Last updated on April 22nd, 2026 at 08:33 am
ಬೆಂಗಳೂರ್, ಏ. 22: ಮೋಕೆದ ಪುದರ್ಡ್ ಜವನ್ದಿ ಒರ್ತಿ ತನ್ನ ಪ್ರಿಯಕರನ್ ನಂಬಾದ್, ಕೈಕಾರ್ ಕಟ್ಟ್ದ್ ಪಾಡ್ದ್ ಪೆಟ್ರೋಲ್ ಮೈತ್ದ್ ಜೂವೊಪ್ಪ ಪೊತ್ತಾದ್ ಕೆರ್ತಿನ ಭೀಕರ ನಡಕೆ ಬ್ಯಾಡರಹಳ್ಳಿ ಪೊಲೀಸ್ ಸ್ಟೇಶನ್ ಸೀಮೆಡ್ ವರದಿ ಆತ್ಂಡ್. ಕಿರಣ್ ತೀರ್ದಿನ ಜವನೆ.
ಕಿರಣ್ ಬೊಕ್ಕ ಆರೋಪಿ ಜವನ್ದಿ ಒಂಜೇ ಕಂಪೆನಿಡ್ ಬೇಲೆ ಮಲ್ತೊಂದಿತ್ತ್ದ್, ಕರಿನ ಕೆಲ ಸಮೆರ್ದಿಂಚಿ ಮೋಕೆ ಮಲ್ತೊಂದಿತ್ತೆರ್. ಅಂಗಾರೆ ಪೊಣ್ಣನ ಇಲ್ಲಡ್ ಏರ್ಲಾ ಇಜ್ಜಂದಿನ ಪೊರ್ತುಡು ಕಿರಣ್ ಅಡೆಗ್ ಬತ್ತಿತ್ತೆ. ಆ ಪೊರ್ತುಡು, “ನಿಕ್ಕ ಫಾರಿನ್ ಸ್ಟೈಲ್ಡ್ ಪ್ರಪೋಸ್ ಮಲ್ಪುವೆ” ಪನ್ದ್ ನಂಬಾಯಿನ ಪೊಣ್ಣು, ಕಿರಣ್ನ ಕಣ್ಣ್ಗ್ ಕುಂಟು ಕಟ್ಟ್ದ್, ಕೈಕಾರ್ಲೆನ್ ಬಲ್ಲ್ಡ್ ಕಟ್ಟ್ದ್ ಪಾಡ್ದಲ್. ಕಿರಣ್ ಅಸಹಾಯಕೆ ಆಯಿನೇ ಆಯನ ಮಿತ್ತ್ ಪೆಟ್ರೋಲ್ ಮೈತ್ದ್ ಸೂ ಪೊತ್ತಾದಲ್.
ಕಿರಣ್ ಸೂಟ್ ಕರೆಂಚೊಂದು ಬರೆಲೊಂದುಪ್ಪುನೆನ್ ಜವನ್ದಿ ತನ್ನ ಮೊಬೈಲ್ಡ್ ರೆಕಾರ್ಡ್ ಮಲ್ತ್ದಲ್ ಪನ್ಪಿ ಸ್ಫೋಟಕ ಒಲವು ತಿಕ್ಕ್ದ್ಂಡ್. ಸುರುಟು ಕಿರಣ್ ಆಯೆನೇ ಸೂ ಪಾಡೊಂದೆ ಪನ್ದ್ ಪೊಲೀಸೆರೆನ ದಿಕ್ಕ್ ತಪ್ಪಾಯೆರ ಜವನ್ದಿ ತೂತಲ್. ಆಂಡ, ಸಿಸಿಟಿವಿ ದೃಶ್ಯೊಡು ಕಿರಣ್ ಪೆಟ್ರೋಲ್ ಕನೈದಿಜೆ ಪನ್ದ್ ದೃಢ ಆತ್ಂಡ್. ಬ್ಯಾಡರಹಳ್ಳಿ ಪೊಲೀಸೆರ್ ಆರೋಪಿ ಪೊಣ್ಣನ್ ಉಲಕೈ ಮಲ್ತ್ದ್ ವಿಚಾರಣೆ ಮಲ್ತೊಂದುಲ್ಲೆರ್.