Last updated on April 11th, 2026 at 08:40 am
ಚಾಮರಾಜನಗರ, ಏ. 11: ಕನ್ಡುನೆಕ್ ದುಂಬು ಕಲ್ವೆ ಒರಿ ದೇವೆರೆಗ್ ಕೈಮುಗಿದ್, ಮುಂಡೊಗು ಕುಂಕುಮ ಪೂಜೊಂದು ಬೊಕ್ಕ ಡಬ್ಬಿ ಕನ್ಡ್ದಿನ ವಿಚಿತ್ರ ನಡಕೆ ಚಾಮರಾಜನಗರ ಜಿಲ್ಲೆದ ಗುಂಡ್ಲುಪೇಟೆ ತಾಲೂಕ್ದ ಬೊಮ್ಮಲಾಪುರಡ್ ನಡತ್ದ್ಂಡ್.
ಗ್ರಾಮೊದ ಶಕ್ತಿ ದೇವತೆ ಪಟ್ಟದರಾಣಿ ದೇಲಂತಡೆಡ್ ಈ ಕಲ್ವೆ ನಡತಿತ್ತ್ದ್, ಕಲ್ವನ ವಿಚಿತ್ರ ವರ್ತನೆ ದೇಲಂತಡೆದ ಸಿಸಿಟಿವಿ ಕ್ಯಾಮರಾಡ್ ಕೈದಾತ್ಂಡ್. ಬೊಮ್ಮಲಾಪುರ ಗ್ರಾಮೊದ ಪಟ್ಟದರಾಣಿ ದೇಲಂತಡೆಗ್ ಗುರುವಾರ (ಏ. 9) ರಾತ್ರೆ ಪೊಗ್ಗಿನ ಕಲ್ವೆ, ಗರ್ಭಗುಡಿತಡೆ ಬತ್ತ್ದ್ ಬಾರೀ ಭಕ್ತಿಡ್ ದೇವೆರೆಗ್ ಕೈಮುಗಿತೆ. ಆತೆಟೇ ಉಂತಂದೆ, ಅಲ್ಪನೇ ಇತ್ತಿನ ಕುಂಕುಮೊನು ದೆತ್ತ್ದ್ ಮುಂಡೊಗು ಪಾಡೊಂದೆ. ದೇವೆರೆ ಅನುಗ್ರಹ ತಿಕ್ಕ್ಂಡ್ ಪನ್ದ್ ಎನ್ನೊಂದು, ಅಪಗನೇ ದೇಲಂತಡೆದ ಕಾಣಿಗೆ ಡಬ್ಬಿನ್ ಲಕ್ಕಾದ್ ಅಲ್ಪರ್ದ್ ಪದ್ರಾಡಾತೆ.
ದುಂಬುಲಾ ಈ ದೇಲಂತಡೆಡ್ ಪಾಕ ಸರ್ತಿ ಕಾಣಿಗೆ ಡಬ್ಬಿ ಲಕ್ಕಾದ್ ಪೋದಿತ್ತ್ಂಡ್. ಅಂಚಾದ್ ಗ್ರಾಮಸ್ಥೆರ್ ಬೊಕ್ಕ ಆಡಳಿತ ಮಂಡಳಿದಕುಲು ದೇಲಂತಡೆದ ಭದ್ರತೆಗ್ ಸಿಸಿಟಿವಿ ಕ್ಯಾಮರಾಲೆನ್ ಪಾಡ್ಪಾದಿತ್ತೆರ್. ಕನ್ಡೆರೆ ಬತ್ತಿನ ಕಲ್ವೆ ತನ್ನ ಕೃತ್ಯೊಗು ದುಂಬು ದೇವೆರೆಗ್ ಕೈ ಮುಗಿತಿನ ದೃಶ್ಯೊಲು ಇತ್ತೆ ಪೊಲೀಸೆರೆಗ್ ಪ್ರಬಲ ಸಾಕ್ಷ್ಯ ಆದುಲ್ಲ. ನಡಕೆಗ್ ಸಂಬಂಧಿತ್ದ್ ಗುಂಡ್ಲುಪೇಟೆ ಪೊಲೀಸ್ ಸ್ಟೇಷನ್ಡ್ ಪ್ರಕರಣ ದಾಕಲಾತ್ಂಡ್.