Last updated on April 10th, 2026 at 11:31 am
ಹಾವೇರಿ, ಏಪ್ರಿಲ್ 10: ಕಡ ತ ಕಾಸ್ ಪಿರ ಕೇನುನ ಬರಸ್ಡ್ ಬಂಜಿನ ಪೊಂಜೊವುಗು ದೊಂಕಿನೆರ್ದಾವರ , ಬಂಜಿಡಿತ್ತಿನ ಆಜಿ ತಿಂಗೊಲ್ದ ಅಮರ್ ಜೋಕುಲು ತೀರ್ದಿನ ನಡಕೆ ಹಾವೇರಿ ಜಿಲ್ಲೆದ ಸವಣೂರು ತಾಲೂಕ್ದ ಅಲ್ಲಿಪುರ ಗ್ರಾಮೊಡು ನಡತ್ದ್ಂಡ್. ಅಲ್ಲಿಪುರ ಗ್ರಾಮೊದ ಹಾಲವ್ವ ಪನ್ಪಿನಾರ್ ಮಗಲೆನ ಬಯಕೆಗ್ ಊರುಗ್ ಬತ್ತಿತ್ತೆರ್. ಹಾಲವ್ವ ಮೇರ್ ಅವ್ವೇ ಗ್ರಾಮೊದ ಸುರೇಶ ಲಮಾಣಿ ಪನ್ಪಿನಾರೆಡ 30 ಸಾರ ರೂಪಾಯಿ ಕಡ ಗೆತೊಂದಿತ್ತೆರ್.
ಮಾರ್ಚ್ 28ದಾನಿ ಕಾಸ್ ಪಿರ ಕೇನೆರೆ ಬತ್ತಿನ ಸುರೇಶೆ ಬೊಕ್ಕ ಆಯನ ಇಲ್ಲದಕುಲು ಲಡಯಿ ಸುರು ಮಲ್ತ್ದೆರ್. ‘ಮಗಲೆನ ಬಯಕೆ ಮುಗಿನೆ ಕಾಸ್ ಕೊರ್ಪ, ಒಂತೆ ದಿನ ಕೊರ್ಲೆ’ ಪನ್ದ್ ಹಾಲವ್ವ ನಟ್ಟ್ಂಡಲಾ ಕೇನಂದೆ ಆರೋಪಿಲು ಆಕ್ಯೆರ ಪಿದಡ್ದೆರ್.
ಬಂಜಿನಾಲ್ ಪವಿತ್ರಗ್ ಬಂಜಿಗ್ ದೊಂಕ್ಯೆರ್!
ಅಪ್ಪೆ ಹಾಲವ್ವಗ್ ಮೊಕುಲು ಆಕೊಂದುಪ್ಪುನೆನ್ ತೂದು ಲಡಯಿ ಬುಡ್ಪಾಯೆರೆ ಬತ್ತಿನ ಮಗಲ್, ಆಜಿ ತಿಂಗೊಲ್ದ ಬಂಜಿನಾಲ್ ಪವಿತ್ರ ಲಮಾಣಿ ನ ಬಂಜಿಗ್ ಆರೋಪಿಲು ಜೋರುಡೆ ತೊರ್ತ್ದೆರ್. ಉಂದೆರ್ದಾವರ ಉಸಾರ್ತತ್ತಿನ ಪವಿತ್ರನ್ ಅಪಗನೇ ಜಿಲ್ಲಾಸ್ಪತ್ರೆಗ್ ಲೆತೊಂದು ಪೋದು ಮರ್ದ್ ಮಲ್ತ್ದೆರ್. ಮರ್ದ್ ಪಲಿಪಂದೆ ಬೇಗನೇ ಪೆದ್ದ್ದಿತ್ತ್ದ್, ಬಂಜಿಡಿತ್ತಿನ ಅಮರ್ ಜೋಕುಲು ಪೆಟ್ಟ್ ಬೂರ್ದ್ ತೀರ್ದ.
ನಾಲ್ ಜನತ ಮಿತ್ತ್ ಒಯಿಲ್
ಈ ನಡಕೆಗ್ ಸಂಬಂಧಿತ್ದ್ ಸುರೇಶ ಲಮಾಣಿ, ಪರಶುರಾಮ ಲಮಾಣಿ, ಮಹೇಶ ಲಮಾಣಿ ಬೊಕ್ಕ ಸಕ್ಕುಬಾಯಿ ಲಮಾಣಿ ಪನ್ಪಿನ ನಾಲ್ವೆರೆ ಮಿತ್ತ್ ಸವಣೂರು ಪೊಲೀಸ್ ಸ್ಟೇಷನ್ಡ್ ಒಯಿಲ್ ಬರೆಪಾದೆರ್. ‘ಎನ್ನ ಮಗಲೆಗ್ ಬಯಕೆ ಬಲಸೊಡಾಯಿನ ಇಲ್ಲಡ್ ಇತ್ತೆ ಸೂತಕ ದಿಂಜಿದ್ಂಡ್, ಆರೋಪಿಲೆನ್ ಕೈದ್ ಮಲ್ತ್ದ್ ಎಂಕ್ಲೆಗ್ ನ್ಯಾಯ ಕೊರ್ಲೆ’ ಪನ್ದ್ ಅಪ್ಪೆ ಹಾಲವ್ವ ಕಣ್ಣನೀರ್ ಪೊಡೊಂದು ಆಗ್ರಹ ಮಲ್ತ್ದೆರ್.