Last updated on May 14th, 2026 at 06:46 pm
ಮೇ, 14: ಇತ್ತೆ ಅರೆಗಾಲನ ಮರ್ಯಾಲನ ಪನ್ದ್ ಪನರೆ ಆವಂದಿಲೆಕ ಆದ್ ಪೋತುಂಡು! ಕಾಂಡೆ ಎಣ್ಮರೆ, ಒರ್ಮ್ಬ ಗಂಟೆಗೇ ಪಿದಯಿ ಕಾರ್ ದೀವೆರಾವಂದಿಲೆಕ ದೊಂಬು ಇತ್ತ್ಂಡ, ಬಯ್ಯಾನಗ ಕತೆನೇ ಬೇತೆ. ಒಂಜಿ ಮೂಜರೆ ನಾಲ್ ಗಂಟೆ ಆನಗನೇ ಮುಗಲ್ ಕಬಿಯೆರೆ ಸುರು ಆಪುಂಡು, ಪೊರ್ತು ಕಂತೆರಾನಗ ಓಲು ಇಪ್ಪುಂಡಾ ದಾನ್ನ ರಣ ಗಾಳಿ, ತೆಡಿಲ್ ಮೆಂಚಿ ಸುರು ಆಪುಂಡು. ಎಚ್ಚಿನ ಕಡೆಟ್ ಒಟ್ಟುಗು ಎಡ್ಡೆ ಬರ್ಸ ಬತ್ತ್ಂಡ ಕೆಲ ಕಡೆಟ್ ಕಾಲಿ ತೆಡಿಲ್ ಮೆಂಚಿದ ಗೊಬ್ಬು ಮಾತ್ರ. ಇನಿ ಆಂಡಲಾ ಬರ್ಸ ಬರು ಪನ್ದ್ ಕಾತ್ದ್ ಕುಲ್ಲಿನಕುಲು ಕುಲ್ಲುದೇ ಬಾಕಿ.
ಫಲ ಪೋತಿನ ಕುಕ್ಕು, ನೇರೊಲುಡು ಮಾತಾ ಪುರಿಕುಲೇ, ನನ ಬಜ್ಜೈದಕಲೆನ ಬಂಙ ಕೇನುನ ಬೊರ್ಚಿ, ಈ ಬರ್ಸ ದೊಂಬುಗು ನಲ್ಲಿಯೇ ಕರೆಂಚಿದ್ ಪೋಪುಂಡು.
ಬೇಸ್ಯೊದ ಬೆಪ್ಪುಗು ದುಂಬೇ ಮರಿಯಾಲ ತಂಪು ಮಲ್ದಿಲೆಕ ಉಂಡು, ಆಂಡ ಹವಾಮಾನ ಇಲಾಖೆ ಬರ್ಸ ಬತ್ತ್ಂಡಲಾ ಮುಲ್ಪದ ಹ್ಯೂಮಿಡಿಟಿ ನಿಕಲೆನ್ ಕುಲ್ಲರೆ ಬುಡ್ಪುಜಿ ಪನ್ತ್ಂಡ್! ಇಂಚಿನ ಹವಾಮಾನೊಡು ಈಸಾರ್ತಪ್ಪೆರೆ ಎಚ್ಚ ಪೊರ್ತು ಬೊರ್ಚಿ,ಅಂಚಾದ್ ಆಯಿನಾತ್ ಮೈಸರಿನ್ ತೂವೊನೊಡು.
ತುಳುನಾಡ್ಡ್ ಅಲ್ಪಲ್ಪ ಮಲ್ಲ ರೋಡ್ಲೆನ ಬೇಲೆಲಾ ಆವೊಂದುಂಡು, ಅಲ್ಪಲ್ಪ ಮಣ್ಣ್ ಗರ್ತ್ ಪಾಡ್ದೆರ್, ಗುಡ್ಡೆ ಒಕ್ಕ್ದ್ ಪಾಡ್ದೆರ್. ಸಮ ಮರಿಯಾಲ ಪತ್ತೆರೆ ದುಂಬು ಮುಟ್ಟಿ ಬೇಲೆಲೆಗೊಂಜಿ ಪಿರಿಕಟ್ಟ್ ಮಲ್ತಿಜೆರ್ನ್ಡ ಬಾರೀ ಬಂಙ ಉಂಡು. ಪಾಲಿಕೆ, ನಗರಸಭೆ, ಪುರಸಭೆತಕುಲು ಅಕಲೆನಸೀಮೆದ ತೋಡು ಕಣಿಕ್ಲೆನ್ ಒಂತೆ ಒಂತೆ ಬುಡ್ಪಾದ್ ಕೊರ್ಯೆರ ಉಂದು ಮೆನ್ಪುಲೆಕ ಉಂಡು, ಇತ್ತೆ ಆಂಡಲಾ ಮರಿಯಾಲದ ಬರ್ಸಗ್ ಬೋಡಾಪಿನ ಮಾತಾ ಅಟ್ಟನೆಲೆನ್ ಮೊಕುಲು ಮಲ್ತ್ ದೀವೊನಡ್.