ಸ ಪ್ರಾಯೊದ ಆಂಜೊವು ಒರಿ ಕಾರ್ನಿಕನಾ ದಾನ್ನ ಪನ್ದ್ ಪನ್ಪಿಲೆಕ ಬದ್ಕ್ದ್ ಒರಿದೆರ್. ಆದಿ ಒಡಿಪುದ ಕಂಬುಲಕಟ್ಟೆದ ಶ್ರೀನಿವಾಸ ಆಚಾರ್ಯೆರೇ ಸಾವುನು ಗೆಂದ್ದ್ ಬತ್ತಿನಾರ್.
ಒರಿಯೆ ಇಪ್ಪುನ ಶ್ರೀನಿವಾಸ ಆಚಾರ್ಯೆರ್ ಕರಿನ ರಡ್ಡ್ ತಿಂಗೊಲುಗು ದುಂಬು ಉಸಾರ್ ತತ್ತ್ದ್ ಇತ್ತ್ದ್, ಇತ್ತೆ ಗುಣ ಆತೆರ್. ಆರೆನ ಇಲ್ಲದ ಎದುರುದ 10 ಫೀಟ್ ಅಗೆಲ ಬೊಕ್ಕ 20 ಫೀಟ್ ಗಂತ್ದ ಗೂವೆಲ್ಗ್ ಕಜವು ಬೂರ್ದು ಪಂಪ್ಡ್ ನೀರ್ ಸಮ ಬರೊಂದಿಜ್ಜಂದಿನೆರ್ದಾವರ ಕರಿನ ಸನಿಯಾರ ಬಯ್ಯಡ್ ಶ್ರೀನಿವಾಸೆರ್ ಆರೆನ ಇಲ್ಲದ ಎದುರುದ 20 ಫೀಟ್ ಗಂತ್ದ ಗೂವೆಲ್ರ್ದ್ ಪಂಪ್ದ ಫುಟ್ವಾಲ್ವ್ದ ಪೈಪ್ನ್ ಮಿತ್ತ್ ಒಯ್ಪೆರ ತೂತೆರ್. ಈ ಪೊರ್ತುಡು ಬಲ್ಲ್ ಕಡಿದ್, ಆಯತತ್ತ್ದ್ ಗೂವೆಲ್ದಲಯಿ ಬೂರ್ದೆರ್. ಒರಿಯೆ ಇಪ್ಪುನೆರ್ದಾವರ ಆರ್ ಕಲ್ಕ್ದಿನ ಏರೆಗ್ಲಾ ಕೇನ್ದಿಜಿ. ನೀರ್ಡ್ ಮುರ್ಕೊಂದಿತ್ತಿನ ಆರೆಗ್ ದೇಬೆರೆಲೆಕ ಪಂಪ್ದ ಪೈಪ್ ಬೊಕ್ಕ ಬಲ್ಲ್ ತಿಕ್ಕ್ದಿತ್ತ್ದ್, ಅವೆನೇ ಗಟ್ಟಿ ಪತೊಂದು ಮೂಜಿ ದಿನ ನೀರ್ಡೇ ಉಂತುದಿತ್ತೆರ್.
ಶ್ರೀನಿವಾಸ ಆಚಾರ್ಯೆರ್ ಬದುಕ್ದ್ ಬರ್ರೆ ಆರೆನ ಗುರ್ತದ ಗಣೇಶ್ ಪನ್ಪಿನಾರೆನ ಸಮಯಪ್ರಜ್ಞೆ ನೆವನ ಆಂಡ್. ಶ್ರೀನಿವಾಸೆರೆಗ್ ಕೊರ್ದಿತ್ತಿನ ಗ್ಯಾಸ್ ಸಿಲಿಂಡರ್ ಪಿರ ಗೆತೊನ್ರ ಗಣೇಶೆರ್ ಫೋನ್ ಮಲ್ಪುನಗ ಆರ್ ಫೋನ್ ದೆತ್ತ್ದಿಜ್ಜಂಡ್. ಗ್ಯಾಸ್ ಏಜೆನ್ಸಿದಕುಲು ಇಲ್ಲಗ್ ಬನ್ನಗಲಾ ಆರ್ ತಿಕ್ಕ್ದಿಜ್ಜಂಡ್. ಅಂಚಾದ್ ಸಂಶಯೊಡು ಗಣೇಶೆರ್ ಅಲ್ಪ ಕೈತಲ್ದಕಲೆಗ್ ಒರ ತೂಯೆರ ಪನ್ತೆರ್. ಬಾಡಾಯಿದಕುಲು ನಾಡ್ನಗ ಗೂವೆಲ್ದುಲಯಿ ನಿತ್ರಾಣ ಆತಿನ ಸ್ಥಿತಿಟ್ ಆಚಾರ್ಲು ತಿಕ್ಕ್ದೆರ್. ಮೂಜಿ ದಿನೊರ್ದಿಂಚಿ ಬಂಜಿಗಿಜ್ಜಂದೆ ಅಲಕ್ಕ ನಿತ್ರಾಣ ಆದಿತ್ತಿನ ಆಚಾರ್ಲೆಗ್ ಮಿತ್ತ್ ಬರ್ಯೆರಲಾ ಆತಿಜಿ. ಅಪಗನೇ ಜಾಗೆಗ ಬತ್ತಿನ ಲೀಡಿಂಗ್ ಫೈರ್ಫೈಟರ್ನಕುಲಾಯಿನ ಸತೀಶ್, ಅಶ್ವಿನ್ ಸನಿಲ್, ಡ್ರೈವರ್ ಭರತ್ ಬೊಕ್ಕ ಕೂಟದಕುಲು ಉಗ್ಗೆಲ್ದುಲಯಿ ಜತ್ತ್ದ್ ಆರೆನ್ ಸುರಕ್ಷಿತವಾದ್ ಮಿತ್ತ್ ಒಯ್ತ್ದೆರ್.
ಅಪಗನೇ ಆರೆನ್ ಜಿಲ್ಲಾಸ್ಪತ್ರೆಗ್ ದಾಕಲ್ತ್ದ್ ಮರ್ದ್ ಮಲ್ತಿತ್ತ್ದ್, ಇತ್ತೆ ಆರ್ ಉಸಾರಾವೊಂದುಲ್ಲೆರ್.