Last updated on April 13th, 2026 at 03:32 pm
ಕುಡ್ಲ , ಏ. 13: ಬಸ್ ಉಂತಡೆ ಒಂಜೆರ್ದ್ ಜವನನೊರಿಯನ್ ಕಿಡ್ನಾಪ್ ಮಲ್ತ್ದ್, ಒತ್ತಾಯೊಡು ಮಂಗಳಮುಖಿನ ಏಸ ಪಾಡ್ಪಾದ್, ‘ಅಕ್ಷತಾ’ ಪನ್ಪಿ ಪುದರ್ ದೀದ್ ನಟ್ಟೆರೆ ಅಂಚೆನೇ ಲೈಂಗಿಕ ದೌರ್ಜನ್ಯಗ್ ಗಲಸೊಂದಿನ ಆರೋಪಗ್ ಮಂಗಳಮುಖಿ ಅನಿ (ಅನಿತಾ) ಸದು ಕೊರ್ದಿತ್ತ್ದ್, ಎನ್ನ ಬುಲೆಚ್ಚಿಲ್ ತೂವರೆ ಆವಂದೆ ಕೆಲವುದಕ್ಲು ಎನನ್ ದೊಂಕೆರೆ ಆ ಜವನನ್ ಗಲಸೊಂದೆರ್ ಪನ್ದ್ ಆರೋಪ ಮಲ್ತ್ದೆರ್. ಎನ್ನ ಬಗೆಟ್ ಅಪಪ್ರಚಾರ ಮಲ್ತಿನಕಲೆನ ಮಿತ್ತ್ ಕಾನೂನು ಕ್ರಮೊ ಗೆತೊನ್ಪಾವೆ ಪನ್ದ್ ಪನ್ಡೆರ್.
ಅನಿಲ್ ಕುಮಾರ್ ಪನ್ಪಿನಾಯೆ, ಏನ್ ಮೈಸೂರ್ಡ್ ಬಸ್ಸ್ಗ್ ಕಾತೊಂದುಪ್ಪುನಗ ಮಂಗಳಮುಖಿ ಅನಿ ಬೊಕ್ಕ ಆರೆನ ಕೂಟ ಎನನ್ ಕಿಡ್ನಾಪ್ ಮಲ್ತ್ದ್, ಪತ್ತ್ರ್ದ್ ದೀದ್ ಒತ್ತಾಯೊಡು ಮಂಗಳಮುಖಿನ ಏಸ ಪಾಡ್ಪಾದ್ ಲಿಂಗ ಪಗಪೆರ ತೂತೆರ್ ಪನ್ದ್ ಆರೋಪ ಮಲ್ತ್ದೆ. ಆತೇ ಅತ್ತಂದೆ, ಆಯನ್ ಕಾಸ್ದ ದಂಧೆ ಬೊಕ್ಕ ಸೆಕ್ಸ್ ವರ್ಕ್ಗ್ ಗಲಸೊಂದೆರ್ ಪನ್ಪಿ ಆಘಾತಕಾರಿ ಪಾತೆರೊಲಾ ಪನ್ತೆ. ಮೈಸೂರ್ದ ಲಷ್ಕರ್ ಸ್ಟೇಶನ್ಡ್ ಒಯಿಲ್ ಬರೆಪಾದ್, ನ್ಯಾಯ ಬೋಡು ಪನ್ದ್ ಆಗ್ರಹ ಮಲ್ತ್ದೆ.
ಈ ಆರೋಪಲೆನ ಬಗೆಟ್ ಇನ್ಸ್ಟಾಗ್ರಾಮ್ ಲೈವ್ಡ್ ಸ್ಪಷ್ಟನೆ ಕೊರ್ತಿನ ಅನಿ ಮಂಗಳೂರು, ಅನಿಲ್ ಒರಿ ವ್ಯವಸ್ಥಿತವಾದ್ ಕಲು ಪನ್ಪಿನಾಯೆ ಪನ್ದ್ ಪಿಸ್ರ್ ತೂಪಾದೆರ್. “ಎನ್ನ ಬುಲೆಚ್ಚಿಲ್ನ್ ತೂವರೆ ಆವಂದೆ ಕೆಲವುದಕ್ಲು ಅನಿಲ್ನ್ ಗಲಸೊಂದು ಎನನ್ ದೊಂಕೆರೆ ತೂವೊಂದುಲ್ಲೆರ್. ಅನಿಲ್ ದುಂಬೇ ಎಂಕ್ಲೆನ ಸಮುದಾಯದಕಲೆನ ಇಲ್ಲಗ್ ಪೊಗ್ಗುದ್ ಕಾಸ್ ಬೊಕ್ಕ ಮೊಬೈಲ್ ಕನ್ಡೊನ್ದಿತ್ತಿನಾಯೆ. ಈ ಕಲ್ವೆದ ವಿಚಾರೊಡು ಆಯಗ್ ದುಂಬೊರ ಕ್ಲಾಸ್ ಗೆತೊಂದ. ಆ ಪಗೆ ಸಾದ್ಯೆರ ಇತ್ತೆ ಕಿಡ್ನಾಪ್ ಪನ್ಪಿ ಕತೆ ಕಟ್ಟ್ದೆ” ಪನ್ದ್ ಅನಿ ಆಕ್ರೋಶ ತೂಪಾದೆರ್.
ಅನಿಲ್ ಕುಮಾರ್ ಆಯೆ ಆದ್ ಆಯೆನೇ ಎಂಕ್ ಇನ್ಸ್ಟಾಗ್ರಾಮ್ಡ್ ಮೆಸೇಜ್ ಮಲ್ತ್ದ್ ಎನ್ನ ಕೂಟ ಸೇರುವೆ ಪನ್ದಿತ್ತೆ, ಪನ್ದ್ ತೆರಿಪಾದೆರ್. “ಆಯೆನೇ ಸ್ವತಃ ಎಂಕ್ಲೆನ್ ಸಂಪರ್ಕ ಮಲ್ತಿಪ್ಪುನಗ ಎಂಕ್ಲ ಆಯನ್ ಕಿಡ್ನಾಪ್ ಮಲ್ಪುನ ಅವಶ್ಯಕತೆ ದಾದ ಉಂಡು? ಆಯೆ ಮಲ್ದಿನ ಮೆಸೇಜ್ಲು, ಕಾಲ್ಲ್ ಬೊಕ್ಕ ಕನ್ಡುನ ದೃಶ್ಯಾವಳಿಲು ಎನಡ ಉಂಡು, ಬೇಗೊಡೇ ಪೊಲೀಸೆರೆಗ್ ಬೊಕ್ಕ ಸಾರ್ವಜನಿಕೆರೆಗ್ ಬುಡುಗಡೆ ಮಲ್ಪುವೆ” ಪನ್ದ್ ಪನ್ಡೆರ್. ಎನ್ನ ಫೋಟೋನ್ ಅನುದಾಂತೆ ಗಲಸೊಂದು ಏಕಪಕ್ಷೀಯವಾದ್ ಸುದ್ದಿ ಪಟ್ಟಿನ ಸುದ್ದಿ ಸಂಸ್ಥೆಲೆನ ಮಿತ್ತ್ ಅಂಚೆನೇ ಕಲು ಆರೋಪ ಮಲ್ತಿನ ಅನಿಲ್ನ ಮಿತ್ತ್ ಅನಿ ಪೊಲೀಸೆರೆಡ ಒಯಿಲ್ ಬರೆಪಾದೆ ಪನ್ದ್ ಪನ್ಡೆರ್. ಸೈಬರ್ ಕ್ರೈಮ್ ವಿಭಾಗೊಗ್ಲಾ ಈ ಬಗೆಟ್ ಒಲವು ಕೊರ್ದಿತ್ತ್ದ್, ಮಾನನಷ್ಟ ಮೊಕದ್ದಮೆ ಪಾಡುವೆ ಪನ್ದ್ ಎಚ್ಚರ್ಗೆ ಕೊರ್ತೆರ್. ಈ ಫೇಕ್ ನ್ಯೂಸ್ರ್ದಾವರ ಇಡೀ ಸಮುದಾಯೊನು ಸಮಾಜ ತೆಟ್ಟ್ ದೃಷ್ಟಿಡ್ ತೂಪಿಲೆಕ ಆದಿತ್ತ್ದ್, ಇಂದೆಕ್ ಕಾನೂನುದ ಮುಕೇನನೇ ಸದು ಕೊರ್ಪೆ ಪನ್ದ್ಆರ್ ಜೋರುಡು ಪನ್ತೆರ್.